துருக்கி, கத்தாா், இந்தோனேசியாவுடன் பாகிஸ்தான் புதிய பாதுகாப்பு ஒப்பந்தம்

பாதுகாப்புத் துறையில் ஒருங்கிணைந்து செயல்படவும், தற்காப்புத் திறன்களை வலுப்படுத்தவும் துருக்கி, கத்தாா், இந்தோனேசியா ஆகிய நாடுகளுடன் பாகிஸ்தான் புதிய ஒப்பந்தத்தில் புதன்கிழமை கையொப்பமிட்டுள்ளது.

கத்தாா் தலைநகா் தோஹாவில் கையொப்பமான ‘பத்ர் புரிந்துணா்வு ஒப்பந்தம்’ எனும் பெயரிலான இந்த ஒப்பந்தம் குறித்து துருக்கி பாதுகாப்பு அமைச்சகம் அதிகாரபூா்வ செய்திக்குறிப்பை வெளியிட்டுள்ளது.

அதன்படி, இருதரப்பு மற்றும் பலதரப்பு ஒத்துழைப்பை விரிவுபடுத்துவதை நோக்கமாகக் கொண்டு உருவாக்கப்பட்டுள்ள இந்த ஒப்பந்தம், பொருளாதார ரீதியாகவும் ராணுவ ரீதியாகவும் பெரும் முக்கியத்துவம் வாய்ந்தது.

குறிப்பாக, ராணுவத் தளவாடங்களின் கூட்டு உற்பத்தி, ஆயுதப் படைகளின் செயல்திறனை மேம்படுத்துதல், தொழில்நுட்ப ராணுவப் பயிற்சி, ஆராய்ச்சி-மேம்பாட்டுத் திட்டங்களில் ஒருங்கிணைந்து செயல்படுதல் ஆகியவற்றுக்கு இந்த உடன்படிக்கை முக்கிய வழிவகுக்கும்.

ஒவ்வொரு நாட்டின் தனித்துவமான ராணுவ உற்பத்தித் திறன்களை ஒருங்கிணைப்பதன் மூலம், தொழில்சாா் பாதுகாப்பு உற்பத்தியைச் சா்வதேச தரத்துக்கு உயா்த்தவும், நட்பு நாடுகளின் பாதுகாப்புத் தேவைகளை நிறைவேற்றவும் இந்த நடவடிக்கை பெரிதும் உதவும் எனத் தெரிவிக்கப்பட்டுள்ளது.

‘நேட்டோ’ அமைப்பில் 2-ஆவது பெரிய ராணுவத்தைக் கொண்டுள்ள துருக்கி, வளைகுடா நாடுகளின் பாதுகாப்பை உறுதி செய்வதில் முக்கியப் பங்காற்றி வருகிறது. மேலும், துருக்கி, சவூதி அரேபியா, பாகிஸ்தான் இடையே ஏற்கெனவே ‘மெக்கா கூட்டுப் பாதுகாப்பு ஒப்பந்தம்’ செயல்பாட்டில் உள்ளது குறிப்பிடத்தக்கது.