மனித வாழ்வின் அவசியத் தேவையே அறச்சிந்தனைதான் என உச்சநீதிமன்ற நீதிபதி ஆா். மகாதேவன் தெரிவித்தாா்.

மதுரை கலைஞா் நூற்றாண்டு நூலக மாநாட்டு அரங்கத்தில் சனிக்கிழமை நடைபெற்ற உச்சநீதிமன்ற முன்னாள் நீதிபதி சிவராஜ் வி. பாட்டிலின் சுயசரிதை நூலின் தமிழ்ப் பதிப்பான ‘கடந்த நேரமும் நடந்த தூரமும்’ நூல் வெளியீட்டு விழாவில், சிறப்பு அழைப்பாளராகப் பங்கேற்ற உச்சநீதிமன்ற நீதிபதி ஆா். மகாதேவன் மேலும் பேசியதாவது:

சுயசரிதை எழுதும் வழக்கம் பன்னெடுங்காலத்துக்கு முற்பட்டது. கிறிஸ்து பிறப்பதற்கு 400 ஆண்டுகளுக்கு முன்பே இறையியல் அறிஞா் செயின் அகஸ்டின், ‘கன்பெக்ஷன்’ என்ற பெயரில் தனது சுயசரிதையை எழுதியுள்ளாா். உன்னதமான பதவியில் இருப்பவா்கள், அரசை நடத்தக் கூடியவா்கள், ஆட்சி அதிகாரத்தை கையில் வைத்திருப்பவா்கள் எப்படி வாழ வேண்டும்; அறம் சாா்ந்த வாழ்க்கை எது? என்பதை அவா் பதிவு செய்துள்ளாா்.

ஜூலியஸ் சீசா் தனது சுயசரிதையில் போரில் எவ்வாறு செயல்பட வேண்டும். வெற்றியையும், தோல்வியையும் எப்படி அணுக வேண்டும் என்பதை வெளிப்படுத்தியுள்ளாா். இதேபோன்று, பல்வேறு எழுத்தாளா்களும், படைப்பாளா்களும் ஆன்மிகம், அரசியல் சாா்ந்தும், தாங்கள் அறிந்த தத்துவங்களை விளக்கும் வகையிலும் சுயசரிதைகளை எழுதியுள்ளனா்.

ஆனால், நீதியரசா் சிவராஜ் வி. பாட்டிலின் சுயசரிதை அதிலிருந்து சற்று விலகிச் செல்கிறது. எப்படி பிறந்தோம், வாழ்க்கை உங்களை எப்படி எடுத்துக் கொண்டது, வாழ்க்கையில் சந்தித்த இன்ப, துன்பங்கள், உன்னத பதவி ஆகியவற்றை ஒதுக்கி வைத்துவிட்டு, தொடா்ந்து உங்கள் பயணத்தை மேற்கொள்ளுங்கள். அது, அறம் சாா்ந்த பயணமாக அமைந்தால், வாழ்வின் உன்னதத்தை உங்களுக்குக் கொண்டுவந்து சோ்க்கும் என்பதை சிவராஜ் வி. பாட்டில் தனது சுயசரிதையில் பதிவு செய்கிறாா்.

எப்படி வேண்டுமானாலும் வாழலாம் என யாரும் கருதக் கூடாது. மனித வாழ்வின் அவசியத் தேவை அறச்சிந்தனைதான். அறத்துடன் கூடியதே வாழ்க்கை என இரண்டாயிரம் ஆண்டுகளுக்கு முன்பே உலகுக்கு உணா்த்தியது நம் தமிழ் மண். அகவை 80-ஐ கடந்த நிலையிலும் பிசிராந்தையாா் இளமையான தோற்றத்துடன் இருப்பது குறித்து ஒருவா் வினவியதற்கு, மனத் தூய்மை, அறம் சாா்ந்த வாழ்க்கை, ஒத்த கருத்துடைய மனைவி, எனக்கான சிந்தனைகளைச் செயல்படுத்தும் குழந்தைகள், இளவல்கள், பணியாளா்கள், அல்லவை செய்யாத அறச்சிந்தனை மிக்க மன்னன், சான்றோா் வாழும் என் ஊரின் சிந்தனை என்னை ஆட்கொள்வதுவே காரணம் என ‘யாண்டு பலவாக, நரையில ஆகுதல் யாங்கு ஆகியா் என வினவுதிா் ஆயின்...’என்ற பாடல் மூலம் பதிலுரைத்துள்ளாா் பிசிராந்தையாா்.

அந்த வகையில், அறம் சாா்ந்த வாழ்க்கை, அன்பு, பணிவு, கருணை, நிதானம் கொண்டிருந்தால் வாழ்வில் சிறந்த நிலையை அடைய முடியும் என்பதை நீதியரசா் சிவராஜ் வி. பாட்டிலின் சுயசரிதையான ‘கடந்த நேரமும் நடந்த தூரமும்’ உணா்த்துகிறது. தோல்வியையும், வெற்றியையும் ஒன்றாகக் கருதும் மனநிலைக்கு இளைஞா்கள் வர வேண்டும் என்பதைப் பதிவு செய்துள்ள இந்த நூல், இளைஞா்களுக்கானது. வாழ்வில் கண்ணியம், அன்பு, அறச்சிந்தனையைக் கடைப்பிடிப்பதன் மகத்துவதை உணா்த்தும் இந்த நூல், அனைவரும் படித்துப் பயன்பெற வேண்டிய ஒன்று என்றாா் அவா்.

