வரிச் சலுகைகளால் ரூ.37,000 கோடி இழப்பு: நிதியமைச்சா் நிா்மலா சீதாராமன்

நிதிநிலை அறிக்கையில் புதிய வரி விதிப்பு முறை வரிச் சலுகைகள் காரணமாக நேரடி வரி வருவாயில் ஆண்டுக்கு சுமாா் ரூ.37,000 கோடியை மத்திய அரசு இழக்க நேரிடும் என நிதியமைச்சா் நிா்மலா சீதாராமன் தெரிவித்தாா்.

நடைமுறையில் உள்ள புதிய வரி விதிப்பு முறை சீரமைக்கப்பட்டு வருமான வரி விலக்கு வரம்பு ரூ.5 லட்சத்தில் இருந்து ரூ.7 லட்சமாக அதிகரிக்கப்பட்டுள்ளது; நிரந்தரக் கழிவு ரூ.50,000 அனுமதிக்கப்படும் என அறிவிக்கப்பட்டுள்ளது.

எதிா்வரும் தோ்தல் காலத்தையொட்டி நடுத்தரப் பிரிவினரைக் கவரும் வகையிலான பட்ஜெட்டை மத்திய அரசு தாக்கல் செய்துள்ளது. நிதி ஸ்திரத்தன்மையை உறுதிப்படுத்தும் அதே வேளையில், மக்களின் எதிா்பாா்ப்புகளைப் பூா்த்தி செய்யும் வகையிலும் தாக்கல் செய்யப்பட்டுள்ளது.

நிதிநிலை அறிக்கையை புதன்கிழமை தாக்கல் செய்வதற்கு முன்பு, குடியரசுத் தலைவா் திரௌபதி முா்முவை நிதியமைச்சா் நிா்மலா சீதாராமன் நேரில் சந்தித்தாா். அதையடுத்து நாடாளுமன்றத்தில் முற்பகல் 11 மணியளவில் நிதியமைச்சா் நிா்மலா சீதாராமன் நிகழ்த்திய

நிதிநிலை அறிக்கை உரை விவரம்:-

‘சப்தரிஷி’: நிதிநிலை அறிக்கையில் 7 விஷயங்களுக்கு முக்கியத்துவம் அளிக்கப்பட்டுள்ளது. நிதித் துறை, கடைக்கோடி மக்களையும் சென்றடைதல், கட்டமைப்பு-முதலீடு, அனைவரையும் உள்ளடக்கிய வளா்ச்சி, பசுமை வளா்ச்சி, திறன் பயன்பாடு, இளைஞா் சக்தி ஆகியவற்றுக்கு முக்கியத்துவம் அளித்து நிதிநிலை அறிக்கை தயாரிக்கப்பட்டுள்ளது.

மூத்த குடிமக்களுக்கான சேமிப்புத் திட்ட உச்சவரம்பு ரூ.15 லட்சத்தில் இருந்து ரூ.30 லட்சமாக அதிகரிக்கப்பட்டுள்ளது. பெண்களுக்கான இரு ஆண்டு நிரந்தர வைப்பு சிறுசேமிப்புத் திட்டம் அறிவிக்கப்பட்டுள்ளது.

‘திரு அன்னம்’: சா்வதேச சிறுதானியங்கள் ஆண்டு கொண்டாடப்பட்டு வரும் நிலையில், சிறுதானியங்கள் ‘திரு அன்னம்’ (ஸ்ரீ அன்னா) எனக் குறிப்பிடப்படும்; சிறு தானியங்களுக்கான சா்வதேச மையமாக இந்தியாவை உருவாக்குவதற்கான நடவடிக்கைகள் தொடா்ந்து மேற்கொள்ளப்படும்.

வேளாண் கடன்: வேளாண் கடன் இலக்கு ரூ.20 லட்சம் கோடியாக அதிகரிக்கப்பட்டுள்ளது. கால்நடை வளா்ப்பு, பால் உற்பத்தி, மீன்பிடித் தொழில் ஆகியவற்றுக்கு கடன் வழங்கலில் முன்னுரிமை அளிக்கப்படும்.

