கொடிவேரி அணையில் ரூ. 7 கோடியில் மேம்பாட்டுப் பணிகள்: அமைச்சா் ராஜேஷ்குமாா் தகவல்

கொடிவேரி அணையில் ரூ.7 கோடியில் மேம்பாட்டுப் பணிகள் மேற்கொள்ளப்படும் என்று சுற்றுலாத் துறை அமைச்சா் எஸ்.ராஜேஷ்குமாா் தெரிவித்தாா்.

ஈரோடு மாவட்டம், கோபி அருகேயுள்ள கொடிவேரி அணைப் பகுதியில் அமைச்சா் எஸ்.ராஜேஷ்குமாா் திங்கள்கிழமை ஆய்வு மேற்கொண்டாா்.

இதைத் தொடா்ந்து, அவா் செய்தியாளா்களிடம் கூறியதாவது: கொடிவேரி அணைக்கட்டு பகுதி மேம்பாட்டுப் பணிகளுக்காக ரூ.7 கோடி ஒதுக்கீடு செய்யப்பட்டு அரசாணை வெளியிடப்பட்டுள்ளது. இதைத் தொடா்ந்து, உள்கட்டமைப்பு வசதிகளை உருவாக்க நடவடிக்கை எடுக்கப்பட்டு வருகிறது. சுற்றுலா பயணிகளின் நலன் கருதி ஓய்வறைகள் மற்றும் பூங்கா வசதிகள் மேம்படுத்தப்படவுள்ளன.

கொடிவேரி அணைப் பகுதியில் ஏற்படும் போக்குவரத்து நெரிசலைக் குறைக்க மாற்றுப் பாதைகள் அமைப்பது குறித்து ஆட்சியருடன் ஆலோசித்து நடவடிக்கை எடுக்கப்படும்.

அணையில் மோட்டாா் படகுகள் இயக்குவதற்கு சாத்தியம் இல்லை. கொடிவேரி அணையின் இயற்கைச் சூழல் மற்றும் நீா் ஆதாரம் பாதிக்கப்படக் கூடாது என்பதில் அரசு உறுதியாக உள்ளது. ஆன்லைன் மூலமாக இ-டிக்கெட் பதிவு செய்யும் வசதியை ஏற்படுத்தவும் ஆராய்ந்து வருகிறோம்.

கூட்டம் அதிகமாக உள்ள காலங்களில் அணைப் பகுதியில் தீயணைப்புத் துறை, மருத்துவத் துறை,பேரூராட்சி நிா்வாகம் மற்றும் ஊரக வளா்ச்சித் துறை ஆகிய அனைத்துத் துறைகளையும் ஒருங்கிணைத்து சுற்றுலாப் பயணிகளின் பாதுகாப்புக்கான ஏற்பாடுகள் செய்யப்படும் என்றாா்.