ஸ்ரீராமா் பிராணப் பிரதிஷ்டை 2-ஆம் ஆண்டு தினம்: அயோத்தியில் கோலாகலம்- அமைச்சா் ராஜ்நாத் சிங் பங்கேற்பு

உத்தர பிரதேச மாநிலம், அயோத்தியில் உள்ள பிரம்மாண்ட ராமா் கோயிலில் மூலவா் ஸ்ரீபாலராமா் பிராணப் பிரதிஷ்டை செய்யப்பட்டதன் இரண்டாம் ஆண்டு தினத்தையொட்டி புதன்கிழமை கோலாகல விழா நடைபெற்றது. இதில் பாதுகாப்புத் துறை அமைச்சா் ராஜ்நாத் சிங் நேரில் பங்கேற்றாா்.

ஸ்ரீராமஜென்ம பூமி வழக்கில் உச்சநீதிமன்றத் தீா்ப்பின்கீழ், அயோத்தியில் ராமருக்கு எழில்மிகு கோயில் எழுப்பப்பட்டது. மூலவா் ஸ்ரீபாலராமரின் பிராணப் பிரதிஷ்டை, 2024, ஜனவரி 22-ஆம் தேதி (பெளஷ மாதத்தின் வளா்பிறை துவாதசி நாள்) பிரதமா் மோடி முன்னிலையில் நடைபெற்றது. இதைத் தொடா்ந்து, நாடு முழுவதும் இருந்து கோடிக்கணக்கான பக்தா்கள் ராமா் கோயிலில் தரிசனம் மேற்கொண்டு வருகின்றனா்.

மூலவா் பிராணப் பிரதிஷ்டையின் ஆண்டு தினம், ஹிந்து நாள்காட்டியின்படி பெளஷ மாதத்தின் வளா்பிறை துவாதசி நாளில் கொண்டாடப்படுகிறது. முதலாம் ஆண்டு தினம், கடந்த ஜனவரி 11-ஆம் தேதி கொண்டாடப்பட்டது.

இரண்டாம் ஆண்டு தினமான புதன்கிழமை (டிச.31) அயோத்தி கோயிலில் ஸ்ரீபாலராமருக்கு சிறப்பு யாகங்களும், அபிஷேக ஆராதனைகளும் நடைபெற்றன. இந்தச் சடங்குகளில் பாதுகாப்புத் துறை அமைச்சா் ராஜ்நாத் சிங் முன்னிலை வகித்து, சுவாமி தரிசனம் மேற்கொண்டாா்.

லட்சக்கணக்கானோா் வருகை: பிராணப் பிரதிஷ்டை இரண்டாம் ஆண்டு தினத்தையொட்டி, அயோத்தி நகரம் விழாக்கோலமாக காட்சியளித்தது. அங்கு நடைபெற்ற ஆன்மிக ஊா்வலத்தில் ஏராளமான பக்தா்கள் கலந்து கொண்டனா்.

வெள்ளிக்கிழமை வரை சிறப்பு பூஜைகள் நடைபெறவுள்ள நிலையில், 5 முதல் 6 லட்சம் பக்தா்கள் வருகை தருவா் என்று ஸ்ரீராம ஜென்ம பூமி தீா்த்த ஷேத்திர அறக்கட்டளை தரப்பில் தெரிவிக்கப்பட்டுள்ளது.

அயோத்தியில் ராமா் கோயில் சிறப்பு பூஜைகளில் பங்கேற்கும் முன்பாக, பாதுகாப்புத் துறை அமைச்சா் ராஜ்நாத் சிங்கும், உத்தர பிரதேச முதல்வா் யோகி ஆதித்யநாத்தும் அனுமன்கா்ஹி கோயிலில் வழிபட்டனா்.

அன்னபூரணி கோயிலில் கொடியேற்றம்

அயோத்தி பிராணப் பிரதிஷ்டை இரண்டாம் ஆண்டு தினத்தையொட்டி, அயோத்தியில் ராமா் கோயில் வளாகத்தில் உள்ள அன்னபூரணி கோயில் கோபுர உச்சியில் பாதுகாப்புத் துறை அமைச்சா் ராஜ்நாத் சிங் காவிக் கொடி ஏற்றினாா்.

பின்னா் பேசிய அவா், ‘ஆபரேஷன் சிந்தூா் நடவடிக்கையின்போது ராம பிரானின் மாண்புகளின்படி இந்தியா செயலாற்றியது. ராம பிரானின் நோக்கம், இராவணனை அழிப்பதல்ல; அதா்மத்துக்கு முடிவு கட்டுவதாகும். அதேபோல், பயங்கரவாதிகளுக்கும் அவா்களுக்கு புகலிடம் அளிப்பவா்களுக்கும் பாடம் புகட்டுவதே இந்தியாவின் நோக்கமாக இருந்தது. சநாதன பாரம்பரியங்களை அழிக்க அந்நிய படையெடுப்பாளா்கள் பலமுறை முயன்றனா். இப்போது அயோத்தி கோயிலில் பறக்கும் காவிக்கொடி, நமது பாரம்பரியத்தின் தொடா்ச்சியை பறைசாற்றுகிறது’ என்றாா்.

முன்னதாக, ராமா் கோயில் கட்டுமான நிறைவைக் குறிக்கும் வகையில், அக்கோயிலின் கோபுர உச்சியில் பிரதமா் மோடி கடந்த நவ.25-இல் பிரம்மாண்ட காவிக் கொடியை ஏற்றினாா் என்பது குறிப்பிடத்தக்கது.

பிரதமா் மோடி வாழ்த்து

பிரதமா் மோடி வெளியிட்ட வாழ்த்துப் பதிவில், ‘அயோத்தி பிராணப் பிரதிஷ்டை இரண்டாம் ஆண்டு தினம் நமது நம்பிக்கை - பாரம்பரியங்களின் தெய்வீக விழாவாகும். இந்தப் புனிதமான மற்றும் பரிசுத்தமான தருணத்தில் உள்நாடு, வெளிநாடுகளில் உள்ள ராம பக்தா்கள் அனைவரின் சாா்பிலும் ஸ்ரீராம பிரானின் பொற்பாதங்களைப் பணிந்து வணங்குகிறேன். ராமா் கோயில் கட்டப்பட்டதன் மூலம் ராம பக்தா்களின் 500 ஆண்டு கால லட்சியம் பூா்த்தியானது. ஒழுக்கத்தின் உருவகமான ஸ்ரீராமரிடம் இருந்து கிடைக்கப் பெறும் உத்வேகம், நாட்டு மக்களிடம் சேவை, அா்ப்பணிப்பு, இரக்கத்தின் உணா்வை ஆழப்படுத்த வேண்டும். இது, வளமான-தற்சாா்புமிக்க இந்தியாவை கட்டமைப்பதில் வலுவான அடித்தளமாக அமையும்’ என்று குறிப்பிட்டுள்ளாா்.