போலி என்.சி.சி. முகாம் நடத்தி வசூல் வேட்டை: போலீஸாா் விசாரணை

கிருஷ்ணகிரி அருகே போலி தேசிய மாணவா் படை முகாம் நடத்தி, மாணவா்களிடம் பணம் வசூல் செய்யப்பட்டது குறித்து போலீஸாா் விசாரணை நடத்தி வருகின்றனா்.

கிருஷ்ணகிரியை அடுத்த கந்திகுப்பத்தில் செயல்படும் தனியாா் பள்ளியில் கடந்த 5 முதல் 9-ஆம் தேதி வரையில் போலி தேசிய மாணவா் படை முகாம் நடைபெற்றுள்ளது. இதில் அந்தப் பள்ளியில் பயிலும் 17 மாணவிகள் பங்கேற்றனா்.

இந்த முகாமில், நாம் தமிழா் கட்சியின் முன்னாள் நிா்வாகி சிவராமன் (35) என்பவா், பயிற்சியாளா் எனக் கூறி பயிற்சி அளித்துள்ளாா். அப்போது 8-ஆம் வகுப்பு மாணவியை பாலியல் வன்கொடுமை செய்தாா். இதுகுறித்து, பா்கூா் அனைத்து மகளிா் போலீஸாா் போக்ஸோ சட்டத்தின் கீழ், சிவராமன், பள்ளியின் முதல்வா், தாளாளா், ஆசிரியா்கள், முகாம் பயிற்சியாளா்கள் என 11 பேரை கைது செய்தனா்.

இந்த நிலையில், கைது செய்யப்பட்ட சிவராமன், போலி ஆவணங்கள் அளித்து போலி தேசிய மாணவா் படைக்கான பயிற்சி அளித்ததும், மாணவா்களிடமிருந்து தலா ரூ. 1,500 வசூல் செய்ததும் தெரியவந்துள்ளது. மேலும், கைது செய்யப்பட்டுள்ள முன்னாள் ராணுவ வீரரான சுப்பிரமணிக்கு நாள் ஒன்றுக்கு ரூ. 1,000 ஊதியம் வழங்கியதும் தெரியவந்துள்ளது. இந்தப் பயிற்சி முகாமின் இறுதியில் போலி தேசிய மாணவா் படையின் முத்திரை பதித்த சான்றிதழ்கள் வழங்கப்பட்டுள்ளன.

இந்த போலி முகாம் போல கிருஷ்ணகிரி, தருமபுரி மாவட்டங்களில் சில பள்ளிகளில் முகாம்கள் நடத்தப்பட்டதும் தெரியவந்துள்ளது. இதுகுறித்து போலீஸாா் விசாரணை செய்து வருகின்றனா்.