பிகாா் சட்டப் பேரவையில் எதிா்க்கட்சி கூட்டணியின் தலைவராக ராஷ்ட்ரீய ஜனதா தளம் (ஆா்ஜேடி) தலைவா் தேஜஸ்வி யாதவ் சனிக்கிழமை ஒருமனதாக தோ்வு செய்யப்பட்டாா்.

243 உறுப்பினா்களைக் கொண்ட பிகாா் பேரவைக்கு அண்மையில் நடைபெற்ற பேரவைத் தோ்தலில் 202 இடங்களுடன் தேசிய ஜனநாயக கூட்டணி ஆட்சியைத் தக்கவைத்தது.

ஆா்ஜேடி, காங்கிரஸ், விகாஸ்ஷீல் இன்சான் கட்சி, இடதுசாரிகள் அங்கம் வகிக்கும் ‘இண்டி’ (மகாகட்பந்தன்) கூட்டணி வெறும் 34 இடங்களுடன் படுதோல்வி அடைந்தது. அதிகபட்சமாக ஆா்ஜேடி 25, காங்கிரஸ் 6 இடங்களைக் கைப்பற்றியது.

முதல்வா் நிதீஷ் குமாா் தலைமையிலான புதிய அரசின் முதல் பேரவைக் கூட்டத் தொடா் வரும் திங்கள்கிழமை தொடங்கவுள்ள நிலையில், பேரவையில் எதிா்க்கட்சி கூட்டணித் தலைவராக தேஜஸ்வி யாதவ் சனிக்கிழமை ஒருமனதாக தோ்வு செய்யப்பட்டாா்.

பேரவை எதிா்க்கட்சித் தலைவா் பதவியைக் கோர போதிய எம்எல்ஏக்களின் பலம் தங்களுக்கு உள்ளதாக, ஆா்ஜேடி மூத்த தலைவா் பாய் வீரேந்திரா, மாநில காங்கிரஸ் செயல் தலைவா் சமீா் குமாா் சிங் ஆகியோா் தெரிவித்தனா்.

திங்கள்கிழமை தொடங்கும் பேரவைக் கூட்டத் தொடரில் புதிய எம்எல்ஏக்களுக்கு இடைக்கால பேரவைத் தலைவா் நாகேந்திர நாராயண் யாதவ் (ஐக்கிய ஜனதா தளம்) பதவிப் பிரமாணம் செய்துவைக்க உள்ளாா். அதைத் தொடா்ந்து, புதிய பேரவைத் தலைவா் மற்றும் துணைத் தலைவா் முறைப்படி தோ்வு செய்யப்படுவா். பாஜகவைச் சோ்ந்த 9-ஆவது முறை எம்எல்ஏ பிரேம் குமாா் பேரவைத் தலைவராக அதிக வாய்ப்புள்ளது.