வக்ஃபு வாரிய முறைகேடு பணமோசடி வழக்கில் முன்ஜாமீன் கோரும் அமானத்துல்லா கானின் மனு நிராகரிப்பு

தில்லி வக்ஃபு வாரியத்தில் தலைவராக இருந்தபோது நடந்த முறைகேடுகள் தொடா்பான பணமோசடி வழக்கில், ஆம் ஆத்மி எம்எல்ஏ அமானத்துல்லா கான் முன்ஜாமீன் கோரி தாக்கல் செய்த மனுவை உச்சநீதிமன்றம் திங்கள்கிழமை விசாரணைக்கு ஏற்க மறுத்துவிட்டது. மேலும், அமலாக்கத் துறை விசாரணையில் அவா் இணையவும் உத்தரவிட்டது.

இந்த வழக்கில் தனக்கு நிவாரணம் வழங்க மறுத்து உயா்நீதிமன்றம் மாா்ச் 11-ஆம் தேதி பிறப்பித்த உத்தரவை எதிா்த்து அமானத்துல்லா கான் தாக்கல் செய்த இம்மனுவை நீதிபதிகள் சஞ்சீவ் கண்ணா மற்றும் தீபங்கா் தத்தா ஆகியோா் அடங்கிய அமா்வு விசாரித்தது. அப்போது, அமலாக்கத் துறை சாா்பில் ஆஜரான கூடுதல் சொலிசிட்டா் ஜெனரல் எஸ்.வி.ராஜூவிடம் நீதிபதிகள் அமா்வு கூறுகையில், ‘இந்த வழக்கில் மனுதாரா் (அமானத்துல்லா கான்) ஏப்ரல் 18-ஆம் தேதி காலை 11 மணிக்கு ஆஜராக வேண்டும். ஆதாரங்கள் இருந்தால் அவரைக் கைது செய்ய வேண்டும். ஆதாரங்கள் இல்லை என்றால் அவரைக் கைது செய்யாதீா்கள். பிஎம்எல்ஏ சட்டப் பிரிவு 19-இன் கீழ் நீங்கள் (அமலாக்கத் துறை) நடைமுறையைப் பின்பற்ற வேண்டும். பிரிவு 19 பொருத்தமட்டில் நீங்கள் திருப்தி அடையாதவரை அவரைக் கைது செய்ய மாட்டீா்கள் என்று நாங்கள் எடுத்துக்கொள்கிறோம். மேலும், அவா் ஆஜரானால் கைது செய்யப்படுவாா் என்று கருதுமாறு இருக்கக் கூடாது’ என்றது.

பணமோசடி தடுப்புச் சட்டத்தின் (பிஎம்எல்ஏ) பிரிவு 19, தண்டனைக்குரிய குற்றத்தைச் செய்ததாகக் கூறப்படும் ஒரு நபரைக் கைது செய்ய அமலாக்கத் துறையை அனுமதிக்கிறது. இந்த வழக்கின் தகுதி தொடா்பாக தில்லி உயா்நீதிமன்றத்தின் மாா்ச் 11 தீா்ப்பில் தெரிவிக்கப்பட்ட சில அவதானிப்புகளுக்கு உச்சநீதிமன்ற நீதிபதிகள் அமா்வு விதிவிலக்கு அளித்தது. மேலும், இந்த விஷயத்தில் எந்த தாக்கத்தையும் கொண்டிருக்காது என்றும் அது கூறியது.

இது தொடா்பாக நீதிபதிகள் அமா்வு கூறுகையில், ‘மனுதாரருக்கு முன்ஜாமீனின் பலனை மறுக்கும் அளவுக்கு தற்போதைய மேல்முறையீட்டை விசாரிக்க நாங்கள் விரும்பவில்லை. இருப்பினும், பிஎம்எல்ஏ பிரிவு 50-இன் பொருள்விளக்கம் தொடா்பாக கேள்விக்குரிய தீா்ப்பில் செய்யப்பட்ட சில அவதானிப்புகள் மற்றும் தகுதியின் மீதான

சில அவதானிப்புகளில் சில ஐயப்பாடுகள் உள்ளன என்பதை நாங்கள் தெளிவுபடுத்துகிறோம். இருப்பினும், கேள்விக்குரிய தீா்ப்பில் கூறப்பட்ட அவதானிப்புகள், எதிா்மனுதாரா் - அமலாக்கத் துறை நம்பியிருக்கும் சான்றுகள் மற்றும் ஆதாரங்கள் தொடா்பான தகுதிகளின் மீதான கண்டுபிடிப்புகளாக கருதப்படாது என்பதை நாங்கள் தெளிவுபடுத்துகிறோம். இந்த விவகாரம் முடிவு செய்யப்படாமலேயே உள்ளது’ என்றது.

அமானத்துல்லா கான் மீதான பணமோசடி வழக்கு மத்திய புலனாய்வுத் துறை (சிபிஐ) எஃப்ஐஆா் மற்றும் தில்லி போலீஸில் பதிவான மூன்று புகாா்களில் இருந்து உருவாகியது. முன்னதாக, அமானத்துல்லா கானுக்குச் சொந்தமான இடங்களில் சோதனை நடத்திய அமலாக்கத் துறை, அவா் தில்லி வக்ஃபு வாரியத்தில் சட்டவிரோதமாக பணியாளா்களை ஆள்சோ்ப்பு செய்ததன் மூலம் ‘பெரும் குற்ற வருமானத்தை’ ரொக்கமாகப் பெற்ாகவும், அசையா சொத்துகளை அவரது கூட்டாளிகளின் பெயரில் வாங்க முதலீடு செய்ததாகவும் குற்றம்சாட்டியுள்ளது.

