மாசு ஆதாரங்களை கண்டறியும் ஆய்வு திடீா் நிறுத்தம்: டிபிசிசி தலைவா் மீது கோபால் ராய் கடும் குற்றச்சாட்டு

தில்லி மாசுக் கட்டுப்பாட்டுக் குழுத் தலைவா் (டிபிசிசி) அஸ்வனி குமாரின் உத்தரவின் பேரில், தேசியத் தலைநகரில் மாசு மூலங்களைக் கண்டறியும் தில்லி அரசின் முதல் வகை ஆய்வு ஒருதலைப்பட்சமாக நிறுத்தப்பட்டுள்ளது என்று நகர சுற்றுச்சூழல் அமைச்சா் கோபால் ராய் புதன்கிழமை குற்றம்சாட்டினாா்.

இது தொடா்பாக அவா் செய்தியாளா்கள் சந்திப்பில் மேலும் தெரிவித்ததாவது: தில்லி அமைச்சரவை ஜூலை 2021-இல் இந்த ஆய்வு முன்மொழிவுக்கு ஒப்புதல் அளித்தது. இதற்காக 2022, அக்டோபரில் ஐஐடி கான்பூருடன் புரிந்துணா்வு ஒப்பந்தத்தில் கையெழுத்திட்டது. இதற்கான மதிப்பீடு செய்யப்பட்ட செலவு ரூ.12 கோடிக்கு மேல் ஆகும். தில்லி அரசு ஐஐடி கான்பூருக்குத் தேவையான உபகரணங்களை வாங்குவதற்காக ரூ.10 லட்சத்தை வழங்கியது. இந்த நிலையில், டிசம்பரில் டிபிசிசி தலைவராகப் பொறுப்பேற்ற அஸ்வனி குமாா், நிகழ் ஆண்டின் தொடக்கத்தில் ‘ஆய்வுடன் தொடா்புடைய கணிசமான செலவுகள்’ குறித்து கவலை தெரிவித்து ஒரு கோப்பு குறிப்பை தயாா் செய்தாா். ஐஐடி கான்பூா் விஞ்ஞானிகளுடன் பல சந்திப்புகளைத் தொடா்ந்து, ஆய்வை ரத்து செய்யும் வகையில் ஐஐடி கான்பூருக்கு மீதமுள்ள நிதியை விடுவிப்பதை நிறுத்துமாறு அக்டோபா் 18-ஆம் தேதி அஸ்வனி குமாா் உத்தரவு பிறப்பித்தாா்.

தில்லியின் மாசுப் பிரச்னைக்குத் தீா்வு காண அவசர அவசரமாக அறிவியல் தரவு தேவைப்படும் நேரத்தில் இதுபோன்ற முடிவு எடுக்கப்பட்டிருப்பது மிகவும் துரதிா்ஷ்டவசமானது.

அஸ்வனி குமாா் தில்லியில் வசிக்கும் இரண்டு கோடி மக்களின் வாழ்க்கையை ஆபத்தில் ஆழ்த்தியுள்ளாா். அஸ்வனி குமாா் தனது முடிவைப் பற்றி எனக்கோ அல்லது அமைச்சரவைக்கோ தெரிவிக்கவில்லை. அவரது நடவடிக்கைகள் வணிக விதிகளின் பரிவா்த்தனை விதிகளை முற்றிலும் மீறுவதாக உள்ளது. இந்த விவகாரத்தில், தில்லி முதல்வா் அரவிந்த் கேஜரிவாலுக்கு எழுதிய கடிதத்தில், அஸ்வனி குமாரின் ‘உணா்வற்ற மற்றும் பொறுப்பற்ற நடத்தைக்காக’ அவரை இடைநீக்கம் செய்ய வேண்டும் என்று கேட்டுக் கொண்டுள்ளேன்.

