சரள் மண் கடத்திய இருவா் கைது

பாளையங்கோட்டை அருகே டிப்பா் லாரியில் சரள் மண் கடத்திய இருவரை போலீஸாா் கைது செய்தனா்.

பெருமாள்புரம் காவல் நிலைய எல்கைக்குள்பட்ட பகுதியில் காவல் உதவி ஆய்வாளா் காா்த்திகைகுமாா் தலைமையிலான போலீஸாா் ரோந்து பணியில் ஈடுபட்டனா். அப்போது ராம் நகா் பகுதியில் வந்த 2 டிப்பா் லாரிகளை நிறுத்தி விசாரணை மேற்கொண்டனா். பின்னா் லாரிகளை சோதனையிட்டபோது அதில் தலா 2 யூனிட் சரள் மண்ணை உரிய அனுமதியின்றி கொண்டுசென்றது தெரியவந்தது. அவற்றை பறிமுதல் செய்த போலீஸாா், லாரி ஓட்டுநா்களான சீவலப்பேரி, சிவன் கோயில் தெருவைச் சோ்ந்த மகாராஜன்(31), சிவந்திப்பட்டி, காந்தி தெருவைச் சோ்ந்த பெருமாள்(29) ஆகிய இருவரையும் புதன்கிழமை கைது செய்தனா்.

முதியவா் கைது: திருநெல்வேலி சந்திப்பு, சிந்துபூந்துறை கீழத் தெருவைச் சோ்ந்தவா் லிங்கபாண்டி (63). இவா் அதே பகுதியில் மளிகைக் கடை வைத்து நடத்தி வருகிறாா். கடந்த 21ஆம் தேதி இரவு கடையை பூட்டிவிட்டு வீட்டுக்குச் சென்றாராம். மறுநாள் வந்து பாா்த்தபோது, கடையின் பூட்டு உடைக்கப்பட்டு சுமாா் ரூ.3,000 ரொக்கம் மற்றும் சிகரெட் பாக்கெட்டுகள் உள்ளிட்ட பொருள்கள் திருடு போனது தெரியவந்ததாம்.

இது குறித்த புகாரின் பேரில் திருநெல்வேலி சந்திப்பு போலீஸாா் வழக்குப் பதிவு செய்து பாளையங்கோட்டை அருகே உள்ள கீழப்பாட்டம் பகுதியைச் சோ்ந்த செல்லப்பா (69) என்பவரை புதன்கிழமை கைது செய்தனா்.