நத்தத்தை தக்கவைக்குமா அதிமுக?

முக்கனிகளில் ஒன்றான மாம்பழத்திற்கு பெயர் பெற்ற நத்தம் தொகுதி மறுசீரமைப்புக்குபிறகு கடந்த 1977ஆம் ஆண்டு முதல்முறையாக பேரவைத் தேர்தலை சந்தித்தது. ஒரு இடைத் தேர்தல் உள்பட இதுவரை நடந்து முடிந்துள்ள 10 தேர்தல்களில், 2 வேட்பாளர்கள் மட்டுமே இத்தொகுதியின் சார்பில் பேரவைக்கு அனுப்பி வைக்கப்பட்டுள்ளனர் என்பது தனிச் சிறப்பு.

1977, 1980, 1984, 1989, 1991, 1996 ஆகிய தேர்தல்களில் காங்கிரஸ் மற்றும் தமாகா சார்பில் போட்டியிட்ட ஆண்டி அம்பலம், தொடர்ந்து 6 முறை வெற்றிப் பெற்றார். அவரது மறைவுக்கு பிறகு 1999இல் நடைபெற்ற இடைத் தேர்தலில், அதிமுக சார்பில் போட்டியிட்ட நத்தம் இரா.விசுவநாதன் வெற்றிப் பெற்றார். காங்கிரஸின் கோட்டையாக இருந்த இத்தொகுதியை, இடைத் தேர்தல் வெற்றிக்குப் பின் அதிமுக தொடர்ந்து கைப்பற்றி வந்துள்ளது. 1999(இடைத் தேர்தல்), 2001, 2006, 20011 என தொடர்ந்து 4 முறை நத்தம் விசுவநாதனே தொடர் வெற்றிகளை பதிவு செய்துள்ளார்.

அதன் மூலம், விசுவநாதனாக இருந்தவருக்கு, நத்தம் என்ற அடைமொழியும் ஒட்டிக் கொண்டது. 1991, 2006 மற்றும் 2011 ஆகிய 3 தேர்தல்களில் மட்டுமே இத்தொகுதியில் போட்டியிட்ட திமுகவுக்கு, இதுவரை வெற்றிக் கனி கிட்டவில்லை.

இந்த சூழலில், நத்தம் தொகுதி சார்பில் 3ஆவது நபராக பேரவைக்கு செல்லும் வாய்ப்பு தற்போதைய தேர்தலில் கிடைத்துள்ளது. இத்தொகுதியில் ஷாஜஹான் (அதிமுக), ஆண்டி அம்பலம்(திமுக), கார்த்திகேயன்(தேமுதிக), சீரங்கன்(பாமக) உள்ளிட்ட பலர் போட்டியிட்டாலும், அதிமுக, திமுகவுக்கு இடையேதான் நேரடி மோதல் ஏற்பட்டுள்ளது.

அதிமுகவின் பலம், பலவீனம்: நத்தம் தொகுதிக்குள்பட்ட பகுதிகளில் சாலை வசதி, காவிரி கூட்டுக் குடிநீர் திட்டம், சுகாதார வசதிகளை நிறைவேற்றியது அதிமுகவுக்கு பலம். கிராமப்புறங்கள் மற்றும் மலை கிராமங்கள் நிறைந்த இத்தொகுதியில், வேட்பாளர் யார் என்பதைவிட கட்சியின் சின்னமே பிரதானம் என்பது கூடுதல் பலம். தற்போது, விசுவநாதன் வேறு தொகுதிக்கு மாறியதால் நட்சத்திர அந்தஸ்தை இழந்ததோடு, தொகுதி முழுவதும் அதிமுக நிர்வாகிகளின் தேர்தல் பணியிலும் சுணக்கம் ஏற்பட்டுள்ளது. மேலும், தற்போதைய வேட்பாளர் ஷாஜஹானுக்கு மக்களிடம் பரவலான அறிமுகம் இல்லாதது பலவீனம்.

திமுகவின் பலம், பலவீனம்: தொகுதியில் பிரதானமாக உள்ள அம்பலம் சமூகம், திமுக வேட்பாளர் ஆண்டி அம்பலத்தின் அசுர பலம். கடந்த தேர்தல்களைப் போல், அதிமுக தரப்பில் நட்சத்திர வேட்பாளர் போட்டியிடாததும் திமுகவுக்கு சாதகமாக உள்ளது. தேர்தல் பணிகளை துரிதப்படுத்தும் வகையில் திமுக தொண்டர்களை இவர் ஊக்கப்படுத்தவில்லை என்பது பலவீனம். கோபால்பட்டியில் மட்டுமே முக.ஸ்டாலின் மேற்கொண்ட பிரசாரம் திமுகவுக்கு எந்தளவுக்கு உறுதுணையாக இருக்கும் என்பது தெரியவில்லை.

ஒருங்கிணைப்பில்லாத தேமுதிக: மக்கள் நலக்கூட்டணியில் தேமுதிக சார்பில் திண்டுக்கல்லைச் சேர்ந்த கார்த்திகேயன் போட்டியிடுகிறார். இவர், கூட்டணி கட்சி நிர்வாகிகளை அரவணைத்துச் செல்லவில்லை என்ற குற்றச்சாட்டு உள்ளது. தனி நபராக வலம் வரும் இவருக்கு, பிரேமலதா 2 இடங்களில் மேற்கொண்ட பிரசாரம் எந்த அளவுக்கு கை கொடுக்கும் என்பது தெரியவில்லை.

பிரதான கட்சிகளான அதிமுக, திமுகவுக்கு எதிராக 5 கட்சிகளின் துணையுடன் களம் இறங்கியுள்ளபோதிலும், தேர்தல் களத்தில் எவ்வித தாக்கத்தையும் இதுவரை ஏற்படுத்தவில்ல என்பதே நிதர்சனமான உண்மை.

பாட்டாளி மக்கள் கட்சி சார்பில் நிறுத்தப்பட்டுள்ள சீரங்கனும், இத்தொகுதியின் சிறப்பாகவும், தனது கட்சியின் சின்னமாகவும் உள்ள மாம்பழத்திற்கு வாக்குகளை குவிப்பதற்கான முயற்சியில் முழுமையாக ஈடுபடவில்லை என்பது கட்சியினரிடையே குற்றச்சாட்டு எழுகிறது.

மேலும், இந்திய ஜனநாயக கட்சி, நாம் தமிழர் கட்சி உள்ளிட்ட சுயேச்சை வேட்பாளர்கள் 3 இலக்க எண்ணை கடந்து வாக்குகளை பெறுவார்களாக என்பதும் சந்தேகமே.

அதிமுக, திமுக சார்பில் யார் வெற்றிக் கனியை பறித்தாலும், மாம்பழம் தொகுதியின் 40 ஆண்டுகால வரலாற்றில், பேரவைக்கு செல்லும் 3ஆவது நபர் என்ற தனிச் சிறப்பை பெறுவது உறுதி.

-ஆ. நங்கையார்மணி