எங்க ஏரியா.. உள்ள வராத.. ஜார்க்கண்ட் எல்லையில் காவல் நிற்கும் பெண்கள்

ராஞ்சி: ஒரு நாட்டுக்குத்தான் எல்லைப் பாதுகாப்பு அவசியம் என்று நினைக்கவேண்டாம். இங்கே ஜார்க்கண்ட் கிராமத்திலும் எல்லைப் பாதுகாப்பை மக்கள் தீவிரமாகக் கருதி, ஒவ்வொரு எல்லையிலும் பெண்கள் காவல் காக்கிறார்கள்.

பிகார் - ஜார்க்கண்ட் எல்லைப் பகுதி கிராமங்களின் ஒவ்வொரு மூளைமுடுக்குகளிலும் அந்தந்த கிராமப் பெண்கள் கையில் தடியுடன், வெளியாட்கள் தங்கள் கிராமத்துக்குள் நுழைந்து உலாவுவதைத் தடுக்கும் வகையில் பாதுகாப்புப் பணியில் ஈடுபட்டுள்ளனர்.

இதையும் படிக்க.. தமிழகத்தில் காலாண்டுத் தேர்வு விடுமுறை எப்போது?

பிகார் மாநிலத்தில் முழு மதுவிலக்கு இருப்பதால், அந்த மாநில கிராமங்களைச் சேர்ந்தவர்கள் அருகிலிருக்கும் ஜார்க்கண்ட்டுக்குள் வந்து கிராமங்களில் இருக்கும் மதுபானக் கடைகளுக்கு படையெடுக்கிறார்கள். இதனால், தங்கள் கிராமங்களில் பல்வேறு இடையூறுகள் ஏற்படுவதால் அதனைத் தடுக்க பெண்களே களத்தில் இறங்கியுள்ளனர்.

பிகாரிலிருந்து மதுவுக்கு அடிமையான ஆண்கள் எங்கள் கிராமத்துக்குள் நுழைவதால் பல இன்னல்கள் ஏற்படுகின்றன. இதனால் பெண்களே அதிகளவில் பாதிக்கப்படுகிறார்கள். இதனைத் தடுக்க பெண்களே தங்கள் கிராமப் பாதுகாப்பை கையிலெடுத்துக் கொண்டுள்ளனர்.

இரவு பகல் பாராமல், பெண்களே தங்களுக்குள் குழு அமைத்து, 24 மணி நேரமும் எல்லையில் கண்காணிப்பை மேற்கொள்கிறார்கள். மதுகுடிக்க வரும் பிகார் குடிமகன்களை, இங்கே மதுபானம் கிடைக்காது என்று கூறி அவர்களே திருப்பி அனுப்பிவிடுகிறார்கள். பெரிய அளவில் பெண்கள் கூட்டம் கையில் கம்புகளுடன் நிற்பதால் வேறு வழியின்றி ஆண்கள் திரும்பிச் சென்று விடுவதாகவும், தற்போது கிராமத்தில் அமைதியாக வாழ்வதாகவும் பெண்கள் கூறுகிறார்கள்.