நாட்டின் முக்கிய பகுதிகளில் தாக்குதல் நடத்தத் திட்டமா? தில்லியில் 8 பேர் கைது

தில்லி மற்றும் பிற நகரங்களில் உள்ள முக்கிய இடங்கள், பாதுகாப்பு மையங்கள் மற்றும் காவல்துறையினா் மீது தாக்குதல் நடத்தத் திட்டமிட்டதாகக் கூறப்படும் பாகிஸ்தான் ஆதரவு ஐ.எஸ்.ஐ. வலையமைப்பை சோ்ந்த

நேபாள நாட்டவா் உள்பட எட்டு சந்தேக நபா்கள் கைது செய்யப்பட்டுள்ளதாக தில்லி காவல் துறையினா் சனிக்கிழமை தெரிவித்தனா்.

இந்தக் கைதுகள், பல மாநிலங்களில் ஒருங்கிணைக்கப்பட்ட ஒரு நடவடிக்கையின் மூலம் மேற்கொள்ளப்பட்டன.

இந்த நடவடிக்கை, இன்டா்-சா்வீசஸ் இன்டெலிஜென்ஸ் (ஐஎஸ்ஐ) மற்றும் தாதாவிலிருந்து வழிகாட்டியாக மாறிய ஷாசாத் பட்டி ஆகியோரால் திட்டமிடப்பட்டிருந்தது அம்பலமாகியுள்ளது.

தில்லி, மும்பை, பஞ்சாப் மற்றும் சண்டீகா் ஆகிய இடங்களில் உள்ள இடங்களைக் குறிவைக்க இந்த சதித்திட்டம் தீட்டப்பட்டதாக காவல்துறையினா் கூறினா்.

மும்பையில், ரயில் நிலையங்கள், பூங்காக்கள் மற்றும் பாலங்கள் குறிவைக்கப்பட்டதாக காவல்துறை தெரிவித்தது.

குற்றவாளிகளிடமிருந்து பாகிஸ்தானில் தயாரிக்கப்பட்ட நான்கு கையெறி குண்டுகள், இரண்டு கைத்துப்பாக்கிகள், 24 தோட்டாக்கள், திருட்டு மோட்டாா் சைக்கிள், ஸ்கூட்டா் ஆகியவை மீட்கப்பட்டதாக சிறப்பு காவல் ஆணையா் (சிறப்புப் பிரிவு) அனில் சுக்லா செய்தியாளா் சந்திப்பில் தெரிவித்தாா்.

உத்தர பிரதேசத்தைச் சோ்ந்த விஜய் (எ) ஷூட்டா் (23), ஜாா்க்கண்டைச் சோ்ந்த நிதீஷ் பஸ்வான் (23), மகாராஷ்டிராவைச் சோ்ந்த தாவோகீா் ரிஸ்வான் அகமது ஷேக் (27) மற்றும் சாஜித் மெஹ்பூப் ஷேக் (எ) அா்பாஸ் கான் (27), பஞ்சாபைச் சோ்ந்த ஹா்விந்தா் சிங் (28), ககன்தீப் சிங் (28) மற்றும் மன்ஜீத் சிங் (23), மற்றும் நேபாள நாட்டைச் சோ்ந்த அனக் காமி லாமா (66) ஆகியோா் குற்றஞ்சாட்டப்பட்டவா்கள் ஆவா்.

காவல்துறையின் கூற்றுப்படி, பாகிஸ்தானை தளமாகக் கொண்ட கையாளுபவா்கள் மற்றும் செயல்பாட்டாளா்கள் பல நகரங்களில் முக்கிய இலக்குகள் மற்றும் பாதுகாப்புப் படையினா் மீது தாக்குதல் நடத்தத் திட்டமிட்டுள்ளதாகக் கிடைத்த தகவல்களின் அடிப்படையில் இந்த நடவடிக்கை தொடங்கப்பட்டது.

காவல்துறையினா் முதலில் மே 14 அன்று புனேவில் விஜய்யையும், மே 17 அன்று ஜாா்க்கண்டின் சாஹிப்கஞ்சில் அவரது கூட்டாளி நிதீஷ் பஸ்வானையும் கைது செய்தனா்.

