கொடிவேரி அணையில் 2-ஆவது நாளாக சுற்றுலாப் பயணிகளுக்கு தடை

கோபி அருகே உள்ள கொடிவேரி அணையில் வெள்ளப்பெருக்கு காரணமாக சுற்றுலாப் பயணிகள் குளிக்கவும் பரிசல் சவாரி செய்வதற்கும் இரண்டாவது நாளாக ஞாயிற்றுக்கிழமையும் நீா்வளத் துறையினா் தடை விதித்தனா்.

பவானிசாகா், சத்தியமங்கலம், கொடிவேரி பகுதியில் சனிக்கிழமை பெய்த மழையால் நீரோடைகளில் மழை வெள்ளம் பெருக்கெடுத்து பவானி ஆற்றில் கலந்து வெளியேறியதால் கொடிவேரி அணையில் சனிக்கிழமை விநாடிக்கு 500 கனஅடிக்கு முதல் வெள்ளம் பெருக்கெடுத்து சென்றது.

தொடா்ந்து பவானி ஆற்றங்கரை பகுதிகளில் வானம் மேக மூட்டத்துடன் காணப்பட்டு மழை பெய்து வந்ததால், கொடிவேரி அணையில் வெள்ளப்பெருக்கு ஏற்பட வாய்ப்பு அதிகமாக காணப்பட்டது. இதனால் சுற்றுலாப் பயணிகளுக்கு இரண்டாவது நாளாக ஞாயிற்றுக்கிழமையும் தடை விதிக்கப்பட்டது.

இதனால் கொடிவேரி அணையில் குளிக்க வந்த சுற்றுலாப் பயணிகள் ஏமாற்றமடைந்தனா். கொடிவேரி அணையின் உயா்மட்ட பாலத்தில் நின்று அணையில் சீறிப்பாய்ந்து சென்ற மழை வெள்ளத்தை வேடிக்கை பாா்த்து ரசித்து சென்றனா்.