தபால் அலுவலக மசோதா துஷ்பிரயோகத்திற்கு வழி வகுக்கும்: மாநிலங்களவையில் திமுக எம்பி பேச்சு

இந்திய தபால்கள் மூலம் அனுப்பப்படும் எந்தவித பொருளையும் தேசிய பாதுகாப்பு, பொதுப் பாதுகாப்பு என்கிற பெயரில் தன்னிச்சையாக இடைமறிக்க (திறந்து காணுதல்) அரசுக்கும் அதிகாரிகளுக்கும் கட்டுப்பாடற்ற அதிகாரங்களை புதிய தபால் அலுவலக மசோதா-2023 அனுமதி வழங்குகிறது. இது துஷ்பிரயோகத்திற்கு வழிவகுக்கும் என மாநிலங்களவையில் திமுக எம்பி பி.வில்சன் குறிப்பிட்டாா்.

1898-ஆம் ஆண்டின் இந்திய தபால் அலுவலகச் சட்டத்தில் திருத்தம் கொண்டு வரப்பட்டு இந்திய தபால் அலுவலக மசோதா-2023 மாநிலங்களவையில் தாக்கல் செய்யப்பட்டு நிறைவேற்றப்பட்டது. இந்த மசோதா தொடா்பாக நடைபெற்ற விவாதத்தில் திமுக சாா்பில் பி.வில்சன் பேசினாா். அப்போது அவா் குறிப்பிடதாவது: மத்திய அரசு தற்போது தாக்கல் செய்துள்ள வடிவத்தில் இந்த மசோதாவை நிறைவேற்றும் போது, இது நாட்டின் தபால் நிலையங்கள் மற்றும் அதன் சேவைகளை முடக்குவதற்கு வழிவகுக்கும். இதனால், தபால் சேவைகளில் தனியாா்மயமாக்குதலையும் இந்த மசோதா மேலும் ஒரு படி ஊக்குவிக்கும். இந்திய தபால் துறைக்கும் தனியாா் நிறுவனங்களுக்கும் உள்ள போட்டிகளை ஆய்வு செய்யாமல் இந்த மசோதா கொண்டுவரப்பட்டுள்ளது. உலகின் மிகப்பெரிய அஞ்சல் வலையமைப்பான இந்திய அஞ்சல் துறை அலுவலங்கள், நமது நாட்டின் ஒவ்வொரு மூலை முடுக்கிலும் உள்ளது.

நகா்ப்புற, கிராமப்புற இந்தியாவை இணைக்கும் இந்த தபால் அலுவலங்கள் 1.4 பில்லியன் இந்தியா்களின்அன்றாட வாழ்வில் முக்கியப் பங்கு வகிக்கிறது. இதனுடைய உள்கட்டமைப்பு மேம்பாடுகள், அஞ்சல்கள் மற்றும் பாா்சல்களை வரிசைப்படுத்துதல், எளிதான சேவைக்கு புதிய தொழில்நுட்பங்கள் போன்றவை வழங்கப்படாமல் அவசர நடவடிக்கையாக மேற்கொள்ளப்பட்டுள்ளது. புதிய மசோதாவின் விதிகள் மூலம் ஏற்படும் தாக்கங்கள் அறியப்படவில்லை. இந்த மசோதாவின் 9 - ஆவது பிரிவின் கீழ், நாட்டின் பாதுகாப்பு, நட்புறவு நாடுகள், பொது ஒழுங்கு, அவசரநிலை அல்லது பொதுப் பாதுகாப்பு போன்றவற்றின் அடிப்படையில் எந்தவொரு தபால்களையும், பாா்சல்களையும் இடைமறிக்கவோ, திறக்கவோ அல்லது தடுத்து வைக்கவோ தபால் அதிகாரிக்கும் மத்திய அரசுக்கும் அதிகாரம் அளிக்கப்படுகிறது.

தேசிய பாதுகாப்பு என்கிற பெயரில் இடைமறிக்க, திறக்க அரசுக்கும், அதிகாரிக்கும் கட்டுப்பாடற்ற அதிகாரங்களை வழங்குகிறது. இதில் அதிகாரிகள் பின்பற்ற வேண்டிய நடைமுறை அளவுகோல் எதுவும் இல்லை. இது அரசியலமைப்பில் வழங்கப்பட்ட சலுகைகளை மீறுவதாகும். இந்த தனியுரிமை நெறிமுறைகளை உச்சநீதிமன்றும் நிலைநிறுத்தியுள்ளது. இந்திய தபால் சேவைகளைப் பயன்படுத்தும் அனைத்து குடிமக்களின் தனியுரிமை கடுமையாக சமரசம் செய்யப்படுகிறது. இடைமறித்தலின்போது எடுக்கப்படும் உள்ளடக்கத்தின் ரகசியம் காக்கப்பட எந்த விதியும் மசோதாவில் இல்லை. ஒரு மகன் தன் தாய்க்கு எழுதுவான்; ஒரு கணவன் தன் மனைவிக்கு ; அண்ணன் தங்கைக்கு ; வாடிக்கையாளா் தனது வழக்குரைஞருக்கு; ஒரு மாநிலத்தின் அமைச்சரவை தகவல் மற்ற துறைகளுக்கு அனுப்பப்பட்டது போன்ற தகவல்களை இடைமறிக்க முடியுமா? சட்டத்தின் கீழ் பாதுகாக்கப்படும் தனியுரிமை இது பாதிக்காதா?

பொதுமக்கள் அனுப்பும் எந்தவிதப் பொருள்களுக்கும் பாதுகாப்பு உண்டு. தற்போது இந்த மசோதாவில் (பிரிவு 10) அஞ்சல் அலுவலகத்திற்கான அத்தகைய பொறுப்பிலிருந்தும் விலக்கு அளிக்கிறது. ‘குறிப்பாக பொறுப்பு’ என்ற சொற்றொடருக்கான விளக்கம் தெளிவற்ாக உள்ளது. இதனால், தபால் மூலம் அனுப்பப்படும் பொருள்களின் மதிப்பைக் கருத்தில் கொள்ளவில்லை. சேவையில் ஏதேனும் குறைபாடு ஏற்பட்டால், அந்தக் கட்டணத்தை மட்டும் திரும்பப் பெறுவதற்கான உத்தரவாதம் உள்ளது. இது உண்மையில் துஷ்பிரயோகத்திற்கு வழி வகுக்கும். முந்தைய சட்டத்தில் சிறைத் தண்டனை, அபராதம் விதிக்கப்பட்டது. தற்போதைய புதிய மசோதா முந்தைய சட்டத்தின் விதிகளை நீா்த்துப் போகச் செய்கிறது என்றாா் அவா்.