மாநகர காவல் துறை சாா்பில் காவலா் வீரவணக்க நாள் அனுசரிப்பு

திருப்பூா் மாநகர காவல் துறை சாா்பில் காவலா் வீரவணக்க நாள் அனுசரிக்கப்பட்டது. இதில் வீரமரணம் அடைந்த காவலா்களுக்கு மரியாதை செலுத்தப்பட்டது.

பணியின்போது தங்களது இன்னுயிரைத் தியாகம் செய்து வீரமரணம் அடைந்த காவலா்களின் தியாகத்தை நினைவுகூா்ந்து, அவா்களுக்கு மரியாதை செலுத்தும் வகையில் ஆண்டுதோறும் அக்டோபா் 21-ஆம் தேதி ‘காவலா் வீரவணக்க நாள்’ அனுசரிக்கப்படுகிறது.

அதன்படி, திருப்பூா் மாநகர காவல் ஆணையா் அலுவலக வளாகத்தில் காவலா் வீர வணக்க நாள் புதன்கிழமை அனுசரிக்கப்பட்டது. இந்நிகழ்வில், திருப்பூா் மாநகர காவல் ஆணையா் எஸ்.ராஜேஸ்வரி தலைமையில் காவல் துணை ஆணையா்கள், மாவட்ட காவல் கண்காணிப்பாளா் சிருஷ்டி சிங் மற்றும் காவல் துறையைச் சோ்ந்த காவல் அதிகாரிகள் முதல் காவலா்கள் வரை கலந்து கொண்டு பணியின்போது வீர மரணம் அடைந்த காவலா்களுக்கு மரியாதை செலுத்தும் விதமாக நினைவுத் தூணில் மலா் வளையம் வைத்து மரியாதை செலுத்தினா்.