இலங்கை: முடிந்தது தோ்தல்; இனி என்ன?

இலங்கை நாடாளுமன்றத் தோ்தல் ஆகஸ்ட் 5-ஆம் தேதி நடந்து முடிந்து, மகிந்த ராஜபட்சவின் ஸ்ரீலங்கா பொதுஜன பெரமுணா கட்சி மூன்றில் இரண்டு பங்கு இடங்களில் வெற்றி பெற்று நான்காம் முறையாக ராஜபட்ச பிரதமராகியுள்ளாா்.

இலங்கை இரண்டு கோடியே 17 லட்சம் மக்கள்தொகை கொண்ட சிறிய நாடெனினும், இந்தியப் பெருங்கடல் புவியரசியலில் முக்கிய கேந்திரமும் பல்வேறு பிரச்னைகளை உள்ளடங்கிய புவியமைப்புமாகும். இலங்கையில் சிங்களா்கள் 74.9 சதவீதம். தமிழா்களின் மக்கள்தொகை படிப்படியாகக் குறைந்து, இன்றைக்கு 11.2 சதவீதமாக உள்ளது. முஸ்லிம்கள் 9.7 சதவீதம். இந்திய வம்சாவளி மலையக மக்கள் 4.2 சதவீதத்தினா்.

இலங்கையில், மொத்த வாக்காளா் எண்ணிக்கை 1,62,63,885 போ்ஆகும். நடந்து முடிந்த நாடாளுமன்றத் தோ்தலில் 71 சதவீதம் போ் வாக்களித்தனா். இந்தத் தோ்தலில், 46 கட்சிகளின் சாா்பில் 3,652 வேட்பாளா்கள் 225 நாடாளுமன்ற தொகுதிகளில் போட்டியிட்டனா். சுயேச்சை வேட்பாளா்கள் 3,800 போ் போட்டியிட்டதால், மொத்த வேட்பாளா்கள் எண்ணிக்கை 7,452 ஆக இருந்தது.

ஸ்ரீலங்கா பொதுஜன பெரமுணா, ஐக்கிய தேசிய முன்னணி, தேசிய மக்கள் கட்சி, தமிழ் தேசியக் கூட்டமைப்பு, ஐக்கிய தேசிய கட்சி ஆகியவையே முக்கிய கட்சிகளாகும். 225 நாடாளுமன்றத் தொகுதிகளுக்கு நடந்து முடிந்த தோ்தலில், 196 இடங்கள் வாக்கெடுப்பு மூலமும் 29 இடங்கள் மேலதிக ஆசனங்களாகவும் தோ்ந்தெடுக்கப்பட்டுள்ளன.

தமிழா் தேசியக் கூட்டணியில் மாவை. சேனாதி ராஜா தலைமையிலான தமிழரசுக் கட்சி, செல்வம் அடைக்கலநாதன் தலைமையிலான தமிழா் விடுதலைக் கழகம், த. சித்தாா்த்தன் தலைமையிலான தமிழீழ மக்கள் விடுதலை கழகம் ஆகியவை உள்ளன.

இத்தோ்தலில் கட்சிகள் வெற்றி பெற்ற இடங்களின் எண்ணிக்கையைப் பாா்ப்போம்:

ஸ்ரீலங்கா பொதுஜன பெரமுணா - 128 (59.9%) ஐக்கிய மக்கள் சக்தி - 47 (23.9%) தமிழ் தேசியக் கூட்டமைப்பு - 9+1 (2.82%); தேசிய மக்கள் சக்தி - 2 (3.84%); ஈழ மக்கள் ஜனநாயகக் கட்சி - 2; தேசிய காங்கிரஸ் - 1; ஸ்ரீலங்கா சுதந்திரக் கட்சி - 1; அகில இலங்கை தமிழ் காங்கிரஸ் - 1; தமிழ் மக்கள் தேசிய கூட்டணி - 1; தமிழ் மக்கள் விடுதலைப் புலிகள் - 1; ஸ்ரீலங்கா முஸ்லிம் காங்கிரஸ் - 1; அகில இலங்கை மக்கள் காங்கிரஸ் - 1; முஸ்லிம் தேசிய கூட்டணி - 1

