இந்தியா ஓபன் 2026 பாட்மின்டன்: பி. வி. சிந்து முதல் சுற்றிலேயே வெளியேறி அதிர்ச்சி!

இந்தியா ஓபன் பாட்மின்டன் போட்டியில், உள்நாட்டு நட்சத்திரங்களான ஹெச்.எஸ். பிரணய், கே.ஸ்ரீகாந்த் ஆகியோர் 2-ஆவது சுற்றுக்கு புதன்கிழமை முன்னேறினர். இரு முறை ஒலிம்பிக் பதக்க வீராங்கனையான பி.வி.சிந்து, முதல் சுற்றிலேயே அதிர்ச்சித் தோல்வி கண்டார்.

ஆடவர் ஒற்றையரில், பிரணய் 22-20, 21-18 என்ற வகையில் ஹாங்காங்கின் செயுக் யு லீயை வெளியேற்றினார். ஸ்ரீகாந்த் 15-21, 21-6, 21-19 என்ற கேம்களில், சக இந்தியரான தருண் மன்னெபள்ளியை சாய்த்தார்.

மகளிர் ஒற்றையரில் சிந்து 22-20, 12-21, 15-21 என்ற கேம்களில், வியத்நாமின் துய் லின் குயெனிடம் அதிர்ச்சித் தோல்வி கண்டார்.

கடந்த சில காலமாகவே தடுமாற்றத்தை சந்தித்து வரும் சிந்துவுக்கு, இந்தப் போட்டியிலும் அதே விதியே நேர்ந்தது. எனினும் மற்றொரு இந்தியரான மாளவிகா பன்சோத் 21-18, 21-19 என்ற நேர் கேம்களில், சீன தைபேவின் பாய் யு போவை தோற்கடிக்க, தன்வி சர்மா 20-22, 21-18, 13-21 என, சீனாவின் ஜி யி வாங்கிடம் வீழ்ந்தார்.

ஆடவர் இரட்டையரில், போட்டித்தரவரிசையில் 3-ஆம் இடத்திலிருக்கும் இந்தியாவின் சாத்விக்சாய்ராஜ் ராங்கிரெட்டி/சிராக் ஷெட்டி கூட்டணி "வாக் ஓவர்' பெற்று 2-ஆவது சுற்றுக்கு வந்தது.

மகளிர் இரட்டையரில், ருதுபர்னா பாண்டா/ஸ்வேதபர்னா பாண்டா ஜோடி 8-21, 18-21 என்ற வகையில், ஜப்பானின் நனாகோ ஹரா/ரிகோ கியோஸ் கூட்டணியிடம் தோற்றது. அதேபோல், அஸ்வினி பாட்/ஷிகா கெüதம் இணை 18-21, 16-21 என்ற வகையில், பிரான்ஸின் மார்காட் லாம்பெர்ட்/கேமிலி போக்னான்டே ஜோடியிடம் தோல்வியுற்றது. காயத்ரி ராவத்/மானசா ராவத் இணை 5-21, 8-21 என்ற கேம்களில், தென் கொரியாவின் ஹா நா பேக்/சோ ஹீ லீ ஜோடியிடம் வெற்றியை இழந்தது. கவிபிரியா செல்வம்/சிம்ரன் சிங்கி கூட்டணி 18-21, 6-21 என, மலேசியாவின் பியர்லி டேன்/தின்னா முரளிதரன் ஜோடியிடம் தோல்வி கண்டது.

கலப்பு இரட்டையரில் துருவ் கபிலா/தனிஷா கிராஸ்டோ ஜோடி 15-21, 14-21 என்ற நேர் கேம்களில், தாய்லாந்தின் பாகபோன் தீரரட்சகுல்/சப்சிரீ தெராடனாசாய் கூட்டணியிடம் தோல்வி கண்டது.

ஆசித் சூர்யா/அம்ருதா பிரமுதேஷ் இணை 15-21, 7-21 என, ஜப்பானின் யுய்சி ஷிமோகமி/சயாகா ஹோபரா ஜோடியிடம் தோற்றது.

ரோஹன் கபூர்/ருத்விகா ஷிவானி கூட்டணி 19-21, 14-21 என்ற வகையில், ஜெர்மனியின் மார்வின் செய்டெல்/துச் போங் குயென் ஜோடியிடம் தோற்றது.