தாற்காலிக ரயில் நிறுத்தங்கள் மேலும் நீட்டிப்பு ரயில்வே நிர்வாகம் அறிவிப்பு

சேலம் ரயில்வே கோட்டத்துக்கு உள்பட்ட பகுதியில் சோதனை அடிப்படையில் செயல்பட்டு வரும் தாற்காலிக ரயில் நிறுத்தங்கள், மறு அறிவிப்பு வரும் வரையிலும் தொடரும் என்று ரயில்வே கோட்ட நிர்வாகம் அறிவித்துள்ளது.

 ரயில்வே அமைச்சகம், ரயில்வே போர்டு அறிவிப்பின்படி, சேலம் ரயில்வே கோட்டத்துக்கு உள்பட்ட பகுதிகளில் சோதனை அடிப்படையில் பல்வேறு நிறுத்தங்களில் நின்று வந்த எக்ஸ்பிரஸ் ரயில்கள் ஜூலை 1-ஆம் தேதி முதல் அந்த நிறுத்தங்களில் நிற்காது என்று கடந்த ஜூன் 4-ம் தேதி அறிவிப்பு வெளியானது.

 இதனால் சேலம் எக்ஸ்பிரஸ் ரயில், அயோத்தியாப்பட்டணம், ஏத்தாப்பூர் ரோடு, வாழப்பாடி கேட் ஆகிய இடங்களில் ஜூலை 1-ம் தேதி முதல் நிற்காது என்று அறிவிக்கப்பட்டது. இதற்கு பயணிகள், பொதுமக்களிடம் எதிர்ப்பு கிளம்பியது. இந்த நிலையில் ஏற்கெனவே வெளியிட்ட அறிவிப்பை ரயில்வே நிர்வாகம் ஜூன் 13-ம் தேதி திரும்பப் பெற்றுக் கொண்டது.

 அதன்படி தாற்காலிக ரயில் நிறுத்தங்களில் செப்டம்பர் 30-ம் தேதி வரையிலும் ரயில்கள் நின்று செல்லும் என்று அப்போது அறிவிக்கப்பட்டது. இந்த நிலையில் செப்டம்பர் 30-ம் தேதிக்கு பிறகு மறு அறிவிப்பு வரும் வரையிலும் தாற்காலிக நிறுத்தங்களில் ரயில்கள் நின்று செல்லும் என்று இப்போது அறிவிக்கப்பட்டுள்ளது.

 அதன்படி, கீழ்க்கண்ட ரயில்கள், நிறுத்தங்களில் மறு அறிவிப்பு வரும் வரையிலும் நின்று செல்லும் என்று சேலம் ரயில்வே கோட்ட நிர்வாகம் அறிவித்துள்ளது.

 தாற்காலிக நிறுத்தத்துக்கான உத்தரவு நீட்டிக்கப்பட்டுள்ள ரயில்கள், நிறுத்தங்கள் வருமாறு:

நாகர்கோவில் - சென்னை சென்ட்ரல் எக்ஸ்பிரஸ்: திருப்பத்தூர், சென்னை சென்ட்ரல் - மங்களூர் வெஸ்ட் கோஸ்ட்: சங்ககிரி துர்கம், ஹைதராபாத் - கொச்சுவேலி சபரி எக்ஸ்பிரஸ்: மொரப்பூர், லோகமான்யா திலக் - கோவை: ஓமலூர், சென்னை எழும்பூர் - சேலம் எக்ஸ்பிரஸ்: அயோத்தியாப்பட்டணம், ஏத்தாப்பூர் சாலை, வாழப்பாடி கேட்.

 பாண்டிச்சேரி - யஷ்வந்த்பூர் ஏழைகள் ரதம்: சின்ன சேலம், மாயவரம் - கோயம்புத்தூர் ஜனசதாப்தி: இருகூர், பெங்களூரு - நாகர்கோவில்: கரூர், திருச்சிராப்பள்ளி - கரூர்: ஜீயர்புரம், திருச்சிராப்பள்ளி - ஈரோடு: ஜீயர்புரம், சென்னை சென்ட்ரல் - திருவனந்தபுரம்: போத்தனூர், சென்னை சென்ட்ரல் - பழனி: மோகனூர்.