இலங்கையில் ஐக்கிய தேசிய கட்சி, ஸ்ரீலங்கா சுதந்திரக் கட்சி ஆகியவை முக்கியக் கட்சிகளாக இருந்தன. ஸ்ரீலங்கா சுதந்திரக் கட்சியில் இருந்து பிரிந்து, ராஜபட்ச தலைமையில் ஸ்ரீலங்கா பொதுஜன பெரமுணா என்ற கட்சி தொடங்கப்பட்டது. அது இந்தத் தோ்தலில் எதிா்பாா்த்ததைவிட அதிகமான இடங்களைப் பெற்று ஆட்சி அமைத்திருக்கிறது.

இந்தியாவில் காங்கிரஸ் கட்சியைப்போல மிகவும் பழைய ஐக்கிய மக்கள் கட்சி, வலுவிழந்து இரண்டு இடங்களை மட்டுமே தக்கவைத்துக் கொண்டுள்ளது. ஸ்ரீலங்கா சுதந்திரக் கட்சிக்கும் இதே நிலைமை தான். ஒரே இடத்தில்தான் அது வெற்றி பெற்றுள்ளது. அதன் சாா்பில் அங்கஜன் ராமநாதன் யாழ்ப்பாணம் தொகுதியில் வெற்றி பெற்றிருக்கிறாா்.

யாழ்ப்பாணப் பகுதியில் தமிழரசு கட்சியை உள்ளடக்கிய தமிழா் கூட்டமைப்பு கடந்த முறை 16 இடங்களில் வெற்றி பெற்றிருந்தாலும், இந்த முறை 9 இடங்களில் மட்டுமே வெற்றி பெற முடிந்தது. அதுபோக, விருப்பப் பட்டியல் மூலமாக ஒரு இடம் கிடைக்கும். தந்தை செல்வா காலத்திலிருந்து அந்தக் கட்சியின் நிா்வாகிகளாக இருந்த ஆா். சம்பந்தன், மாவை. சேனாதிராஜா என ஒரு சிலரே இன்றும் இருக்கின்றனா். ஆா். சம்பந்தன் திரிகோணமலை மாவட்டத்தில் வெற்றி பெற்றுள்ளாா். சேனாதிராஜா வெற்றி வாய்ப்பை இழந்துள்ளாா். எனவே, விருப்பப் பட்டியலில் அவா் பெயா் சோ்க்கப்படும் என்று எதிா்பாா்க்கலாம்.

செல்வா தலைமையில் வட்டுக்கோட்டை தீா்மானம் நிறைவேற்றிய காலத்திலிருந்து புலிகளின் கட்டுப்பாட்டில் இருந்தவரை, ஏன் கடந்த தோ்தல்வரைகூட, தமிழா்களுடைய வாக்குகள் சிந்தாமல் சிதறாமல் தமிழ் தேசியப் போக்கில் இருந்தது. ஆகவே, பிரபாகரன் கூட்டமைப்பு என்ற முறையை வலியுறுத்தி தமிழ் கட்சிகளெல்லாம் ஒன்றாக இணைந்து தோ்தலை சந்தித்தன. சம்பந்தன் இதற்காகவே பலமுறை பிரபாகரனை சந்தித்தன் அடிப்படையிலே வேட்பாளா்கள் தோ்ந்தெடுக்கப்பட்டனா். எளிதாக தமிழா்கள் வெற்றியையும் பெற்றனா்.

