கோவை சர்வதேச டென்னிஸ்: சாகேத்- அருண் ஜோடி சாம்பியன்

கோவை, ஜூலை 20: கோவையில் நடைபெற்று வரும் சர்வதேச டென்னிஸ் போட்டியின் ஆடவர் இரட்டையர் பிரிவில் இந்தியாவின் சாகேத் மைனேனி- அருண் பிரகாஷ் ராஜகோபாலன் ஜோடி பட்டம் வென்றது. தமிழ்நாடு டென்னிஸ் சங்கம், கோவை டென்னிஸ் சங்கம், புரோ சர்வ் டென்னிஸ் அகாதெமி ஆகியவற்றின் சார்பில் இப் போட்டி நடைபெற்றது.

 வெள்ளிக்கிழமை நடைபெற்ற ஆடவர் இரட்டையர் இறுதி ஆட்டத்தில் சாகேத் மைனேனி- அருண் பிரகாஷ் ராஜகோபாலன் ஜோடியும், விஜய் சுந்தர் பிரசாந்த்- காஸô விநாயக் சர்மா ஜோடியும் மோதின.

 தொடக்கம் முதலே சாகேத் மைனேனி- அருண் பிரகாஷ் ராஜகோபாலன் ஜோடி சிறப்பாக ஆடியது.

 இதனால் மைனேனி ஜோடி 6-3, 6-2 என்ற நேர் செட்களில் எளிதாக வெற்றி கண்டு சாம்பியன் ஆனது.

 ஆடவர் ஒற்றையர் பிரிவு: வெள்ளிக்கிழமை நடந்த ஆடவர் ஒற்றையர் அரையிறுதி ஆட்டத்தில் தரவரிசையில் 3-வது இடத்தில் உள்ள கொரியாவின் சுக் யோங் ஜியோங், 2-வது இடத்தில் உள்ள சாகெத் மைனேனியுடன் மோதினார்.

 முதல் செட்டை 6-3 என்ற கணக்கில் மைனேனி வென்றார். அடுத்த செட்டை 6-4 என்ற கணக்கில் சுக் யோங் ஜியோங் கைப்பற்றினார். பின்னர் நடைபெற்ற டைபிரேக்கர் சுற்றில் ஜியோங் 1-0 என்ற கணக்கில் முன்னிலையில் இருந்தபோது உடல்நலக்குறைவு காரணமாக மைனேனி விலகினார். இதனால் ஜியோங் வெற்றி பெற்றதாக அறிவிக்கப்பட்டார். மற்றொரு ஆட்டத்தில் தரவரிசையில் 4-வது இடத்தில் உள்ள இந்தியாவின் என்.விஜய்சுந்தர் பிரசாந்த், 6-வது இடத்தில் உள்ள கருண் உதய்சிங் ஆகியோர் மோதினர்.

 முதல் செட்டை 6-4 என்ற கணக்கில் கைப்பற்றிய விஜய்சுந்தர் பிரசாந்த், இரண்டாவது செட்டை 3-6 என்ற கணக்கில் இழந்தார். பின்னர் நடைபெற்ற டைபிரேக்கர் சுற்று 6-2 என்ற கணக்கில் சுந்தர் வசமாக அவர் வெற்றிபெற்று இறுதிச்சுற்றுக்குள் நுழைந்தார். சனிக்கிழமை நடைபெறும் ஆடவர் ஒற்றையர் இறுதி ஆட்டத்தில் இந்தியாவின் என்.விஜய்சுந்தர் பிரசாந்த், கொரியாவின் சுக் யோங் ஜியோங் ஆகியோர் மோதுகின்றனர்.