சுனிதா கேஜரிவாலுடன் உத்தவ் தாக்கரே சந்திப்பு!

சிவசேனா தலைவர் உத்தவ் தாக்கரே தில்லி முதல்வர் அரவிந்த் கேஜரிவாலின் இல்லத்திற்குச் சென்று அவரது மனைவி சுனிதா கேஜரிவாலைச் சந்தித்தார்.

இந்த சந்திப்பின்போது மகாராஷ்டிர முன்னாள் முதல்வருடன் அவரது மகன் ஆதித்யா தாக்கரே மற்றும் கட்சியின் மூத்த தலைவர் சஞ்சய் ராவத், ஆம் ஆத்மி கட்சியின் மாநிலங்களவை உறுப்பினர்கள் சஞ்சய் சிங், ராகவ் சதா ஆகியோரும் உடனிருந்தனர்.

கேஜரிவாலின் ஆம் ஆத்மி கட்சி மற்றும் உத்தவ் தாக்கரே தலைமையிலான சிவசேனா ஆகிய கட்சிகள் இந்தியா கூட்டணியில் அங்கம் வகிக்கின்றனர்.

மகாராஷ்டிரம், ஹரியாணா மற்றும் ஜார்க்கண்ட் ஆகிய மாநிலங்களில் நடைபெறவுள்ள சட்டமன்றத் தேர்தல்களைக் கருத்தில் கொண்டு, இந்தியா கூட்டணித் தலைவர்களைச் சந்தித்து தேர்தல் வியூகங்களும், முன்னோக்கிச் செல்லும் வழியைப் பற்றியும் விவாதித்து வருகிறார் என்பது குறிப்பிடத்தக்கது.