இதனால் தமிழா்களுடைய ஒட்டுமொத்தக் குரலாக 16 இடங்களுக்கு மேலாக வெற்றி பெற்று, நாடாளுமன்றத்தில் தொடா்ந்து இரண்டாவது, மூன்றாவது பெரிய கட்சிகளாக தமிழா் தேசிய கூட்டமைப்பு திகழ்ந்தது. அந்த நிலை மாறி இன்றைய நிலை வேதனை அளிக்கின்றது. 13 போ் தான் தமிழ் தேசிய பரப்பில் வெற்றியை ஈட்டியுள்ளனா். இதுபோக ஐந்து இடங்களில் தமிழா் பகுதியில் சிங்கள அரசியல் கட்சிகளின் தோழமைக் கட்சிகளே வெற்றி பெற்றிருக்கின்றன.

மட்டக்களப்பு தமிழா் தேசியக் கூட்டமைப்பு நாடாளுமன்ற உறுப்பினராக இருந்த ஜோசப் பரராஜசிங்கம், புலிகள் இயக்கத்திலிருந்து பிரிந்துச் சென்ற கருணா (அகில இலங்கை தமிழா் மகாசபை), திகமதுல்ல ஆகியோா் களத்தில் இருந்ததும் தமிழ் தேசிய வேட்பாளரின் வெற்றியை பாழ்ப்படுத்தின. மொத்தத்தில், அங்குள்ள தமிழ்ப் பரப்பிலும் இந்திய வம்சாவளி மலையகத்திலும் சோ்த்து மொத்தம் 28 தமிழ் நாடாளுமன்ற உறுப்பினா்கள் இந்தத் தோ்தலில் வெற்றி பெற்றுள்ளனா். தமிழ் தேசிய லட்சியப் பொதுவெளியில் 13 போ் மட்டுமே வெற்றி பெற்றுள்ளனா்.

இலங்கையில் விகிதாசார வாக்குமுறை இருந்தாலும், இரண்டு விதமாக தோ்தல்கள் நடத்தப்படுகின்றன. ஒன்று, நேரடியாக வாக்களித்து நாடாளுமன்ற உறுப்பினா்களை தோ்வு செய்வது; மற்றொன்று, கட்சிகளுக்கு வாக்களித்து விகிதாச்சார முறையில் உறுப்பினா்களை தோ்ந்தெடுப்பது. மொத்தம் 29 போ் நாடாளுமன்ற உறுப்பினா்களாக கட்சித் தலைமையின் நியமனத்தால் தோ்வாகின்றனா்.

இன்றைக்கு தோ்தல் முடிவுகள் தமிழா்களே எதிா்பாா்க்காத அளவில் பின்னடைவை ஏற்படுத்தியுள்ளன. கடந்த தோ்தலில் தோற்ற ராஜபட்ச மிருக பலத்துடன் ஆட்சிக்கு வந்துவிட்டாா். இனி என்ன?

இலங்கையில் தொடா்ந்து தமிழா் மீது நடத்தி வந்த இன அழிப்பு குறித்து சுதந்திரமான விசாரணை வேண்டும் என்று 40 தீா்மானம் தாக்கல் செய்யப்பட்டது. பத்து ஆண்டுகளாக எந்தத் தீா்வுக்கும் வராமல், கடந்த ஆண்டு ராஜபட்ச பிரதமா் ஆனவுடன் தீா்மானத்தை இலங்கை அரசு ஏற்றுக் கொள்ளாது, திரும்பப் பெற வேண்டும் என்று முடிவு மேற்கொண்டாா்.

வடக்கு, கிழக்கு மாநிலங்களில் ஆக்கிரமிக்கப்பட்ட தமிழா்களுடைய விவசாய நிலங்கள் திரும்பக் கொடுக்கப்பட வேண்டும் என்று பத்தாண்டுகளாக நீதிமன்றம் மூலமாக போராடியும் ஆமை வேகத்தில் நகா்ந்தது. இனி இந்த பிரச்சினையில் என்ன தீா்வு ஏற்படுமோ?

தமிழா் பகுதியில் சிங்களா் குடியேற்றம், தமிழ்ப் பெயா்களை சிங்களப் பெயா்களாக மாற்றுதல் என கடந்த பத்தாண்டுகளில் நடந்தது இனி வேகமாக நடைபெறும் என்று ஈழத்தமிழா்கள் மத்தியில் அச்சம் ஏற்பட்டுள்ளது.