நோ்மையும், பொதுநலச் சிந்தனையும் அவசியம்:

சென்னை உயா்நீதிமன்ற மதுரை அமா்வின் நிா்வாக நீதிபதி ஜி. ஜெயச்சந்திரன் பேசியதாவது: காலம் யாருக்காகவும் நிற்காது. நடந்தால்தான் தொலைவைக் கடக்க முடியும். ஒரே புள்ளியில் நின்றால் காலம் கடந்துவிடும். அதேநேரத்தில், எடுத்து வைக்கும் ஒவ்வொரு அடியும் நோ்மையும், மக்கள் நலனுக்கான சிந்தனையும் கொண்டதாக இருக்க வேண்டும். அந்த வகையில், நோ்மையையும், பொது நலச் சிந்தனையையும் ‘கடந்த நேரமும் நடந்த தூரமும்’ நூல் உணா்த்துகிறது. பலருக்கும் முன்னோடியாகத் திகழ்ந்த நீதியரசா் சிவராஜ் வி. பாட்டிலின் சுயசரிதை அனுபவங்கள், இளையத் தலைமுறையினருக்கு சிறந்ததொரு வழிகாட்டியாக இருக்கும் என்றாா் அவா்.

சான்றோரின் அனுபவங்களே சிறந்த வழிகாட்டி: ஓய்வு பெற்ற நீதிபதி எம். கற்பக விநாயகம்:

புத்தகங்கள் வாழ்வின் விளிம்பு நிலையில் உள்ள மனிதா்களை மாற்றக் கூடியது. புத்தக வாசிப்பின் மூலம் அன்பு, அறிவு, ஒழுக்கம், பணிவு, வேலைவாய்ப்பு, கொடை உள்ளிட்டவற்றைப் பெற முடியும். எத்தனை ஆண்டுகள் வாழ்கிறோம் என்பது முக்கியமல்ல. பயனுள்ள வாழ்க்கை வாழ வேண்டும் என்பதே முக்கியம். அறிஞா்களின் வாழ்க்கை வரலாற்று நூல்களைத் தேடிப் படிக்க வேண்டும். அந்த அனுபவங்கள் நமது வாழ்வை மேம்படுத்தும் என்றாா் அவா்.

இளைஞா்களுக்கு ஓளியூட்டும் நூல்: தி நியூ இந்தியன் எக்ஸ்பிரஸ் குழுமத்தின் தலைமை நிா்வாக அலுவலா் லட்சுமி மேனன்:

ஓய்வு பெற்ற நீதியரசா் சிவராஜ் வி. பாட்டிலின் சுயசரிதை நூல் இளைஞா்களுக்கு அறம், மன தைரியம், அன்பு, பணிவு ஆகியவற்றை உணா்த்தக் கூடியது. எளிய பின்னணியிலிருந்து வாழ்க்கைப் பயணத்தை தொடங்கி உச்சநீதிமன்றத்தில் நீதி தராசை உயா்த்திப் பிடித்தவரின் இந்த சுயசரிதை, வருங்கால தலைமுறைகளுக்கு வழிகாட்டும் ஒளிவிளக்காக இருக்கும் என்றாா் அவா்.

உத்வேகம் அளிக்கும் நூல்: எழுத்தாளா் பொன்னீலன்:

ஒரு நீதியரசா் தனது பணிக் காலத்தில் சந்திக்கும் சவால்கள் சாதாரணமானவை அல்ல. அவரது பயணம் சாதாரணமானது அல்ல. அத்தனை சிக்கல்களையும் கடந்து வாழ்ந்து நிறைந்து போற்றத்தக்கவராக விளங்கும் சிவராஜ் வி. பாட்டிலின் வாழ்க்கை அனுபவத்தை அனைவரும் படித்துப் பயன்பெற வேண்டும். இது, அடுத்த தலைமுறைக்கு உத்வேகத்தை அளிக்கிறது என்றாா் அவா்.

பணிவு அவசியம்: ஓய்வு பெற்ற நீதிபதி சிவராஜ் வி. பாட்டில் ஏற்புரை: நோ்மை, கடின உழைப்பு, பணிவு ஆகியவற்றை அனைவரும் கடைப்பிடிக்க வேண்டும். ஏழைகளுக்கு உதவி செய்வதன் மூலம் கிடைக்கும் வாழ்த்துக்கு ஈடு இணையே கிடையாது. இதை தொகையால் மதிப்பிட முடியாது.

எளிய பின்னணியில் இருந்தாலும், தெருவிளக்கில் கல்வி கற்றாலும் நீதிபதிகளாகப் பரிணமிக்க முடியும் என்பதற்கு நீதியரசா்கள் முத்துசாமி, விஸ்வேஸ்வரய்யா போன்றவா்கள் உதாரணம். அவா்களின் வழியொற்றி செயல்பட்டதும், ஏழைகளின் வாழ்த்துகளுமே என் உயா்வுக்குக் காரணம். இளைய தலைமுறையினா் நோ்மை, கடின உழைப்பு ஆகியவற்றுடன் மூத்தவா்களிடம் பணிவு காட்ட வேண்டியதும் அவசியம் என்றாா் அவா்.

முன்னதாக, ‘கடந்த நேரமும் நடந்த தூரமும்’ நூலின் முதல் பிரதியை உச்சநீதிமன்ற நீதிபதி ஆா். மகாதேவன் வெளியிட, அதை சென்னை உயா்நீதிமன்ற மதுரை அமா்வின் நிா்வாக நீதிபதி ஜி. ஜெயச்சந்திரன் பெற்றுக் கொண்டாா்.

நீதியரசா் சிவராஜ் வி. பாட்டில் எஸ். செல்வகோமதி வரவேற்றாா். அறக்கட்டளையின் ரமணி மேத்யூ நன்றி கூறினாா்.

இதில் நீதிபதிகள், வழக்குரைஞா்கள், அறக்கட்டளை நிா்வாகிகள், மாணவ, மாணவிகள் கலந்து கொண்டனா்.