நீண்ட நாள்களாக உயர்த்தப்படாமல் இருந்து வந்த பெட்ரோல், டீசல் விலை, அண்மையில் நடந்து முடிந்த 5 மாநிலங்களின் தேர்தல் முடிவுகளுக்குப் பிறகு தொடர்ச்சியாக அதிகரிக்கப்பட்டு வருகிறது.
அந்த வகையில், கடந்த வெள்ளிக்கிழமை அன்று பெட்ரோல், டீசல் விலை 80 காசுகள் உயர்த்தப்பட்டுள்ளது. இது அண்மையில் அறிவிக்கப்பட்ட மூன்றாவது விலை உயர்வு.
இதையடுத்து, தலைநகர் தில்லியில் ஒரு லிட்டர் பெட்ரோல் விலை ரூ.97.01-லிருந்து 97.81-ஆகவும், டீசல் விலை லிட்டர் ரூ.88.27-லிருந்து ரூ.89.07-ஆகவும் உயர்ந்துள்ளது. கடந்த மார்ச் 22-ஆம் தேதியிலிருந்து தொடர்ந்து மூன்று முறை பெட்ரோல், டீசல் விலை உயர்த்தப்பட்டுள்ளது. அந்த வகையில், பெட்ரோல், டீசல் விலை ரூ.2.40 அதிகரித்துள்ளது. எல்பிஜி சமையல் எரிவாயு சிலிண்டர் விலையும் உயர்த்தப்பட்டுள்ளது.
உக்ரைன் மீது ரஷியா படையெடுக்கத் தொடங்கியபோது, கச்சா எண்ணெய் விலை மளமளவென உயர்ந்தது. ஒரு பீப்பாய் கச்சா எண்ணெய் விலை சமீபத்தில் 139 அமெரிக்க டாலரைத் தொட்டது. இதைத் தொடர்ந்து, எண்ணெய் நிறுவனங்கள் பெட்ரோல், டீசல் விலையை உயர்த்தும் நிலைக்குத் தள்ளப்பட்டன. இதன் தாக்கம்தான் அண்மையில் அறிவிக்கப்பட்ட பெட்ரோல், டீசல் விலை உயர்வு எனலாம்.
உக்ரைன் - ரஷியா போர் மேலும் நீடிக்கும் பட்சத்தில் கச்சா எண்ணெய் விலை ஒரு பீப்பாய் 150 டாலரை நெருங்கினாலும் ஆச்சரியப்படுவதற்கு இல்லை என்று ஏற்கெனவே எண்ணெய் சந்தை வட்டாரங்கள் கணித்துள்ளன. மேலும், எப்படி இருந்தாலும் கச்சா எண்ணெய் விலை 75 டாலருக்கு கீழ் குறைவதற்கு வாய்ப்பு இல்லை என்றும் கூறப்பட்டு வருகிறது. உக்ரைன் - ரஷியா போர் தொடங்கியதில் இருந்து கச்சா எண்ணெய் விலை கிட்டத்தட்ட 50% உயர்ந்துள்ளது.
ஆசியா, நிகர எண்ணெய் இறக்குமதியாளராக உள்ளது. எனவே, மிகவும் பாதிக்கப்படக்கூடிய நாடுகளில் ஒன்றôகவும் உள்ளது. ரஷியா உலகின் மிகப்பெரிய எண்ணெய் ஏற்றுமதியாளராக உள்ளது. இதனால், எந்த ஒரு நிலையான விலை உயர்வுகளும் மற்ற நாடுகளின் பொருளாதாரத்தில் கடும் தாக்கத்தை ஏற்படுத்தும்.
தென் கொரியாவில், எரிபொருள் விலை அதிகரித்து வருவதால், பணவீக்கம் ஏற்கெனவே அதன் மத்திய வங்கியின் இலக்கை மீறிவிட்டது. தாய்லாந்து, தன் பணவீக்கம் கடந்த மாதம் 2008-க்குப் பிறகு மிக உயர்ந்தûதக் கண்டது. பிலிப்பின்ஸூம், இந்தோனேசியாவும் விளிம்பில் உள்ளன.
இந்தியா தனது எண்ணெய் தேவையில் 85% இறக்குமதியை நம்பி உள்ளது. இதுவே நாட்டின் பொருளாதாரத்துக்கு பெரும் சவாலாகவும் அமைந்துள்ளது. அமெரிக்க மத்திய வங்கியான ஃபெடரல் ரிசர்வ் வட்டி விகிதத்தை உயர்த்தினால், அது இந்திய சந்தைகளிலிருந்து அந்நிய நிறுவன முதலீட்டாளர்களின் மூலதன வெளியேற்றத்திற்கு வழிவகுக்கும். இதனால், ரூபாயின் மதிப்பு பாதிக்கப்படும். டாலருக்கு நிகரான ரூபாய் 80 என்ற அளவைத் தொடவில்லை என்றாலும், தற்போது ரூ.76க்கு அருகே உள்ளது.
