அரசு அனுமதியின்றி செயல்படும் அலுமினிய பவுடர் தொழிற்சாலையை மூட பொதுமக்கள் கோரிக்கை

விருதுநகர் பகுதியில் பட்டாசுக்கு தயாரிப்பதற்கு பயன்படுத்தப்படும் அலுமினியம் பவுடர் தயார் செய்யும் தொழிற்சாலையை அகற்ற வேண்டும் என்பதை வலியுறுத்தி பொதுமக்கள் ஆட்சியரிடம் மனு அளித்தனர்.

இது குறித்து அல்லம்பட்டி, பாரதி நகர் பொதுமக்கள் சார்பில் எம்.காளீஸ்வரி, ஆட்சியரிடம் அளித்த மனுவில் தெரிவித்திருப்பதாவது:

விருதுநகர் அருகே அல்லம்பட்டி பாரதி நகரில் பவளம் பி.சுந்தரவேல் என்பவருக்கு சொந்தமான இடம் உள்ளது. இந்த இடத்தைச் சுற்றிலும் பல்வேறு குடியிருப்பு பகுதிகள் நெருக்கடியான நிலையில் இருந்து வருகிறது. இக்குறிப்பிட்ட இடத்தில் சுந்தரவேல் என்பவரும், திருத்தங்கல்லைச் சேர்ந்த உதயசூரியனும் பட்டாசுகள் தயார் செய்வதற்கு பயன்படும் அலுமினியம் பவுடர் தயார் செய்து வரும் தொழிலை செய்கின்றனர். இதனால், இங்கிருந்து வரும் கந்தகம் கலந்த புகையானது சுற்றுப்புற சூழலை மாசுபடுத்தி மூச்சு திணறல், கண் எரிச்சல் ஆகியவைகளை ஏற்படுத்தி வருகிறது.

மேலும், இரவு நேரங்களில் கேட்டை பூட்டிக் கொண்டு வேலை செய்யும் போது, திடீரென வெடிச்சத்தம் கேட்கிறது. இதனால், இப்பகுதியில் உள்ளவர்கள் நிம்மதியாக தூங்க முடியாத நிலையிருக்கிறது. அதோடு, மழை தண்ணீரிலும் கலந்து பல குடியிருப்புகளில் குடிநீரும் நச்சு தன்மையுடன் வருகிறது. இது குறித்து இப்பகுதி பொதுமக்கள் அனைவரும் திரண்டு சென்று கேட்டாலும், யார் கிட்டேயும் போய் சொல்லுங்க என்னை எதுவும் செய்ய முடியாது என மிரட்டியும் வருகின்கின்றனர்.அதோடு, இக்குறிப்பிட்ட இடத்தில் அலுமினிய பவுடர் தயார் செய்வதற்கு அனுமதி பெறவில்லை. அதனால், மாவட்ட நிர்வாகம் குறிப்பிட்ட இடத்திலிருந்து பவுடர் தயாரிக்கும் தொழிற்சாலையை அகற்றுவதற்கு நடவடிக்கை எடுக்க வேண்டும் என பாரதி நகர் பொதுமக்கள் சார்பில் எம்.காளிஸ்வாரி ஆட்சியரிடம் அளித்துள்ள மனுவில் தெரிவித்துள்ளார்.