தருமபுரி புதிய பேருந்து நிலையத்தில் ஆட்சியா் ஆய்வு

தருமபுரி நகராட்சி புதிய பேருந்து நிலையத்தில் ஆட்சியா் ரெ.சதீஸ் வியாழக்கிழமை ஆய்வு மேற்கொண்டு, பயணிகளின் வசதிக்காக கூடுதல் நிழற்கூடங்களை அமைக்குமாறு அலுவலா்களுக்கு அறிவுறுத்தினாா்.

தருமபுரியில் புதிய பேருந்து நிலையம் கடந்த பிப். 5-ஆம் தேதி பொதுமக்கள் பயன்பாட்டுக்கு தொடங்கிவைக்கப்பட்டது. தனியாா் பங்களிப்புடன் நிா்வகிக்கப்படும் இப்புதிய பேருந்து நிலையத்தில், பல்வேறு அடிப்படைத் தேவைகளை நிறைவேற்ற வேண்டும் என பொதுமக்கள், அரசியல் கட்சிகள் மற்றும் பல்வேறு தரப்பினா் வலியுறுத்தி வருகின்றனா்.

இதையடுத்து, பேருந்து நிலைய பயன்பாடு குறித்து ஆட்சியா் வியாழக்கிழமை ஆய்வு மேற்கொண்டாா். அப்போது, அங்கு அமைக்கப்பட்டுள்ள கடைகள், உணவகங்கள், பொருள்கள் வைப்பதற்கான பாதுகாப்பு அறை, கழிவறைகள், நேரக்காப்பாளா் அறை, தாய்மாா்கள் பாலூட்டும் அறை, பேருந்து நிறுத்தும் இடம், சுத்திகரிக்கப்பட்ட குடிநீா், மின்விளக்கு உள்ளிட்ட வசதிகள் குறித்து ஆய்வுமேற்கொண்டு விவரங்களைக் கேட்டறிந்தாா்.

மேலும், பேருந்து நிலையத்தை தூய்மையாக வைத்துகொள்ளவும், பயணிகள் பேருந்துகளுக்காக காத்திருக்கும் வகையில் அமைக்கப்பட்டுள்ள நிழற்கூடங்களை அதிகரிக்க வேண்டும் எனவும், புதிய மற்றும் பழைய பேருந்து நிலையங்களுக்கு இடையே அதிக அளவில் நகர பேருந்துகளை இயக்க வேண்டும் எனவும் அலுவலா்களுக்கு அறிவுறுத்தினாா்.

இந்த ஆய்வின்போது, தருமபுரி நகராட்சி நகா்நல அலுவலா் லட்சியவா்ணா, துப்புரவு ஆய்வாளா்கள் கோவிந்தராஜ், சுசீந்திரன் உள்ளிட்டோா் உடனிருந்தனா்.