விருதுநகரில் வரும் 14-ம் தேதி திமுக பொது உறுப்பினர்கள் கூட்டம்: மு.க.ஸ்டாலின் பங்கேற்கிறார்

விருதுநகர் மாவட்ட திமுக பொது உறுப்பினர்கள் கூட்டத்தில் அக்கட்சியின் பொருளாளர் மு.க.ஸ்டாலின் வரும் 14-ம் தேதி பங்கேற்று பேச  இருக்கிறார்.

இது குறித்து மாவட்ட செயலாளர் கே.கே.எஸ்.எஸ்.ஆர்.ராமச்சந்திரன் வெளியிட்டுள்ள செய்திக் குறிப்பில்,

விருதுநகர் மாவட்ட திமுக பொது உறுப்பினர்கள் கூட்டம் மேற்குறிப்பிட்ட நாளில் ராமமூர்த்தி சாலையில் உள்ள கந்தசாமி-ராஜம்மாள் அரங்கத்தில் மாலை 4 மணிக்கு நடைபெற இருக்கிறது. இந்தக் கூட்டத்திற்கு மாவட்ட அவை தலைவர் கே.பி.எஸ்.பாண்டியன் தலைமையிலும், முன்னாள் அமைச்சர் மற்றும் திருச்சுழி சட்டப்பேரவை உறுப்பினருமான தங்கம் தென்னரசு முன்னிலையிலும் நடைபெற இருக்கிறது.

இந்தக் கூட்டத்தில் அக்கட்சியின் பொருளாளர் மு.க.ஸ்டாலின் பங்கேற்று சிறப்புரையாற்றி பேச இருக்கிறார். அதனால், கூட்டத்தில் மாவட்ட, மாநில நிர்வாகிகள், தலைமை செயற்குழு உறுப்பினர்கள், ஒன்றியம், நகர் கழக செயலாளர்கள், கிளைக்கழக நிர்வாகிகள், மாவட்ட பிரதிநிதிகள், விவசாய அணி பிரிவினர், ஊராட்சி தலைவர்கள், ஒன்றியக் குழு உறுப்பினர்கள் உள்ளிட்ட  பிரதிநிதிகள் அனைவரும் தவறாமல் பங்கேற்க வேண்டும் என மாவட்ட செயலாளர் கே.கே.எஸ்.எஸ்.ஆர்.ராமச்சந்திரன் கேட்டுக் கொண்டுள்ளார்.