ஆஷஸ்: ஆஸ்திரேலியா 60 ரன்களுக்கு ஆல்அவுட்!

இங்கிலாந்து - ஆஸ்திரேலியா இடையே நடக்கும் நான்காவது ஆஷஸ் போட்டியில் முதல் இன்னிங்ஸில் 60 ரன்களுக்கு ஆல் அவுட் ஆகியுள்ளது ஆஸ்திரேலிய அணி.

ஆஸ்திரேலியா - இங்கிலாந்து இடையிலான பாரம்பரிய ஆஷஸ் டெஸ்ட் கிரிக்கெட் இங்கிலாந்தில் நடைபெற்று வருகிறது. 5 போட்டிகள் கொண்ட இந்தத் தொடரில் 2-1 என்ற கணக்கில் இங்கிலாந்து அணி முன்னிலையில் உள்ளது.

இந்நிலையில் 4-ஆவது டெஸ்ட் போட்டி, இங்கிலாந்தின் நாட்டிங்ஹாமில் இன்று தொடங்கியது. டாஸ் வென்ற இங்கிலாந்து அணி, ஃபீல்டிங்கைத் தேர்ந்தெடுத்தது.

முதல் ஓவரிலேயே ஆஸ்திரேலியாவுக்கு அதிர்ச்சி ஏற்பட்டது. ரோஜர்ஸ், ஸ்மித் விக்கெட்டுகளை முதல் ஓவரிலேயே வீழ்த்தி இங்கிலாந்து அணிக்கு அட்டகாசமான தொடக்கத்தை ஏற்படுத்திக் கொடுத்தார் வேகப்பந்து வீச்சாளர் பிராட். அதன்பிறகும், ஆஸ்திரேலியா அணி தொடர்ந்து விக்கெட்டுகளை இழந்ததால் பரபரப்பு ஏற்பட்டது.

முதல் நான்கு பேட்ஸ்மேன்களில் 3 பேர் ரன் எதுவும் எடுக்காமல் அவுட் ஆனார்கள். இறுதியில் தனது முதல் இன்னிங்ஸில், 18.3 ஓவர்களில், 60 ரன்களுக்கு ஆல் அவுட் ஆனது ஆஸ்திரேலிய அணி. அதிகபட்சமாக ஜான்ஸன் 13, கிளார்க் 10 ரன்கள் எடுத்தார்கள். இது தவிர இங்கிலாந்து பந்து வீச்சாளர்கள் உதிரியாக 14 ரன்களைக் கொடுத்தனர். 9.3 ஓவர்கள் வீசி 15 ரன்கள் மட்டும் கொடுத்து 8 விக்கெட்டுகளை வீழ்த்தினார் பிராட். முதல் விக்கெட்டை எடுத்தபோது அவர் டெஸ்ட் கிரிக்கெட்டில் தனது 300-வது விக்கெட்டைப் பெற்றார்.