நடிகர் ஆர்யாதான் 'எங்க வீட்டு மாப்பிள்ளை’என்று சொல்பவர் யார்?

பல நடிகர்கள் சின்னத் திரையில் அறிமுகமாகி பிரபலம் ஆனதும் வெள்ளித் திரைக்கு வருவார்கள். விஜய் சேதுபதி. மாதவன், பாலிவுட்டில் ஷாருக்கான் என பலர் முதலில் சீரியலில் நடித்த பின் சினிமாவில் நடித்தார்கள். போலவே சினிமாவிலிருந்து சின்னத் திரைத் தொடர்களில் நடித்துக் கொண்டிருப்பவர்கள் ராதிகா, ரேவதி உள்ளிட்ட பல நடிகைகளைச் சொல்லலாம். இந்த வரிசையில் அண்மையில் இணைந்திருப்பது நடிகர் ஆர்யா.

சில மாதங்களுக்கு முன்பு, என்னை திருமணம் செய்து கொள்ள ஆர்வமுள்ள பெண்கள் விண்ணப்பிக்கலாம் என்று ஒரு அதிரடி விளம்பரத்தை விடியோவாக தனது டிவிட்டரில் வெளியிட்டிருந்தார் ஆர்யா. முதலில் இது ஒரு படத்துக்கான பப்ளிசிட்டி என்றுதான் அனைவரும் நினைத்தார்கள். ஆனால் இதுவொரு சானல் ப்ரமோ என்று பின்னர் தெரிந்தது. பிப்ரவரி 19-ம் தேதி ஒளிபரப்பாகவிருக்கும் கலர்ஸ் சானலின் 'எங்க வீட்டு மாப்பிள்ளை’ எனும் சீரியலுக்கான விளம்பரம்தான் அது.  கோலிவுட்டின் மோஸ்ட் எலிஜிபிள் பேச்சுலரான ஆர்யாவுக்கு நிறைய விண்ணப்பங்கள் வந்து குவிந்தன.

நடிகர் ஆர்யாவை திருமணம் செய்து கொள்ள விரும்புவதாக விண்ணப்பித்த பெண்களில் 16 பேரை தேர்ந்தெடுத்துள்ளது கலர்ஸ் சானல். அவர்கள் தயாரிக்கவிருக்கும் சீரியலில் ஆர்யாவுடன் இந்த 16 பெண்களும் நடிக்கவிருக்கிறார்களாம். வரும் பிப்ரவரி 19-ம் தேதி முதல் கலர்ஸ் டிவியில் இத்தொடர் ஒளிபரப்பாகும். வழக்கமாக இருக்கும் சீரியல்கள் போல் இல்லாமல், தரமான கதையம்சம் கொண்ட சீரியல்களை தயாரிக்க இந்தச் சானல் முடிவெடுத்துள்ளது என்ற தகவலும் வெளிவந்துள்ளது.

சீரியலில் தன்னுடன் நடிக்கவிருக்கும் அந்த 16 பெண்களில் ஒருவரைத்தான் ஆர்யா திருமணம் செய்து கொள்வார் என்றும் கூறப்படுகிறது. ஆனால் இதுகுறித்த அதிகாரபூர்வமான தகவல் எதுவும் வெளிவரவில்லை. நடிகர் ஆர்யா தற்போது ஸ்டுடியோ கிரீன் தயாரித்து வரும் கஜினிகாந்த் என்ற படத்தில் நடித்து வருகிறார்.