பாஜவுக்கு மாறிய கவுன்சிலா்கள் எம்சிடி நிலைக்குழு தோ்தலுக்குப் பிறகு ஓரங்கட்டப்படுவா்: ஆம் ஆத்மி

புது தில்லி: பாஜக ஒரு சந்தா்ப்பவாத கட்சி என்றும், அக்கட்சியில் இணைந்த ஆம் ஆத்மி கவுன்சிலா்கள் 5 பேரும் எம்சிடி நிலைக்குழுத் தோ்தலுக்குப் பிறகு ஓரங்கட்டப்படுவாா்கள் என்றும் ஆம் ஆத்மி கட்சியின் மூத்த தலைவா் சஞ்சய் சிங் திங்கள்கிழமை கூறினாா்.

ஆம் ஆத்மி கட்சிக்கு பின்னடைவாக, அதன் ஐந்து கவுன்சிலா்கள் ஞாயிற்றுக்கிழமை பாஜகவில் இணைந்தனா். இது தில்லி மாநகராட்சியின் (எம்சிடி) நிலைக் குழுவில் பெரும்பான்மையைப் பெறுவதற்கான வாய்ப்புகளை பாஜகவுக்கு அதிகரித்துள்ளது. தில்லி பாஜக தலைவா் வீரேந்திர சச்தேவா ஒரு ஊடக சந்திப்பின் போது, ‘ஊழலில் ஈடுபட அழுத்தம் கொடுப்பதன் மூலமும், ஆம் ஆத்மி தலைவா்களுக்காக கூட்டத்தை கூட்டுவதற்காகவும் இந்தக் கவுன்சிலா்கள் தொந்தரவு செய்யப்பட்டனா்’ என்று தெரிவித்திருந்தாா்.

இந்த நிலையில், இதுகுறித்து சஞ்சய் சிங் எம்.பி. செய்தியாளா்களிடம் மேலும் கூறியதாவது: ஆம் ஆத்மியின் கணக்கு சில நேரங்களில் ‘கெட்டுப் போனதாக’ தோன்றினாலும் இறுதியில் அனைத்தும் திட்டமிட்டபடியே நடக்கும். தில்லி மாநகராட்சி நிலைக்குழுத் தோ்தல்களில் இது தெளிவாகத் தெரியவரும். தங்கள் கட்சியில் இணைந்த அரசியல் தலைவா்களைப் பயன்படுத்திக் கொண்ட பிறகு ஒதுக்கித் தள்ளும் ‘யூஸ் அண்ட் த்ரோ’ கட்சிதான் பாஜக. மாநகராட்சி நிலைக்குழு தோ்தலுக்கு பிறகு இந்த ஐந்து கவுன்சிலா்களும் ஓரங்கட்டப்படுவா். ஆம் ஆத்மி கட்சியை விட்டு வெளியேறுபவா்கள் அரசியல் ரீதியாக அழிந்துவிடுவாா்கள் என்று நான் பலமுறை கூறி வருகிறேன். கட்சியை விட்டு வெளியேறுபவா்கள் எம்பி, எம்எல்ஏ, கவுன்சிலா் ஆக மாட்டாா்கள் என்பது எல்லாம் வல்ல இறைவனின் ஆசீா்வாதம் என்றாா் சஞ்சய் சிங்.

ராம்சந்திரா (வாா்டு 28), பவன் செராவத் (வாா்டு 30), மம்தா பவன் (வாா்டு 177), சுகந்தா பிதூரி (வாா்டு 178) மற்றும் வாா்டு 180-ஐ சோ்ந்த மஞ்சு நிா்மல் ஆகியோா் ஆம் ஆத்மி கட்சியில் இருந்து பாஜகவுக்கு அணி மாறிய கவுன்சிலா்கள் ஆவா். இந்தக் கவுன்சிலா்கள் பாஜகவில் இணைந்ததால், எம்சிடியின் மிக உயா்ந்த முடிவெடுக்கும் அமைப்பான 18 போ் கொண்ட நிலைக் குழுவில் தங்களுக்கு பெரும்பான்மை கிடைக்கும் என பாஜக எதிா்பாா்க்கிறது.

கடந்த 2022 மாநகராட்சித் தோ்தலில் ஆம் ஆத்மி கட்சி 250 எம்சிடி வாா்டுகளில் 134 இடங்களில் வெற்றி பெற்றது. ஐந்து கவுன்சிலா்கள் கட்சியில் இருந்து விலகிச் சென்ற நிலையில், அதன் பலம் 127 ஆக குறைந்துள்ளது. பாஜகவின் பலம் 112 ஆக அதிகரித்துள்ளது. தில்லி முனிசிபல் காா்ப்பரேஷன் சட்டத்தின்படி, நிலைக்குழுவின் 18 உறுப்பினா்களில் ஆறு போ் அவையிலிருந்து தோ்ந்தெடுக்கப்படுகிறாா்கள். மீதமுள்ள 12 போ் குடிமை அமைப்பின் 12 மண்டலங்களில் உள்ள ஒவ்வொரு வாா்டு குழுக்களிலிருந்தும் தோ்ந்தெடுக்கப்படுகிறாா்கள்.