1050 திரையரங்குகளில் 50 நாள்கள்: பாகுபலி 2 மகத்தான சாதனை!

இது பல தீபாவளிகளைக் கடந்து ஓடிய படங்களின் சாதனைக்கு நிகரானது. இன்னும் சொல்லப்போனால் அதற்கும் மேலானது.

பாகுபலி 2 படம் நேற்றுடன் தனது 50-வது நாளைப் பூர்த்தி செய்தது. இந்தியா முழுக்க தெலுங்கு, தமிழ், ஹிந்தி, மலையாளம் என நான்கு மொழிகளில் வெளியான இந்தப் படம் 1050 திரையரங்குகளில் தனது 50-வது நாளைக் கடந்துள்ளது. ஏப்ரல் 28 அன்று வெளியான பாகுபலி 2, இந்தியாவில் மட்டும் 9,000 திரையரங்குகளில் வெளியானது.

இந்தியத் திரையுலகில் வேறெந்தப் படமும் இத்தகைய சாதனையைச் செய்ததில்லை. வெளியான அனைத்து மொழிகளிலும் பல கோடி வசூலை அள்ளியதால் இந்தச் சாதனை சாத்தியமாகியுள்ளது.

பிரபாஸ், ராணா டகுபதி, அனுஷ்கா, தமன்னா, சத்யராஜ், ரம்யா கிருஷ்ணன் போன்றோர் நடிப்பில் தெலுங்கு, தமிழ், மலையாளம், ஹிந்தி ஆகிய மொழிகளில் உருவாகியுள்ள படம் - 'பாகுபலி தி கன்க்ளூஷன்’ (பாகுபலி 2). இதுவரை ரூ. 1500 கோடிக்கும் அதிகமாக வசூல் செய்துள்ளது.

இந்தியாவில் ஹிந்தி பாகுபலி 2 படம் ரூ. 500 கோடி வசூலித்து சாதனை படைத்துள்ளது. இதற்கு முன்பு எந்தவொரு ஹிந்திப் படமும் இந்தியாவில் ரூ. 400 கோடி கூட வசூலித்தது கிடையாது. இந்நிலையில் ஹிந்தி பாகுபலி 2-வின் வசூல் ரூ. 500 கோடியைத் தாண்டி மகத்தான சாதனை புரிந்துள்ளது.

பாகுபலி 2 (ஹிந்தி) வசூல்

முதல் வாரம்: ரூ. 247 கோடி 
2-ம் வாரம்: ரூ. 143.25 கோடி 
3-ம் வாரம்: ரூ. 69.75 கோடி 
4-ம் வாரம்: ரூ. 29.40 கோடி 
5-ம் வாரம்: ரூ. 11.78 கோடி 
6-ம் வாரம்: ரூ. 5.35 கோடி 

மொத்த வசூல்: ரூ. 506.53 கோடி 

பாகுபலி 2 (ஹிந்தி) இந்தியாவில் நிகழ்த்திய சாதனைகள் 

ரூ. 100 கோடி: 3-வது நாள் 
ரூ. 200 கோடி: 6-வது நாள் 
ரூ. 300 கோடி: 10-வது நாள்
ரூ. 400 கோடி: 15-வது நாள்
ரூ. 450 கோடி: 20-வது நாள்
ரூ. 475 கோடி: 24-வது நாள்
ரூ. 500 கோடி: 34-வது நாள்

பாலிவுட்டில் சாதனை நிகழ்த்திய படங்கள்

முதல் ரூ. 100 கோடி படம்: கஜினி (2008)
ரூ. 200 கோடி: 3 இடியட்ஸ் (2009)
ரூ. 300 கோடி: பிகே (2014)
ரூ. 400 கோடி: பாகுபலி 2 (ஹிந்தி)
ரூ. 500 கோடி: பாகுபலி 2 (ஹிந்தி)