பிப்ரவரி, மார்ச் மாதங்களில் ஐந்து மாநிலங்களின் சட்டப்பேரவைத் தேர்தலுக்கு முன் மக்களிடம் நல்ல பெயர் வாங்க வேண்டும் என்ற எண்ணத்தில் எண்ணெய் நிறுவனங்களின் கையை காலை பிடித்தது மத்திய அரசு. இதனால், தேர்தல் முடிந்தவுடன் பெட்ரோல், டீசல் விலை உயர்த்தப்படாமல் இருந்தது. இப்போது முடிவுகள் வெளியாகிவிட்டன. பெட்ரோல், டீசல் விலை உயர்ந்துவிட்டது. இந்த விலை உயர்வின் பாதிப்பு பணவீக்கத்துக்கு வழி வகுக்கிறது.
இரும்பு, எஃகு, கண்ணாடி போன்ற பல்வேறு பொருள்களின் மூலப் பொருள்களின் விலை இடைவிடாமல் அதிகரித்து வருதையும் காண்கிறோம். கட்டுமான நிறுவனங்களும், ரியல் எஸ்டேட் நிறுவனங்களும் மூலப்பொருள்கள் வாங்குவதை நிறுத்தப் போவதாகவும், இடுப்பொருள் செலவுகள் அதிகமாக இருப்பதால், கட்டுமானப் பணியை நிறுத்தப் போவதாகவும் ஏற்கெனவே எச்சரித்துள்ளன. மேலும், உக்ரைன் - ரஷியா போர், பொருள்களை உற்பத்தியாளர்களும், வர்த்தகர்களும் பதுக்கி வைப்பதற்கும், விலையை உயர்த்துவதற்கும் எளிதான சாக்காக மாறிவிட்டது என்று கட்டடத் தொழிலாளர் சங்கங்கள் எச்சரித்துள்ளன. இந்த நிலையில், பொருள்களின் விலையை விழிப்புடன் கண்காத்து நுகர்வோரைப் பாதுகாக்க வேண்டியது அரசின் கடமையாகும்.
கச்சா எண்ணெய் விலையில் ஒவ்வொரு டாலர் உயரும்போதும், பெட்ரோல், டீசலின் விலை லிட்டருக்கு 50 காசுகள் உயர்த்தப்பகிறது என்று எண்ணெய் துறை வட்டாரங்கள் தெரிவிக்கின்றன. மேலும், கச்சா எண்ணெய் விலை உயர்வைச் சமாளிக்கும் வகையில், வரும் நாள்களில் எரிபொருள் விலை லிட்டருக்கு ரூ.20 வரை உயரக்கூடும் என்றும் சொல்லப்படுகிறது. இது ஏழைகளை அச்சுறுத்தும் செய்தி.
விலை உயர்விலிருந்து மக்களைப் பாதுகாக்க வேண்டும் என்றால், அரசு மென்மையான போக்கை கடைப்பிடித்து முன்டியான நடவடிக்கைகளை எடுக்க வேண்டும். பெட்ரோல் சில்லறை விலையில் மத்திய வரிகள் மற்றும் உள்ளூர் மதிப்புக் கூட்டு வரி (வாட்) ஆகியவை தற்போது 50% ஆகவும் டீசல் மீது 40%-ஆகவும் உள்ளன. இந்த நிலையில், எரிபொருள்களின் மீதான வரி விதிப்பை அரசு மறுசீரமைப்பு செய்ய வேண்டியது மிகவும் அவசியம்.
எரிபொருள் மீதான கலால் வரியைக் குறைக்க அரசு உடனடியாக நடவடிக்கை எடுக்க வேண்டும் என்பதே அனைத்துத் தரப்பினரின் எதிர்பார்ப்பாக உள்ளது!
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads, Arattai, Google News
உடனுக்குடன் செய்திகளை அறிய தினமணி App பதிவிறக்கம் செய்யவும்.
டிரெண்டிங்
வீடியோக்கள்
தினமணி வீடியோ செய்தி...
தினமணி வீடியோ செய்தி...
தினமணி வீடியோ செய்தி...
தினமணி வீடியோ செய்தி...
செய்தி மடல்
இ-பேப்பர்