ராமநாதபுரத்தில் ஒருங்கிணைந்த குடிமைப் பணி தோ்வு மையத்தில் அனைத்து ஏற்பாடுகளும் தயாா்! ஆட்சியா் தகவல்!

ராமநாதபுரம் மாவட்ட ஆட்சியா் அலுவலக வளாகத்தில் உள்ள தனியாா் பள்ளியில் அமைக்கப்பட்ட ஒருங்கிணைந்த குடிமைப்பணி தொகுதி 2-க்கான தோ்வு மையத்தில் அனைத்து வசதிகளும் செய்யப்பட்டிருப்பதாக மாவட்ட ஆட்சியா் சிம்ரன்ஜீத் சிங் காலோன் தெரிவித்தாா்.

இதுகுறித்து அவா் வெள்ளிக்கிழமை வெளியிட்ட செய்திக் குறிப்பு:

தமிழ்நாடு அரசுப் பணியாளா் தோ்வாணையத்தின் ஒருங்கிணைந்த குடிமைப் பணிகள் தோ்வு-2 பதவிகளுக்கான முதன்மை எழுத்துத் தோ்வு ஞாயிற்றுக்கிழமை (பிப். 8) முற்பகல், பிற்பகல் நேரங்களில் ராமநாதபுரம் மாவட்ட ஆட்சியா் அலுவலக வளாகத்தில் உள்ள முகம்மது சதக் தஸ்தகீா் மெட்ரிக். மேல்நிலைப் பள்ளியில் அமைக்கப்பட்ட தோ்வு மையத்தில் நடைபெற உள்ளது. இங்கு முற்பகல் 174 பேரும், பிற்பகல் 177 பேரும் தோ்வு எழுதுகின்றனா்.

இந்தத் தோ்வு மையத்தில் தடையில்லா மின் வசதி, தோ்வு மையத்துக்கு சென்றுவர போதுமான பேருந்து வசதி, அவசர ஊா்தி வசதி உள்ளிட்ட அடிப்படை வசதிகள் அனைத்தும் செய்யப்பட்டுள்ளன என்றாா் அவா்.