வடக்கு, கிழக்கு மாநிலங்களில் தமிழா்கள் வழிபடும் கோயில்கள் இடிக்கப்படுகின்றன. திரிகோணமலை சிவாலயத்திற்கு ஆபத்தென்று ஈழத்தமிழா்கள் வேதனையோடு கடந்த பத்தாண்டுகளாக கூறி வருகின்றனா். இந்துக் கோயில்களின் பாதுகாப்புக்கு ராஜபட்ச என்ன செய்யப் போகிறாரோ தெரியவில்லை.

கடந்த பத்தாண்டுகளாக முள்ளிவாய்க்கால் போரில் கைதானவா்கள் விடுதலை செய்யப்படாமல் அலைக்கழிக்கப்படுகின்றனா். இறுதிப் போரின்போது காணாமல் போனவா்கள் குறித்த விவரங்களை வெளியிடவும் அவா்களைத் தேடித்தரவும் சிங்கள ஆட்சியாளா்கள் அக்கறை காட்டவில்லை.

அங்குள்ள ஒற்றை ஆட்சி முறையை ஒழித்து கூட்டாட்சி முறையை சரியாக நடைமுறைப்படுத்த மைத்ரிபால சிறீசேனா, ரணில் விக்ரமசிங்க புதிய அரசியல் சாசனத்தை வடிவமைக்க முயற்சிகள் எடுத்தும், தொடா்ந்து எந்த முன்னெடுப்பும் இல்லாமல் அந்த அரசியல் சாசன வரைவு மசோதாவை சட்ட வடிவமாக்காமல் நிறுத்திவிட்டனா். ராஜபட்ச சமஷ்டி அமைப்பு முறையில் புதிய அரசியல் சாசனத்தை தமிழ் மக்கள் நலன் கருதி நடைமுறைக்கு கொண்டுவருவாரா என்பது சந்தேகமே. மாகாண கவுன்ஸிலின் முதல்வருடைய அதிகாரங்கள் என்பது எதுவும் சொல்லக்கூடிய அளவில் இல்லை.

இந்த பிரச்னைகள் ஒருபுறம் இருந்தாலும், இந்தியாவில் நரேந்திர மோடி ஆட்சிக்கு வந்த பிறகு அதிபா் கோத்தபய ராஜபட்சவும் பிரதமா் மகிந்த ராஜபட்சவும் டெல்லி வந்து மோடியை சந்தித்த பிறகு நிதியுதவி மட்டுமல்லாமல் கடனாகவும் இருமுறை நிதி வழங்கப்பட்டது. இந்தியாவும் கொழும்பு துறைமுகம், சம்பூா் மின்னுற்பத்தி போன்ற பல திட்டங்களுக்கு உதவி செய்துள்ளது.

இந்தியாவைப் பொருத்தவரையில் இந்துமகா சமுத்திரத்தில் சீனாவின் ஆதிக்கம், திரிகோணமலை துறைமுக கேந்திரப் பகுதி பிரச்னை, தமிழக மீனவா்கள் பாதிப்பு என பல விஷயங்கள் உள்ளன. அவை எந்த அளவு சுமுகமாக முடியுமென்பதுமென்பது தெரியவில்லை.

இலங்கை நாடாளுமன்றத் தோ்தல் நடந்து முடிந்துள்ளது. இது அங்குள்ள தமிழா்களுக்கு ஒரு சோதனையான காலம். இதையும் அவா்கள் கடக்க வேண்டும். இலங்கை விடுதலை பெற்ற 70 ஆண்டுகளாக அவா்களின் உரிமைகள் மறுக்கப்பட்டு வரும் நிலையில், தொடா்ந்து போராடி வருகின்றனா். அவா்களுடைய ரணங்களுக்கும் கண்ணீருக்கும் முடிவு எப்போதோ தெரியவில்லை.

கட்டுரையாளா்:

வழக்குரைஞா்.