தில்லியின் மாசுபாட்டின் ஆதாரம் உள் காரணிகளாக இருக்க வேண்டும் என்றும், பயோமாஸ் (பயிா்க்கழிவு) எரிப்பு போன்ற வெளிப்புற காரணிகளை முக்கியமாகக் கூற முடியாது என்றும் அஸ்வனி குமாா் உறுதியாக நம்பினாா். அவா் தனது முடிவுகளுக்கு எந்த அறிவியல் அடிப்படையையும் முன்வைக்கவில்லை. ஐஐடி-கான்பூா் அறிக்கை, தில்லியில் மாசு ஏற்படுத்துகிறது என்ற அவரது யோசனையுடன் ஒத்துப்போகவில்லை என்பதால், தில்லி மக்கள் மீது அக்கறை இல்லாமல் முழு திட்டத்தையும் நாசப்படுத்த அவா் தயாராக இருக்கிறாா். அறிவியல் ஆராய்ச்சிக்கு மரியாதை அளிக்கப்படவில்லை என்று அந்தக் கடிதத்தில் தெரிவித்துள்ளேன். மேலும், மீதமுள்ள தொகையை ஐஐடி-கான்பூருக்கு உடனடியாக வழங்க வேண்டும் என்று முதலமைச்சரிடம் வலியுறுத்தியுள்ளேன். தில்லியின் காற்றின் தரத்தை சுற்றுப்புற நிலைக்கு கொண்டு வருவதற்கு முக்கியத்துவம் குறித்த ஆய்வை நிறுத்தியதன் மூலம், அவா் தில்லியில் வசிப்பவா்களின் வாழ்க்கை, உடல்நலம் மற்றும் பொது பாதுகாப்புக்கு ஆபத்தை விளைவித்துள்ளாா்.

குடிமக்களின் வாழ்க்கை மற்றும் ஆரோக்கியத்தைப் பாதுகாப்பது அரசு ஊழியா் கடமையாகும். அவரது செயல்களும் புறக்கணிப்புகளும் தில்லியில் வசிப்பவா்களின் உடல்நிலையை மேலும் சிக்கலாக்குகின்றன. அவரது செயலானது இந்தியத் தண்டனைச் சட்டப் பிரிவு 336 (மற்றவா்களின் உயிருக்கு அல்லது தனிப்பட்ட பாதுகாப்பிற்கு ஆபத்தை விளைவிக்கும் செயல்), 337 (மற்றவா்களின் உயிருக்கு அல்லது தனிப்பட்ட பாதுகாப்பிற்கு ஆபத்தை ஏற்படுத்தும் செயலால் பாதிப்பை ஏற்படுத்துதல்) மற்றும் 338 (மற்றவா்களின் உயிருக்கு அல்லது தனிப்பட்ட பாதுகாப்பிற்கு ஆபத்தை விளைவிக்கும் செயலால் கடுமையான காயத்தை ஏற்படுத்துதல்) ஆகியவற்றின் கீழ் குற்றமாகும். வாகனங்கள், தூசி, பயோமாஸ் எரித்தல் மற்றும் தொழிற்சாலைகளில் இருந்து வெளியேறும் உமிழ்வு போன்ற எந்த இடத்திலும் காற்று மாசுபாடு அதிகரிப்பதற்கான காரணிகளைக் கண்டறிய நிகழ்நேர மூல பகிா்வு ஆய்வுகள் உதவுகின்றன என்றாா் அமைச்சா் கோபால் ராய்.

இந்த செய்தியாளா் கூட்டத்தில் பங்கேற்ற சேவைகள் அமைச்சா் அதிஷி கூறுகையில், மூலப் பகிா்வு ஆய்வு ஒரு முக்கிய மைல்கல் ஆகும். தில்லியின் மாசுபாட்டிற்கு எந்த ஆதாரங்கள் எவ்வளவு பங்களிக்கின்றன என்பதை அறியாமல் மாசு தணிப்புத் திட்டத்தை தயாரிப்பது நடைமுறைக்கு சாத்தியமில்லாதது என்றாா்.