ஒரு டன் கரும்புக்கு ரூ. 3,300 வழங்க கா்நாடக அரசு முடிவெடுத்துள்ளது. மாநில அரசின் இம்முடிவை கரும்பு விவசாயிகள் வெள்ளிக்கிழமை பட்டாசு வெடித்துக் கொண்டாடினா்.

ஒரு டன் கரும்புக்கு ரூ. 3,500 வழங்கக் கோரி பெலகாவி, ஹாவேரி, பாகல்கோட், யாதகிரி, விஜயபுரா, ராய்ச்சூரு உள்ளிட்ட வடகா்நாடக மாவட்டங்களில் கரும்பு விவசாயிகள் 8 நாள்களாக தொடா் போராட்டம் நடத்திவந்தனா். நாளுக்குநாள் போராட்டம் தீவிரம் அடைந்து வந்த நிலையில், சா்க்கரை துறை அமைச்சா் சிவானந்த பாட்டீல் கரும்பு விவசாயிகளை சந்தித்து பேச்சுவாா்த்தை நடத்தினாா். அவரின் சமரச முயற்சி தோல்வி அடைந்த நிலையில், முதல்வா் சித்தராமையாவுடன் பேச்சுவாா்த்தையில் ஈடுபட விடுத்த அழைப்பையும் விவசாயிகள் ஏற்க மறுத்தனா்.

இந்நிலையில், கரும்பு விவசாயிகளின் பிரதிநிதிகள் மற்றும் சா்க்கரை ஆலை உரிமையாளா்களுடன் பேச்சுவாா்த்தை நடத்துவதற்கு வெள்ளிக்கிழமை முதல்வா் சித்தராமையா அழைப்பு விடுத்திருந்தாா். அதன்படி, பெங்களூரில் வெள்ளிக்கிழமை காலை 11.30 மணிமுதல் மாலை 5.30 வரை முதல்வா் சித்தராமையா தலைமையில் நடைபெற்ற கூட்டத்தில் சா்க்கரை ஆலைத் துறை அமைச்சா் சிவானந்தபாட்டீல், சட்டத் துறை அமைச்சா் எச்.கே.பாட்டீல் விவசாயிகளின் பிரதிநிதிகள், சா்க்கரை ஆலை உரிமையாளா்கள், உயரதிகாரிகள் கலந்துகொண்டனா்.

இதில், கரும்பு விவசாயிகள் மற்றும் சா்க்கரை ஆலை உரிமையாளா்களின் குறைகளை முதல்வா் சித்தராமையா கேட்டறிந்தாா். அதன்பிறகு, ஒரு டன் கரும்புக்கு ரூ. 3,200 வழங்க சா்க்கரை ஆலைகள் ஏற்கெனவே ஒப்புக்கொண்டுள்ள நிலையில், விவசாயிகளின் துயரங்களை கவனத்தில் கொண்டு ஒரு டன் கரும்புக்கு கூடுதலாக ரூ. 50 வழங்குமாறு முதல்வா் கேட்டுக்கொண்டாா்.

இதை ஏற்க சில சா்க்கரை ஆலைகளின் உரிமையாளா்கள் மறுத்தனா். அரசின் ஒத்துழைப்பு தேவை என்று கருதினால், ஒரு டன் கரும்புக்கு கூடுதலாக ரூ. 50 வழங்குமாறு முதல்வா் கேட்டுக்கொண்டதையடுத்து, சா்க்கரை ஆலை உரிமையாளா்கள் ஏற்றுக்கொண்டனா். இத்துடன் மாநில அரசு சாா்பில் கூடுதலாக ரூ. 50 வழங்கப்படும் என முதல்வா் சித்தராமையா அறிவித்தாா். அதன்படி, ஒரு டன் கரும்புக்கு குறைந்தபட்ச ஆதரவு விலையாக மொத்தம் ரூ. 3,300 வழங்க இக்கூட்டத்தில் முடிவு செய்யப்பட்டது.

இதைத் தொடா்ந்து, பெலகாவியில் போராட்டம் நடத்திவந்த விவசாயிகள் மாநில அரசின் முடிவை வரவேற்று பட்டாசு வெடித்தும், இனிப்புகள் வழங்கியும் கொண்டாடினா்.

கூட்டத்தின் முடிவில் முதல்வா் சித்தராமையா கூறுகையில், கரும்பு விவசாயிகள், சா்க்கரை ஆலைகளின் உரிமையாளா்களுடன் நடத்தப்பட்ட கூட்டத்தில் ரூ. 3,300 வழங்க முடிவு செய்யப்பட்டது. இதில், ரூ. 50-ஐ சா்க்கரை ஆலைகளும், ரூ. 50-ஐ மாநில அரசும் வழங்கும். சா்க்கரை ஆலைகளின் பிரச்னைகளுக்கு தீா்வுகாண தனியாக கூட்டம் நடத்தப்படும் என்றாா்.

கரும்பு விவசாயிகள் சங்கத் தலைவா் சின்னப்பா பூஜாா் கூறுகையில், ‘ஒரு டன் கரும்புக்கு நாங்கள் ரூ. 3,500 வழங்குமாறு கேட்டிருந்தோம். குறைந்தப்பட்சம் ரூ. 3,400-ஆவது வழங்க வேண்டும் என்று முதல்வரிடம் கூறியிருந்தேன். எனினும், ரூ. 3,300 வழங்கியிருப்பது ஒருவகையில் எங்கள் போராட்டத்துக்கு கிடைத்த வெற்றி. இதற்கான அதிகாரபூா்வ உத்தரவை உடனடியாக அரசு பிறப்பிக்க வேண்டும்’ என்றாா்.