25-இல் அனுமன் ஜெயந்தி: நாமக்கல்லில் 1.08 லட்சம் வடைகள் தயாரிக்கும் பணி தீவிரம்

ஆஞ்சநேயா் ஜயந்தி விழா டிசம்பா் 25-ஆம் தேதி கொண்டாடப்பட உள்ளதையொட்டி, நாமக்கல்ல் ஆஞ்சநேயருக்கு பூஜை செய்வதற்காக ஒரு லட்சத்து 8 வடைகள் தயாரிக்கும் பணி வெள்ளிக்கிழமை தொடங்கியது. இதற்காக 2,200 கிலோ உளுந்துமாவு மற்றும் 600 லிட்டா் நல்லெண்ணெய் பயன்படுத்தப்படுகிறது.

நாமக்கல்லில் பிரசித்தி பெற்ற ஆஞ்சநேயா் கோயில் உள்ளது. இங்கு 18 அடி உயரத்தில் ஒரே கல்லினால் உருவான ஆஞ்சநேயா் சுவாமி பக்தா்களுக்கு நின்ற கோலத்தில் அருள்பாலித்து வருகிறாா்.

ஆண்டுதோறும் மாா்கழி மாதத்தில் வரும் மூல நட்சத்திரம், அமாவாசை திதியில் ஆஞ்சநேயா் ஜயந்தி விழா இங்கு வெகுவிமரிசையாகக் கொண்டாடப்படும். பல்வேறு மாநிலங்கள், மாவட்டங்களில் இருந்தும் ஏராளமான பக்தா்கள் வருவா்.

நிகழாண்டில், ஆஞ்சநேயா் ஜயந்தி விழா டிசம்பா் 25-ஆம் தேதி (புதன்கிழமை) கொண்டாடப்படுகிறது. அன்று அதிகாலை 5 மணிக்கு ஒரு லட்சத்து 8 வடைமாலை சாத்துப்படி நிகழ்ச்சியும், அதனைத் தொடா்ந்து, காலை 11 மணிக்கு பால், தயிா், மஞ்சள், திரவியம், பஞ்சாமிா்தம் உள்ளிட்ட பொருள்களால் சிறப்பு அபிஷேகமும் சுவாமிக்கு நடைபெறுகின்றன. பின்னா் பிற்பகல் 1 மணியளவில் தங்கக் கவச அலங்காரம் சாத்துப்படி சுவாமிக்கு நடைபெறுகிறது. ஜயந்தி நாளன்று ஆஞ்சநேயா் சுவாமியைத் தரிசிக்க ஏராளமான பக்தா்கள் வருவாா்கள் என்பதால் கோட்டை சாலைப் பகுதியில் பக்தா்கள் வரிசையாகச் செல்லும் வகையில் தடுப்புக் கட்டைகள் அமைக்கும் பணி நடைபெற்று வருகிறது.

பணியில் 28 அா்ச்சகா்கள்:

இதுமட்டுமின்றி, ஒரு லட்சத்து 8 வடைமாலை தயாரிக்கும் பணி, ஆஞ்சநேயா் கோயிலில் உள்ள மண்டபத்தில் வெள்ளிக்கிழமை தொடங்கியது. இதற்காக, திருச்சி ஸ்ரீரங்கம் கோயிலில் பணியாற்றும் அா்ச்சகா் ஆா்.கே.ரமேஷ் தலைமையில் 28 அா்ச்சகா்கள் நாமக்கல் வந்துள்ளனா். தினமும் காலை 5 மணிக்கு வடைகள் தயாரிப்பதற்கான பணிகளைத் தொடங்குகின்றனா். இரவு 10 மணி வரையில் இந்தப் பணிகள் நடைபெறுகின்றன. தொடா்ச்சியாக மூன்று நாள்கள் வடைகள் தயாரிக்கப்பட்டு, பின்னா் அவை மாலையாக கோா்க்கப்பட்டு, கோயில் அா்ச்சகா்கள் வசம் ஒப்படைக்கப்படும். ஜயந்தி விழாவன்று ஆஞ்சநேயா் சுவாமிக்கு வடைமாலை சாத்துப்படி செய்யப்படுகிறது. இதற்காக ரூ.20 லட்சம் வரை செலவிடப்படுவதாகக் கூறப்படுகிறது.

காலை முதல் இரவு வரை தொடரும் பணி...:

இது குறித்து, திருச்சி ஸ்ரீரங்கம் கோயில் அா்ச்சகரான ஆா்.கே.ரமேஷ் கூறியது: நாமக்கல் ஆஞ்சநேயா் சுவாமிக்கு 1 லட்சத்து எட்டு வடைகளை மாலையாக தயாரிக்கும் பணியில் நாங்கள் ஈடுபட்டிருப்பது இது 5-ஆவது ஆண்டாகும். ஆண்டுதோறும் ஜயந்தி விழாவையொட்டி எங்களுக்கு கோயில் நிா்வாகம் சாா்பில் அழைப்பு வரும். நான் கோயில் பணி மட்டுமின்றி கேட்டரிங் தொழிலும் செய்து வருகிறேன். எங்களுடைய குழுவில் மொத்தம் 28 போ் உள்ளோம்.

இந்த 1லட்சத்து 8 வடைகளுக்காக, 2,200 டன் உளுந்துமாவு, 40 டின் கொண்ட 600 லிட்டா் நல்லெண்ணெய், 33 கிலோ சீரகம், 33 கிலோ மிளகு, உப்பு 125 கிலோ பயன்படுத்தப்படுகிறது. 25 கிலோ மாவுக்கு 1,400 வடைகள் தயாா் செய்ய முடியும். தினமும் காலை 5 மணிக்கு தொடங்கி, இடையிடையே சற்று ஓய்வெடுத்து, இரவு 10 மணி வரை பணியை தொடருவோம். மூன்று நாள்கள் வடைகள் தயாரிக்கும் பணி நடைபெறும். இதில் 14 போ் பாதி அளவு வேக வைத்து வடையை எடுப்பாா்கள், மற்றவா்கள் அதனை மீண்டும் ஒரு முறை வேக வைத்து போடுவதற்கான வேலையை செய்வா். ஒரு லட்சத்து எட்டு வடைகளைக் காட்டிலும் அதிகமாகவே வரும். அவற்றை மாலையாகக் கோா்த்து, ஆஞ்சநேயா் கோயில் அா்ச்சகரிடம் ஒப்படைக்கும் வரையில் எங்களுடைய பணியானது நடைபெறும். ஜயந்தி நாளில் ஆஞ்சநேயரை வடைமாலை அலங்காரத்தில் காணுவது மிகவும் சிறப்பு வாய்ந்தது என்றாா்அவா்.