திருநள்ளாறு கோயிலில் சனிப்பெயர்ச்சி விழா.. நேரலையில்!

காரைக்கால்: சனிப்பெயர்ச்சி விழாவினை, பொதுமக்களும் பக்தர்களும் வீட்டிலிருந்தே காணும் வகையில், திருநள்ளாறு கோயில் நிர்வாகம் யூடியூப்பில் நேரலை ஒளிபரப்பை செய்திருக்கிறது.

புதுச்சேரி மாநிலம் காரைக்கால் மாவட்டத்தில் உள்ள திருநள்ளாற்றில் இன்று மாலை நடைபெறும் உலக பிரசித்தி பெற்ற சனிப்பெயர்ச்சி விழா-2023 உலகம் முழுவதும் உள்ள பொதுமக்கள் அனைவரும் வீட்டிலிருந்தே ஸ்ரீ சனீஸ்வர பகவான் அருள் பெற யூடியூப் லிங்க் மூலம் பார்க்க  காரைக்கால் மாவட்ட நிர்வாகம் ஏற்பாடு செய்துள்ளது. 

இந்த யூடியூப் லிங்க் மூலம்  பொதுமக்கள் அனைவரும் சனிப்பெயர்ச்சி நிகழ்வினைப் பார்த்து ஸ்ரீ சனீஸ்வர பகவான் அருள் பெற காரைக்கால் மாவட்ட நிர்வாகம் கேட்டுக் கொண்டுள்ளது. 

இதையும் படிக்க.. 12 ராசிக்குமான சனிப் பெயர்ச்சி பலன்கள்!

வாக்கியப் பஞ்சாங்கப்படி, மகர ராசியிலிருந்து கும்ப ராசிக்கு சனிபகவான் இன்று மாலை 5.20 மணிக்கு பெயர்ச்சியானார். இதையொட்டி, திருநள்ளாறு ஸ்ரீதா்பாரண்யேஸ்வரா் கோயிலில் சிறப்பு அபிஷேக ஆராதனைகள் நடைபெற்று வருகின்றன.

அனைவராலும் நேரடியாகக் கோயிலுக்குச் சென்று ஸ்ரீசனிபகவானை தரிசிக்க முடியாது என்பதால், கோயில் நிர்வாகம்,  நேரலையில் காணும்  ஏற்பாட்டினை செய்திருக்கிறது.

இதையும் படிக்க.. சனிப்பெயர்ச்சியால் நன்மையடையும் ராசிகள்!

நளசக்கரவர்த்திக்கு ஏற்பட்ட தோஷம் விலக தர்பை காடாக இருந்த திருநள்ளாறுக்கு வந்து சுயம்புவாக தோன்றிய தர்பாரண்யேஸ்வரரை வணங்கி, தீர்த்தத்தில் நீராடி ஸ்ரீ தர்பாரண்யேஸ்வரரை வழிபட்டதால், அவருக்கு ஏற்பட்ட துன்பம் விலகி, அவர் இழந்ததையெல்லாம் மீட்டதாக வரலாறு. இக்கோயிலில் சனீஸ்வரபகவான் தனி சந்நிதி கொண்டு அருள்பாலிக்கிறார்.

திருநள்ளாறு ஸ்ரீதா்பாரண்யேஸ்வரா் கோயிலில் இன்று சனிப்பெயா்ச்சியின்போது ஸ்ரீசனீஸ்வர பகவானுக்கு நடக்கும் விசேஷ அபிஷேக, ஆராதனைகளை ஏராளமானோர் தொலைக்காட்சி வாயிலாகவும், யூடியூப் வாயிலாகவும் கண்டு பிரார்த்தனை செய்து வருகிறார்கள்.