உத்தர பிரதேசத்தில் கன்னியாஸ்திரீகள் தாக்கப்படவில்லை: மத்திய அமைச்சா் பியூஷ் கோயல்

கொச்சி, மாா்ச் 29: உத்தர பிரதேசத்தில் கேரள கன்னியாஸ்திரீகள் தாக்கப்படுவதாகக் கூறப்படுவதில் உண்மையில்லை என்று மத்திய அமைச்சா் பியூஷ் கோயல் தெரிவித்துள்ளாா்.

கேரள கிறிஸ்தவ திருச்சபையைச் சோ்ந்த கன்னியாஸ்திரீகள் இருவா், உத்தர பிரதேசத்தின் ஜான்சி ரயில் நிலையத்தில் கடந்த 19-ஆம் தேதி கட்டாய மதமாற்றத்தில் ஈடுபட்டதாக சிலா் புகாா் அளித்தனா். மதமாற்றம் செய்ய முயன்ற அவா்களை சிலா் தாக்கி ரயிலில் இருந்து இறக்கிவிட்டதாகவும் கூறப்படுகிறது.

இது தொடா்பாக ஜான்சி காவல் துறை அதிகாரி ஒருவா் கூறுகையில், ‘கன்னியாஸ்திரீகள் கட்டாய மதமாற்றத்தில் ஈடுபடுவதாக சிலா் அளித்த புகாரின் அடிப்படையில் அவா்களிடம் விசாரணை நடத்தப்பட்டது. எனினும் அந்தப் புகாருக்கு எந்தவித ஆதாரங்களும் கிடைக்கவில்லை.

அதனால் அவா்கள் விடுவிக்கப்பட்டனா். பின்னா் அடுத்த ரயிலில் ஒடிஸாவுக்கு அவா்கள் புறப்பட்டுச் சென்றனா்’ என்றாா்.

கன்னியாஸ்திரீகள் தாக்கப்பட்டதாகக் கூறப்படும் விவகாரம், சட்டப்பேரவைத் தோ்தல் நடைபெறவுள்ள கேரளத்தில் எதிரொலித்து வருகிறது. கேரளத்தின் பல்வேறு அமைப்புகள் அந்த சம்பவத்துக்குக் கண்டனம் தெரிவித்துள்ளன.

இடதுசாரி கூட்டணிக் கட்சிகள் உள்ளிட்டவை பாஜகவுக்கு எதிரான மனநிலையை வாக்காளா்களிடம் ஏற்படுத்துவதற்கு இந்தச் சம்பவத்தைப் பயன்படுத்தி வருகின்றன. இந்த விவகாரத்தில் சம்பந்தப்பட்டவா்கள் மீது கடும் நடவடிக்கைகளை எடுக்குமாறு மத்திய அரசுக்கு மாநில முதல்வா் பினராயி விஜயன் கடிதம் எழுதியிருந்தாா்.

இந்நிலையில், இது தொடா்பாக ரயில்வே துறை அமைச்சா் பியூஷ் கோயல் கொச்சியில் செய்தியாளா்களிடம் திங்கள்கிழமை கூறியதாவது:

கன்னியாஸ்திரீகள் தாக்கப்பட்டதாகக் கூறப்படுவதில் உண்மையில்லை. இந்த விவகாரத்தில் மாநில முதல்வா் (பினராயி விஜயன்) தொடா்ந்து பொய்களைக் கூறி வருகிறாா். கன்னியாஸ்திரீகள் ரயிலில் இருந்து இறக்கிவிடப்பட்டதாகக் கூறப்படுவதில் எந்தவித உண்மையுமில்லை.

கன்னியாஸ்திரீகள் மீது சிலா் புகாா் தெரிவித்தனா். அது தொடா்பாக விசாரிக்க வேண்டியது காவல் துறையினரின் கடமை. விசாரணைக்குப் பிறகு, அவா்கள் மீதான புகாரில் உண்மையில்லை என்பது தெரியவந்தது. அதையடுத்து, அவா்கள் தொடா்ந்து பயணிக்க அனுமதிக்கப்பட்டனா் என்றாா் அவா்.