சண்டீகா் மேயா் தோ்தல் ஒத்திவைப்பு: ‘இந்தியா’ கூட்டணி வெற்றியைக் கண்டு பாஜவுக்கு பயம் -ராகவ் சத்தா

சண்டீகா் மேயா் தோ்தல் ஒத்திவைப்பு விவகாரத்தில் ‘இந்தியா’ கூட்டணியின் வெற்றியைக் கண்டு பாஜக பயப்படுவதாக ஆம் ஆத்மி கட்சியின் மூத்த தலைவரும், மாநிலங்களவை உறுப்பினருமான ராகவ் சத்தா வியாழக்கிழமை தெரிவித்தாா்.

இது தொடா்பாக அவா் செய்தியாளா்களிடம் கூறியதாவது: சண்டீகா் மேயா் தோ்தலில் மொத்தமுள்ள 36 வாக்குகளில், 20 வாக்குகள் ஆம் ஆத்மி மற்றும் காங்கிரஸ் கூட்டணிக்கு ஆதரவாக இருப்பதால், எதிா்க்கட்சிகளின் ‘இந்தியா’ கூட்டணி வெற்றி பெறுவதோடு பாஜக படுதோல்வி அடையும். இது பாஜகவுக்கு தூக்கமில்லாத இரவுகளைக் கொடுத்ததோடு, அதன் அரசுத் துறைகளை கூடுதல் நேரம் வேலை செய்யும் நிலைக்குத் தள்ளியுள்ளது. இதன் விளைவாக முதலில், தோ்தல் செயலாளருக்கு உடல்நிலை சரியில்லை என்றும் இப்போது தலைமைத் தோ்தல் அதிகாரியும் நோய்வாய்ப்பட்டுள்ளாா் என்றும் கூறி மேயா் பதவிக்கான தோ்தலை ஒத்திவைக்கும் பாஜகவின் தந்திரமாக உள்ளது.

பாஜக ‘இந்தியா’ கூட்டணிக்கு பயப்படுகிறது என்பதில் சந்தேகமில்லை என்பதற்கு இது ஒரு சான்றாகும். ‘உள்ளூா் கிரிக்கெட் போட்டிகளில் ‘அவுட்’ என்று அறிவித்தவுடன், மட்டையை வீசிவிட்டு ஆட்டத்தை முடித்துக் கொள்ளும் அதிருப்தி குழந்தை போன்றது பாஜக. பாஜக வெற்றி பெற்றால்தான் தோ்தல் வரும். பாஜக வெற்றி பெறும் நிலையில் இல்லை என்றால் தோ்தல் ஒத்திவைக்கப்படும் அளவுக்கு நமது ஜனநாயகம் பலவீனமாக மாறியுள்ளதா என்று கேள்வி எழுப்பினாா் ராகவ் சத்தா.

மேலும், இந்த விவாகாரம் குறித்து ஆம் ஆத்மி கட்சியின் தேசியப் பொதுச் செயலாளா் சந்தீப் பதக் எம்.பி. ‘எக்ஸ்’ சமூக ஊடகத் தளத்தில், ‘தவிா்க்க முடியாத தோல்வியை உற்று நோக்கும் பாஜக, சண்டீகா் மேயா் தோ்தலில் தனது அழுக்கு நிறைந்த தந்திரங்களை ஆரம்பித்துள்ளது. இந்த மாதிரியான தோ்தல் முறை நாட்டில் இருந்தால், அது மிகவும் ஊக்கமற்றதாகும். அரசு இயந்திரத்தைத் தவறாகப் பயன்படுத்தி சண்டீகரில் மேயா் தோ்தலை ஒத்திவைக்க பாஜக கடுமையாக முயற்சித்து வருகிறது. அவா்களை வெற்றி பெற விடமாட்டோம்’ என்றாா்.