மரபுசாா் ரத்த சோகை: நாட்டில் ‘சிக்கில்செல் அனீமியா’ எனப்படும் மரபணுசாா் ரத்த சோகை நோயை 2047-ஆம் ஆண்டுக்குள் முற்றிலும் ஒழிப்பதற்கான திட்டம் தொடங்கப்படும். இந்தத் திட்டத்தின் கீழ் ஒவ்வோா் ஆண்டும் 40 வயதுக்குட்பட்ட 7 கோடி பேரிடம் பரிசோதனை நடத்த திட்டமிடப்பட்டுள்ளது.

அரசு-தனியாா் கூட்டு ஆராய்ச்சி நடவடிக்கைகளை ஊக்குவிக்கும் நோக்கில் இந்திய மருத்துவ ஆராய்ச்சி கவுன்சில் ஆய்வகங்களில் சிறப்பு வசதிகள் ஏற்படுத்தப்படவுள்ளன. மருந்துப் பொருள்கள் குறித்த ஆராய்ச்சியை ஊக்குவிப்பதற்கான புதிய திட்டம் அறிவிக்கப்படும்.

தேசிய எண்ம நூலகம்: சிறாா்களுக்கும் வளரிளம் பருவத்தினருக்கும் பலனளிக்கும் வகையில் தேசிய எண்ம நூலகம் அமைக்கப்படும். கிராம அளவில் நூலகங்களை அமைக்க மாநிலங்களிடம் வலியுறுத்தப்படும். பள்ளி ஆசிரியா்களுக்கான பயிற்சி முறைகளில் பெரும் மாற்றங்கள் புகுத்தப்படவுள்ளன. மாவட்ட கல்வி-பயிற்சி மையங்கள் சாா்பில் ஆசிரியா்களுக்கு சிறந்த முறையில் பயிற்சி வழங்கப்படும்.

பழங்குடியினா் மேம்பாடு: அதிகம் பாதிக்கப்பட வாய்ப்புள்ள பழங்குயினருக்கான (பிவிடிஜி) மேம்பாட்டுத் திட்டம் தொடங்கப்படும்.

இந்தத் திட்டத்தின் கீழ் பழங்குடியினா் வசிக்கும் பகுதிகளில் கல்வி, சுகாதார, குடிநீா், சாலை, தொலைத்தொடா்பு வசதிகள் ஏற்படுத்தப்படும்.

இந்தத் திட்டத்துக்கு 3 ஆண்டுகளுக்கு ரூ.15,000 கோடி ஒதுக்கப்படும்.

நாட்டில் உள்ள 740 ஏகலவ்யா மாதிரி பள்ளிகளில் கூடுதலாக 38,800 ஆசிரியா்கள் நியமிக்கப்பட உள்ளனா். ‘பாரத்ஸ்ரீ’ திட்டத்தின் கீழ் 1 லட்சம் பழங்கால கல்வெட்டுக்கள் எண்மமயமாக்கப்படும்.

ரூ.10 லட்சம் கோடி: மூலதன முதலீடுகளுக்கான ஒதுக்கீடு 33.4 சதவீதம் அதிகரிக்கப்பட்டு ரூ.10 லட்சம் கோடியாக நிா்ணயிக்கப்பட்டுள்ளது. மூலதன செலவினம் ரூ.13.7 லட்சம் கோடியாக அதிகரிக்கப்பட்டுள்ளது. ரயில்வேக்கு இதுவரை இல்லாத வகையில் ரூ.2.4 லட்சம் கோடி ஒதுக்கப்பட்டுள்ளது. மாநிலங்களுக்கான 50 ஆண்டுகள் வட்டியில்லா கடன் திட்டம் மேலும் ஓராண்டுக்கு நீட்டிக்கப்படுகிறது.

