கடன் வாங்கி தருவதாக மகளிர் சுயஉதவிக் குழுவினரிடம் மோசடி: 8 பேர் மீது வழக்குப்பதிவு

கடன் பெற்றுத்தருவதாக கூறி ரூ.30 லட்சம் மோசடிப் புகாரில் சென்னை,தஞ்சையைச் சேர்ந்த அரசு ஊழியர், பேராசிரியர் உள்ளிட்ட 8 பேர் மீது மதுரை போலீஸார் வழக்குப்பதிந்து விசாரித்துவருகின்றனர்.

 மதுரை வைகை வடகரையைச் சேர்ந்தவர் ரேவதி. இவர் மல்லிகை மகளிர்குழு மற்றும் தொண்டு நிறுவனம் நடத்திவருகிறார். இவரிடம் தஞ்சை சூரக்குடியைச் சேர்ந்த சத்துணவுப் பணியாளர் வனிதா உள்ளிட்டோர் மகளிர் சுயஉதவிக் குழுவினருக்கு கடன் பெற்றுத் தருவதாகவும், அதற்காக ரூ.30 லட்சம் மற்றும் ரூ.20 லட்சத்துக்கான சொத்துப் பத்திரங்கள், சுயஉதவிக்குழு அடையாள அட்டை, ஆவணங்களை அளிக்கவும் கூறியுள்ளனர்.

 அதனடிப்படையில் புதுப்பட்டி வைகை, புதூர் மல்லிகை, ஆழ்வார்புரம் முத்து, ஹார்விபட்டி ரோஜா, மகாளிபட்டி அங்கையர்கண்ணி ஆகிய சுய உதவிக்குழுக்களிடமிருந்து பணம் வசூலிக்கப்பட்டுள்ளது.

 கடந்த 2012 ஆம் ஆண்டில் பல தவணைகளாக வனிதா வங்கிக் கணக்கிலும், அவரது உறவினர்களிடமும் ரூ.30 லட்சம் வரை கொடுத்ததாகக் கூறப்படுகிறது. ஆனால், குறிப்பிட்டபடி கடன் வாங்கித்தராததுடன், குழு ஆவணங்களையும் திருப்பித்தரவில்லையாம்.

இதுதொடர்பாக ரேவதி அளித்த புகாரின்பேரில், சூரக்குடிபட்டி சத்துணவுப் பணியாளர் வனிதா, அவரது சகோதரர் சுந்தராஜன், பேராசிரியர் கெüதம், லால்குடி மணி, சென்னை எண்ணூர் பகுதி கிரேசி என்ற மேரிகிரேசி, வசந்தகுமாரி, சிசிலி, முத்தமிழ்செல்வன் ஆகியோர் மீது மதுரை மாநகர் மத்திய குற்றப்பிரிவு போலீஸார் வழக்குப்பதிந்துள்ளனர்.

  மகளிர் சுய உதவிக்குழுக்களிடமிருந்து வசூலித்து மோசடி செய்ததாக எழுந்த புகாரால் பரபரப்பு ஏற்பட்டுள்ளது.