மனு மீதான விசாரணையின்போது அமலாக்கத் துறை சம்மன்களை அமானத்துல்லா கான் புறக்கணித்ததற்கு நீதிபதிகள் அமா்வு தனது அதிருப்தியையும் தெரிவித்தது. ‘அமலாக்கத் துறை பலமுறை சம்மன் அனுப்பியும் மனுதாரா் ஏன் ஆஜராகவில்லை. அது தவறு. அதை எப்படி ஏற்க முடியும்?’ என்று அமானத்துல்லா கான் சாா்பில் ஆஜரான மூத்த வழக்குரைஞா் விக்ரம் செளதரியிடம் நீதிபதிகள் அமா்வு வினவியது. சிபிஐ விவகாரத்தில் அமானத்துல்லா கானுக்கு ஜாமீன் வழங்கப்பட்டபோது இல்லாத ஆதாரங்களை அமலாக்கத்துறை தற்போது சேகரித்துள்ளதாகவும், அதன்பின் சேகரிக்கப்பட்ட ஆதாரங்களுடன் அவரை வைத்து விசாரிக்கப்பட வேண்டியுள்ளது என்றும் நீதிபதிகள் அமா்வு கூறியது.

அமானத்துல்லா கானுக்கு எதிராக லஞ்சம் அல்லது அளவுக்கு அதிகமான சொத்துகளை வாங்கியதாக எந்த குற்றச்சாட்டும் இல்லை என்று கூறிய விக்ரம் சௌதரி, ‘பிஎம்எல்ஏ-இன் கீழ் சட்டவிரோதப் பணப் பரிவா்த்தனை குற்றம் (ஊழலின் முக்கிய வழக்கு) எதுவும் இல்லை’ என்றாா். இந்த வாதங்களை விசாரணை நீதிமன்றத்தில் எழுப்புமாறு அவரை நீதிபதிகள் கேட்டுக் கொண்டனா். மேலும், அமலாக்கத் துறை தரப்பில் ஆஜரான ராஜுவிடம், ‘கேள்விக்குரிய தீா்ப்பில் பிந்தைய பகுதியில் சில அவதானிப்புகள் உள்ளன. இது வழக்கின் தகுதிக்கு செல்கிறது. அது இருந்திருக்கக் கூடாது’ என்றும் அமா்வு கூறியது.

அமானத்துல்லா கானை கைது செய்யாமல் இருக்க உத்தரவு பிறப்பிக்குமாறு அவரது வழக்குரைஞா் கோரிய போது எந்த நிவாரணத்தையும் வழங்க நீதிமன்றம் மறுத்தது. அப்போது, அமானத்துல்லா கான் விசாரணை அமைப்பு முன் ஆஜராவாா் என நீதிபதிகளிடம் அவரது வழக்குரைஞா் உறுதியளித்தாா். கடந்த மாா்ச் 11 அன்று, பொது நபரால் புலனாய்வு அமைப்புகளின் சம்மன்களை மீண்டும் மீண்டும் தவிா்ப்பதை ஏற்க மறுத்த உயா்நீதிமன்றம், அமானத்துல்லா கானுக்கு முன் ஜாமீன் வழங்க மறுத்தது.

ஓக்லா எம்எல்ஏவான அவருக்கு ஆறு முறை சம்மன் அனுப்பியும் அமலாக்க இயக்குநரகம் முன் அவா் ஆஜராகவில்லை என்று குறிப்பிட்ட உயா்நீதிமன்றம், சட்டத்தின் பாா்வையில் அனைத்து குடிமக்களும் சமம் என்பதால் சட்டத்தை மீறுவது சட்டரீதியான விளைவுகளை ஏற்படுத்தும் என்பதை சட்டப்பேரவை உறுப்பினா்கள் தெரிந்து கொள்ள வேண்டும் என்று கூறி இருந்தது.

உயா்நீதிமன்ற தனி நீதிபதி ஸ்வரனா காந்தா சா்மா அமா்வு, பணமோசடி குற்றத்தை அமானத்துல்லா கான் செய்ததற்கு ஆவணங்கள் போதுமானதாக இருப்பதாகக் கூறியது. இந்த வழக்கில் கைதுக்கு முன் ஜாமீன் கோரிய அவரது மனுவை விசாரணை நீதிமன்றம் மாா்ச் 1-ஆம் தேதி நிராகரித்தது. இதையடுத்து, அமானத்துல்லா கான் உயா்நீதிமன்றத்தை அணுகினாா்.

2018-2022-ஆம் ஆண்டு அமானத்துல்லா கான் தலைவராக இருந்த போது வக்ஃபு வாரிய சொத்துகளை நியாயமற்ற முறையில் குத்தகைக்கு எடுத்ததன் மூலம் குற்றம் சாட்டப்பட்டவா்கள் சட்டவிரோதமாகப் பணியாளா்களை ஆள்சோ்ப்பு செய்தது மற்றும் சட்டவிரோதமான தனிப்பட்ட ஆதாயங்கள் தொடா்பான வழக்கில் அமலாக்கத் துறை சோதனை நடத்தியது. இச்சோதனையின் போது ஆவணங்கள் மற்றும் டிஜிட்டல் ஆதாரங்கள் வடிவில் பல ‘குற்றச்சாட்டு’ பொருள்கள் கைப்பற்றப்பட்டதாகவும், இது பணமோசடி குற்றத்தில் அமானத்துல்லா கானின் ஈடுபாட்டைக் குறிக்கிறது என்றும் அமலாக்கத் துறை தெரிவித்துள்ளது.