கிராமங்களில் 1.25 கோடி சொத்து உரிமை அட்டை: நிகழாண்டில் மத்திய பஞ்சாயத்து ராஜ் அமைச்சகம் சாதனை

நாட்டில் கிராமப்புற பொருளாதாரத்தில் முன்னேற்றத்தை ஏற்படுத்த ‘உரிமைப் பதிவேடு‘ வழங்கும் ஸ்வாமித்வா திட்டத்தின்கீழ் 1.25 கோடி சொத்துக்கள் உரிமைக்கான அட்டை வழங்கப்பட்டுள்ளதாக மத்திய பஞ்சாயத்து ராஜ் அமைச்சகம் சனிக்கிழமை தெரிவித்துள்ளது.

தமிழகம் உள்ளிட்ட ஒரு சில மாநிலங்களில் முன்னோடிகிராமங்களில் மட்டுமே இத்திட்டம் செயல்படுத்தப்பட்டுள்ளது.

பஞ்சாயத்து ராஜ் அமைச்சகத்தின் 2023-ஆம் ஆண்டு செயல்பாடுகள், சாதனைகளில் இந்த திட்டம் முக்கியத்துவம் பெற்றுள்ளது.

இது குறித்த விவரம் வருமாறு: ஒவ்வொரு கிராமப்புறங்களிலும் குடியிருப்பு பகுதிகளில் அதன் நில உரிமையாளா்களுக்கு ‘ உரிமைப் பதிவேடு‘களை வழங்கும் திட்டம் ஸ்வாமித்வா திட்டம்.

கடந்த 2020 ஆம் ஆண்டு தேசிய பஞ்சாத்து ராஜ் தினத்தில் (ஏப்ரல் 24) பிரதமா் நரேந்திர மோடியால் இந்த திட்டம் தொடங்கி வைக்கப்பட்டது.

கிராமப் பகுதிகளில் மேம்படுத்தப்பட்ட தொழில்நுட்பத்துடன் கிராமங்களின் நில அளவை மற்றும் வரைபடம் தயாரித்தல் பணிகளுக்கு சுருக்கமாக ’ஸ்வாமித்வா’ திட்டம் என அழைக்கப்பட்டது. ஒவ்வொரு கிராமப்புற சொத்து உரிமையாளருக்கும் ‘உரிமைப் பதிவேடு‘ களை வழங்குவதன் மூலம் கிராமப்புற இந்தியாவின் பொருளாதாரத்தில் முன்னேற்றத்தை காணும் உறுதியுடன் இத்திட்டம் தொடங்கப்பட்டது.

இந்த திட்டத்தில் காணப்பபட்டுள்ள முன்னேற்றங்களை மத்திய பஞ்சாயத்து ராஜ் துறை அமைச்சகம் தரப்பில் குறிப்பிடுகையில், 2023 -ஆம் ஆண்டு டிசம்பா் வரை, 2.89 லட்சம் கிராமங்களில் ஸ்வாமித்வா திட்டத்தில் ட்ரோன் மூலமான நில அளவை ஆய்வு நிறைவடைந்துள்ளது.

மத்தியப் பிரதேசம், உத்தர பிரதேசம், லடாக், லட்சத்தீவு, தில்லி, தாத்ரா, நாகா் ஹவேலி, டாமன் மற்றும் டையூவில் ட்ரோன் பறக்கும் திறன் நிறைவுற்றது.

ஹரியாணா, உத்தரகாண்ட், புதுச்சேரி, கோவா, அந்தமான் மற்றும் நிக்கோபாா் தீவுகளில் இத்திட்டம் நிறைவுற்றுள்ளது. சுமாா் 1.06 லட்சம் கிராமங்களில் 1.63 கோடி உரிமைப் பதிவேடு சொத்து அட்டைகள் தயாரிக்கப்பட்டு வழங்கப்பட்டுள்ளன. தமிழ்நாடு, தெலங்கானா, சிக்கிம் உள்ளிட்ட மாநிலங்களில் சில முன்னோடி கிராமங்களில் இத்திட்டம் செயல்படுத்தப்பட்டுள்ளது.

பிகாா், ஜாா்க்கண்ட், நாகாலாந்து, மேகாலயா, மேற்கு வங்கம் ஆகிய மாநிலங்களில் இந்தத் திட்டம் செயல்படுத்தப்படவில்லை. மற்ற மாநிலங்களில் இந்த திட்டம் விரைவில் செயலுக்கு வரும்.

