ரஜினி படத்தின் தலைப்பில் சர்ச்சை: அடுத்து என்ன நடக்கும்?

ரஞ்சித் இயக்கத்தில் ரஜினி, ராதிகா ஆப்தே நடிக்கும் படத்துக்கு கபாலி என்று பெயரிடப்பட்டுள்ளது. இத்தகவலை இயக்குநர் ரஞ்சித் நேற்று அறிவித்தார். இந்நிலையில், கபாலி படத்தின் தலைப்பில் சர்ச்சை உருவாகியுள்ளது.

ஏற்கெனவே புதுமுகங்களைக் கொண்டு கபாலி என்றொரு படம் உருவாகி வருகிறது. 2012-ல் இதன் இசை வெளியீட்டு விழாவும் நடைபெற்றுள்ளது. இந்தப் படத்தைத் தயாரிக்கும் சிவா பிக்சர்ஸ் தரப்பில் கூறும்போது: இன்னும் 6 நாள்களில் படப்பிடிப்பு முடிந்துவிடும். இந்த நிலையில் ரஜினி படத்துக்கும் கபாலி என்று தலைப்பு வைக்கப்பட்டுள்ளது. 6 மாத காலமாக தலைப்பைப் புதுப்பிக்க முயற்சி செய்தபோது தேர்தல் வேலை இருப்பதாக அலைக்கழித்தார்கள் என்று தெரிவித்தார்கள்.

கில்ட், பிலிம் சேம்பர், தயாரிப்பாளர் சங்கம் என மூன்று இடங்களில் ஒரு படத்தின் தலைப்பைப் பதிவு செய்யலாம். புதுப்பிக்கலாம். கபாலி படத்தலைப்பை சிவா பிக்சர்ஸ் தயாரிப்பாளர் சிவக்குமார் புதுப்பிக்காமல் போனதால் தயாரிப்பாளர் வி. தாணு வி. கிரியேசன்ஸ் சார்பில் பதிவு செய்துவிட்டார். அதுதான் புதுச்சிக்கலை உருவாக்கியுள்ளது.

ரசிகர்கள் மத்தியில் கபாலி என்கிற தலைப்பை அறிவித்துவிட்டதால் அதை இனி மாற்றமுடியாது. எனவே ரஜினி ரசிகர்களுக்காக தயாரிப்பாளர் சிவக்குமார் தனது படத்தின் தலைப்பை மாற்றவேண்டும் என்கிற கோரிக்கை எழுந்துள்ளது. ஆனால் கபாலி என்கிற தலைப்பை வைத்து இசைவெளியீட்டு விழா வரை நடத்தி முடித்தபிறகு எப்படி மாற்றமுடியும் என்று சிவா பிக்சர்ஸ் சார்பில் சொல்லப்படுகிறது.

ஆனால், கபாலி தலைப்பைப் புதுப்பிக்காதது சிவக்குமாரின் தவறு என்பதாலும் பதிவு செய்யாத ஒரு தலைப்பைத்தான் ரஞ்சித் தேர்ந்தெடுத்துள்ளார் என்பதாலும் இனி கபாலி என்கிற தலைப்பு ரஜினி படத்துக்கானது என்றே சொல்கிறார்கள். மேலும் புதுமுகங்கள் நடிக்கும் படம் என்பதால் படத்தலைப்பை மாற்றினால் பெரிய பாதிப்பு வராது என்பதால் இனியும் கபாலி தலைப்பு தொடர்பாக புதிதாக சர்ச்சைகள் எதுவும் எழாது என எதிர்பார்க்கப்படுகிறது.