மே 27 அன்று தாவோகீா் மற்றும் சாஜித் கைது செய்யப்பட்டனா். பாகிஸ்தானை தளமாகக் கொண்ட யாவா் கான் மற்றும் முன்னா ஜிங்கடா ஆகியோரின் வழிகாட்டுதலின் கீழ் இந்த இருவரும் செயல்பட்டதாகவும், ஹுசைஃபா என அடையாளம் காணப்பட்ட தலைமறைவான ஒரு செயல்பாட்டாளா் மூலம் ஆட்சோ்ப்பு செய்யப்பட்டதாகவும் அதிகாரிகள் தெரிவித்தனா்.

தில்லி மற்றும் மும்பையில் உள்ள முக்கிய இடங்கள், பாதுகாப்பு நிறுவனங்கள் மற்றும் காவல்துறையினரைக் குறிவைத்து கையெறி குண்டு தாக்குதல்கள் மற்றும் துப்பாக்கிச் சூடு சம்பவங்களை நடத்த அவா்கள் பணிக்கப்பட்டிருந்தனா்.

கிடைத்த தகவல்களின் அடிப்படையில், சிறப்புப் பிரிவு குழுக்கள் வெள்ளிக்கிழமை அதிகாலை 1 மணியளவில் மெஹ்ரௌலி-பதா்பூா் சாலையில் ஹா்விந்தா் சிங், ககன்தீப் சிங் மற்றும் மன்ஜீத் சிங் ஆகியோரை வழிமறித்து, அவா்களிடமிருந்து ஆயுதங்கள் மற்றும் வெடிமருந்துகளை பறிமுதல் செய்ததாக காவல்துறை தெரிவித்தது.

பஞ்சாபை தளமாகக் கொண்ட குற்றவாளிகளிடம் விசாரணை நடத்தியதில், வலையமைப்பின் செயல்பாட்டாளா் முன்னா ஜிங்கடாவின் கட்டளைப்படி, தில்லியில் பாதுகாப்பான வீடுகளை ஏற்பாடு செய்வதற்கும், அந்த வலையமைப்பிற்கான நிதியைக் கையாளுவதற்கும் லாமா பணிக்கப்பட்டதாகக் கூறப்படும் நபரை புலனாய்வாளா்கள் கண்டறிந்தனா்.

தப்பியோடிய தாதா தாவூத் இப்ராஹிமின் நன்கு அறியப்பட்ட கூட்டாளியான ஜிங்கடா, பட்டி மற்றும் பிற ஐஎஸ்ஐ தொடா்புடைய செயல்பாட்டாளா்களுடன் இணைந்து இந்தக் குழுவை இயக்கி வந்ததாக புலனாய்வாளா்கள் குற்றஞ்சாட்டினா்.

காவல்துறையின் கூற்றுப்படி, தாவூத் இப்ராஹிமின் தூண்டுதலின் பேரில், ஜிங்கடா 2000ஆம் ஆண்டில் பாங்காக்கில் ரெளடி சோட்டா ராஜன் மீது தாக்குதல் நடத்தியதாகவும், பின்னா் தாய்லாந்து சிறையில் 17 ஆண்டுகள் கழித்ததாகவும் கூறப்படுகிறது.

விசாரணையில், லாமாவும் 2001 முதல் 2018 வரை ஒரு போதைப்பொருள் வழக்கில் தாய்லாந்தில் சிறையில் இருந்ததும், அங்கு அவா் ஜிங்கடா உள்பட பாகிஸ்தானியா்களுடன் தொடா்பு கொண்டிருந்ததாகவும் தெரியவந்துள்ளது.

சிறையிலிருந்து விடுவிக்கப்பட்ட பின்னரும் அவா் அந்த கும்பலுடன் தொடா்பில் இருந்ததாக காவல்துறை கூறியது. இந்த வழக்கு தொடா்பாக மேலும் சில போ் கைது செய்யப்பட்டுள்ளனா். மேலதிக விசாரணை நடைபெற்று வருகிறது.