விருதுநகர் அருகே குடிநீர் குழாய்களை சீரமைக்க வலியுறுத்தி ஆட்சியரிடம் கிராம மக்கள் மனு

விருதுநகர் அருகே கடும் குடிநீர் தட்டுப்பாட்டை போக்கும் வகையில் உடைப்பு ஏற்பட்டுள்ள குடிநீர் குழாய்களை சீரமைக்கவும், சுகாதார வளாகம் அமைத்து தருதல் உள்ளிட்ட வசதிகளை செய்து தர வலியுறுத்தி ஆட்சியரிடம் கிராம மக்கள் திங்கள்கிழமை மனு அளித்தனர்.

இது குறித்து விருதுநகர் மாவட்டம், சிவகாசி ஊராட்சி ஒன்றியம், வாடியூர் ஊராட்சியைச் சேர்ந்த கல்போது கிராம பொதுமக்கள் ஆட்சியரிடம் நேரில் அளித்த மனுவில் தெரிவித்திருப்பதாவது: இக்கிராமத்தில் 500 குடியிருப்புகளில் 1600 பேர்களுக்கு மேற்பட்டோர் வசித்து வருகிறோம். இங்குள்ள தரைநிலத் தொட்டிக்கு தண்ணீர் விநியோகம் செய்யும் மோட்டார் பழுதாகி 6 மாதங்களுக்கு மேலாகிறது. இது தொடர்பாக ஊராட்சி அலுவலகத்திலும், தலைவரிடமும் முறையிட்டும் எவ்வித நடவடிக்கையும் இல்லை. அதேபோல், மேல்நிலை நீர்தேக்க தொட்டிக்கு தண்ணீர் கொண்டு வரும் குழாய்களிலும் உடைப்பு ஏற்பட்டுள்ளதால், குறைந்தளவு நீரும் வீனாகும் நிலையேற்பட்டுள்ளது. இதுபோன்ற காரணங்களால் கிராமத்தில் கடும் குடிதண்ணீர் ஏற்பட்டுள்ளது.

மேலும், தேவைப்படும் தண்ணீருக்காக 2 கி.மீ தூரம் நடந்து சென்று மோட்டார் பம்ப்செட் கிணற்றி்ல் எடுத்து வருகிறோம். இதையும் பொதுமக்கள் அதிகமாக வந்து நீரை எடுத்துச் செல்வதை பார்த்து விவசாயிகளும் தண்ணீரை நிறுத்தி விடுகின்றனர். இதேபோல் ஒவ்வொரு நாளும் தண்ணீர் எடுப்பதற்காகவே நேரம் சரியாகி விடுகிறது. இதனால் குறிப்பிட்ட நேரத்திற்குள் பட்டாசு ஆலைகளுக்கும், தேசிய ஊரக வேலை உறுதி திட்ட வேலைக்கும் செல்ல முடியாத ஏற்படுகிறது.

கிராமத்தில் குப்பைகள் மற்றும் கழிவு நீர் வாறுகால் ஆகியவைகளை ஆண்டுக்கு ஒரு முறை பொங்கல் திருவிழாவின் போது மட்டும் சுத்தம் செய்யப்பட்டு வருகிறது. அதேபோல், வறுகால் பாலம் சேதமடைந்து உள்ளதால் அவ்வழியாக வாகனங்கள் செல்ல முடியாத நிலையும் ஏற்பட்டுள்ளது. இதை உடனே சீரமைக்க வேண்டும். மேலும், மக்கள் தொகைக்கேற்ப குடிநீர் தண்ணீர் தொட்டிகள் இல்லாததால், கூடுதலாக ஆழ்குழாய் கிணறு, பெண்கள் பயன்படுத்தும் வகையான சுகாதார வளாகம் ஆகியவைகளை அமைத்து தர மாவட்ட நிர்வாகம் நடவடிக்கை எடுக்க வலியுறுத்தி ஆட்சியர் டி.என்.ஹரிஹரனிம் அளித்த மனுவில் பொதுமக்கள் தெரிவித்துள்ளனர்.