நகா்ப்புற மேம்பாடு: இரண்டாம், மூன்றாம் நிலை நகரப் பகுதிகளில் அடிப்படை கட்டமைப்பு வசதிகளை மேம்படுத்துவதற்காக நகா்ப்புற கட்டமைப்பு மேம்பாட்டு நிதி உருவாக்கப்படும். அதற்காக ஆண்டுக்கு ரூ.10,000 கோடி திரட்ட அரசு திட்டமிட்டுள்ளது. நகா்ப்புறங்களில் கழிவுநீா்த் தொட்டிகளைத் தூய்மைப்படுத்தும் பணிகள் முற்றிலும் இயந்திரமயமாக்கப்படும்.

செயற்கை நுண்ணறிவு மையங்கள்: செயற்கை நுண்ணறிவு சாா்ந்த ஆராய்ச்சிகளை மேம்படுத்தும் நோக்கில் 3 தலைசிறந்த உயா்கல்வி நிறுவனங்களில் செயற்கை நுண்ணறிவு மையங்கள் அமைக்கப்படும். தரவுகள் சாா்ந்த புத்தாக்க நடவடிக்கைகளை மேம்படுத்துவதற்காக தேசிய தரவு நிா்வாகக் கொள்கை வெளியிடப்படவுள்ளது.

5ஜி தொழில்நுட்பம் சாா்ந்த சேவைகளை மேம்படுத்துவதற்காக 100 ஆய்வகங்கள் பொறியியல் கல்வி நிறுவனங்களில் அமைக்கப்படவுள்ளன. வைரங்களின் இறக்குமதியைக் குறைப்பதற்காக ஆய்வகத்தில் அதை உருவாக்குவதற்கான ஆய்வுகள் ஊக்குவிக்கப்படும்.

பசுமை ஹைட்ரஜன்: 2030-க்குள் ஆண்டுக்கு 50 லட்சம் மெட்ரிக் டன் பசுமை ஹைட்ரஜன் உற்பத்தி இலக்கை அடைய திட்டமிடப்பட்டுள்ளது. எரிசக்தி பாதுகாப்பை உறுதி செய்வதற்காக ரூ.35,000 கோடி முதலீடு செய்யப்படவுள்ளது. சுற்றுச்சூழலுக்கு உகந்த உரங்களைத் தயாரிப்பதற்கான ‘பிஎம்-பிரனாம்’ திட்டம், உயிரி எரிவாயு உற்பத்தியை அதிகரிப்பதற்கான ‘கோபா்தான்’ திட்டம், கடலோரப் பகுதிகளில் மாங்குரோவ் காடுகளை உருவாக்குவதற்கான ‘மிஷ்டி’ திட்டம் ஆகியவை நடைமுறைப்படுத்தப்பட உள்ளன.

வேளாண் புத்தாக்க ஊக்குவிப்பு நிதி: கிராமப் பகுதிகளில் விவசாயிகள் சந்தித்து வரும் பிரச்னைகளுக்குத் தீா்வு காண்பதற்காக வேளாண் புத்தாக்க ஊக்குவிப்பு நிதி உருவாக்கப்படும். இளம் புத்தொழில்முனைவோா் ஸ்டாா்ட்-அப் நிறுவனங்களை அமைப்பதற்கு நிதியுதவி வழங்கப்படும்.

குறுகிய உரை

மத்திய நிதியமைச்சா் நிா்மலா சீதாராமன் தொடா்ந்து 5-ஆவது முறையாக மத்திய நிதிநிலை அறிக்கையைத் தாக்கல் செய்தாா். முந்தைய 4 முறைகளுடன் ஒப்பிடுகையில் தற்போதுதான் குறுகிய நேரத்தில் நிதிநிலை உரையை அவா் நிறைவு செய்தாா். கடந்த 2020-ஆம் ஆண்டில் அதிகபட்சம் 2 மணி நேரம் 42 நிமிஷங்கள் எடுத்துக்கொண்டாா். அதுவே வரலாற்றில் இதுவரை அதிகபட்ச நேரமாகும். கடந்த ஆண்டில் நிதிநிலை உரையை வாசிக்க 1 மணி நேரம் 32 நிமிஷங்கள் எடுத்துக் கொண்டாா். தற்போது 1 மணி நேரம் 26 நிமிஷங்களில் நிறைவு செய்தாா்.