பாரிஸ் கபே

கண்மணி ரங்கநாதன் தயாரிப்பில் சரஜ் சீலன் இயக்கத்தில் குரு சோமசுந்தரம், அனுமோல், அர்ச்சனா குமார், விஜய் விஷ்வா, சாய் விக்கி, நயனா உள்ளிட்டோர் நடித்து வரும் படம் 'பாரிஸ் கபே'. இந்தப் படத்தின் இசை, ட்ரெய்லர் வெளியீட்டு விழா சென்னையில் நடைபெற்றது.

இதில் பேசிய நடிகர் குரு சோமசுந்தரம், 'ஒரு படைப்பாளியின் கனவை நிறைவேற்ற குடும்பத்தின் ஒத்துழைப்பு மிக முக்கியம். இந்தப் படத்தில் இயக்குநரின் மனைவியே தயாரிப்பாளராக உள்ளார். இப்படம் ஆழமான கருத்தைக் கொண்ட குடும்பப் படமாக மிக அழகாக வந்துள்ளது. பிரான்ஸ் நாட்டின் பாரிஸ் நகரில், ஒரு வாரம் வரை படப்பிடிப்பை நடத்தினோம்.

பெண்களுக்கு உரிய மதிப்பும் உரிமையும் வழங்காத எந்தவொரு சமூகமோ, துறையோ அல்லது நாடோ உண்மையான வளர்ச்சியை அடைய முடியாது. வளர்ச்சி இருப்பது போன்ற பிம்பம் தென்பட்டாலும், அது ஒரு போலியான வளர்ச்சியாகவே இருக்கும். மாற்றம் என்பது மற்றவர்களிடம் இருந்து தொடங்குவதில்லை. நம்மிடம் இருந்துதான் தொடங்க வேண்டும். இத்தகைய சமூக அக்கறையுள்ள ஆழமான கருத்துகளைப் பேசும் கதையாக இது வந்துள்ளது' என்றார்.