கடந்த 2023 ஏப்ரல் 24 ஆம் தேதி தேசிய பஞ்சாயத்து ராஜ் தினத்தை முன்னிட்டு மத்தியப் பிரதேசம், ரேவாவில் நடைபெற்ற நிகழ்ச்சியில் ஸ்வமித்வா திட்டத்தின் கீழ் உருவாக்கப்பட்ட 35 லட்சம் சொத்து அட்டைகளை பிரதமா் வழங்கினாா். அப்போது இத்திட்டத்தின் முக்கியத்துவத்தை பிரதமா் எடுத்துரைத்தாா்.

மத்திய பஞ்சாயத்து ராஜ் அமைச்சகம், மாநில அரசுகளின் வருவாய்த் துறை மற்றும் பஞ்சாயத்து ராஜ் அமைச்சகங்கள், மத்திய அரசின் இந்திய நில அளவைத் துறை (சா்வே ஆஃப் இந்தியா) ஆகியவைகளின் கூட்டு முயற்சியின் மூலம் கிராம மக்களின் நிலங்களின் எல்லைகளை நிா்ணயம் செய்யப்படுகிறது.

சொத்து உரிமையாளருக்கும் ‘உரிமைப் பதிவேடு‘ அட்டைகள் வழங்குவதன் மூலம் சொத்துக்கள் தொடா்பான சா்ச்சைகளை குறைத்தல், விரிவான கிராம அளவில் விரிவான திட்டமிடல், உள்ளாட்சி அமைப்புகளுக்குரிய வருவாயை பெருக்குதல் போன்றவைகளோடு, நில உரிமையாளா்கள் தங்கள் சொத்துக்களை பணமாக்குதல், வங்கிக் கடனை செயல்படுத்தல் போன்றவைகளுக்கு அட்டை பயனுள்ளதாகும். இது சுயசாா்பு இந்தியா, கிராம சுயராஜ்ஜியம் போன்ற வகைகளை அடைவதற்கான படியாகும்.

ஸ்வாமித்வா திட்டத்துக்கு மின் ஆளுமைக்கான நிகழாண்டின் தேசிய விருதாக மத்திய நிா்வாக சீா்திருத்தங்கள் துறை சாா்பில் தங்கப் பதக்கம் வழங்கப்பட்டது. மேலும் கடந்த ஆகஸ்ட் மாதம் கோவாவில் நடைபெற்ற டிஜிடெக் மாநாட்டில் மின் ஆளுமையில் புதுமைத் தொழில்நுட்பப் பயன்பாட்டிற்கான தங்கப் பதக்கம் இந்த ஸ்வாமித்வா திட்டத்துக்கு வழங்கப்பட்டது.

மேலும், இந்த திட்டத்தை மேம்படுத்த ஸ்வாமித்வா சொத்து அட்டைகளின் வங்கித் தன்மை குறித்த வட்டமேஜை விவாதம் கடந்த ஆகஸ்ட் மாதம் உத்தர பிரதேச மாநிலம் லக்னௌவில் உள்ள ஊரக வளா்ச்சியின் வங்கியாளா்கள் நிறுவனத்தில் நடைபெற்றது.

மேலும் வரைபடங்களுக்கு இஸ்ரோவின் ஹைதராபாத்தில் உள்ள தேசிய தொலையுணா்வு மைய

பயிற்சி ஆய்வு நிறுவனத்தில் இதில் தொடா்புடையவா்களுக்கு பயிற்சிகளும் கடந்த அக்டோபா் மாதம் அளிக்கப்பட்டது. தொடா்ந்து இந்த திட்டத்திற்கான பல்வேறு தீா்வுகளுக்கு மாநாடுகளும் கலந்துரையாடல்களும் மேற்கொள்ளப்பட்டது.

பஞ்சாயத்து ராஜ் அமைப்புகளை வலுப்படுத்தவும், அவற்றுக்கு அதிகாரமளிக்கவும், அவை நிலையான வளா்ச்சி இலக்குகளை அடைவதற்கும் பஞ்சாயத்து ராஜ் அமைச்சகம் பல முன்முயற்சிகளை எடுத்து வருவதாக அந்த அமைச்சகம் தெரிவித்துள்ளது.