பருவமழை: தமிழகத்தில் வழக்கைத்தைவிட குறைவாக இருக்கும்

புது தில்லி: நடப்பு ஆண்டில் இந்தியா முழுவதும் வழக்கத்தைவிட அதிகமான அளவு பருவமழை பெய்யும் என முன்னறிவிக்கப்பட்டுள்ள நிலையில், தமிழகத்தில் வழக்கத்தைவிட குறைவாக இருக்கும் என கூறப்பட்டுள்ளது.

இந்திய வானிலை ஆய்வு மையம் நடப்பு பயிர் ஆண்டுக்கான (ஜூலை- ஜூன்) வானிலை முன்னறிவிப்புகளை இன்று வெளியிட்டது.

தில்லியில் இன்று நடைபெற்ற நிகழ்ச்சியில் இந்த அறிவிப்புகளை வெளியிட்டு இந்திய வானிலை ஆய்வு மையத்தின் இயக்குநர் லஷ்மன் சிங் ரதோர் பேசியதாவது:

நீண்டகால சராசரி அளவின்படி இந்த ஆண்டு பருவமழை 106 சதவீதமாக இருக்கும். மேலும், பருவமழை நாடு முழுவதும் பரவலாக இருக்கும்.

அதே நேரத்தில் வடகிழக்கு இந்தியாவிலும், தென்கிழக்கு இந்தியாவிலும் குறிப்பாக தமிழ்நாட்டிலும் வழக்கத்தைவிட குறைவான அளவே பருவமழை இருக்கும்.

வறட்சியின் பிடியில் இருக்கும் மகராஷ்டிரம் மாநிலத்தில் நிகழ் ஆண்டில் நல்ல மழைபெய்வதற்கான அறிகுறிகள் தெரிகின்றன என்றார்.

நீண்டகால சராசரி மழை அளவு 90 சதவீதத்துக்கும் குறைவாக இருந்தால் அந்த ஆண்டில் மழை அளவு குறைவாகவே இருக்கும். 90 முதல் 96 சதவீதம் வரை இருந்தால் வழக்கைத்தைவிட குறைவான அளவு இருக்கும் என்றும், 96-104 சதவீதம் வரை இருந்தால் வழக்கமான மழை அளவு இருக்கும் என்றும், 104-110 சதவீதம் வரை இருந்தால் வழக்கைத்தைவிட அதிகமான மழை இருக்கும் என்றும், 110 சதவீதக்குக்கும் மேல் இருந்தால் அதிக அளவு மழை பெய்யும் என்றும் கணக்கிடப்பட்டுள்ளது.

இந்திய உள்நாட்டு உற்பத்தியில் விவசாயம் 15 சதவீதம் அளவுக்கு பங்களிக்கிறது. மேலும், இந்திய மக்கள் தொகையில் 60 சதவீதம் பேர் விவசாயத்தையே நம்பியுள்ளனர்.

கடந்த 2015-16 பயிர் ஆண்டில், பருவமழை குறைவாக இருந்ததால் 10 மாநிலங்கள் வறட்சி பாதிப்பு மாநிலங்களாக பிரகடனப்படுத்தப்பட்டுள்ளன. விவசாயிகளுக்காக மத்திய அரசு ரூ. 10 ஆயிரம் கோடி வரை வறட்சி நிவாரணம் அறிவித்துள்ளது.