மூன்றாம் மனிதன்

ராம்தேவ் பிக்சர்ஸ் நிறுவனத்தின் தயாரிப்பில் உருவாகி வரும் படம் "மூன்றாம் மனிதன்'. கே. பாக்யராஜ், சோனியா அகர்வால், ஸ்ரீநாத், "சூது கவ்வும்' சிவக்குமார், பிரணா, ரிஷிகாந்த், ராம்தேவ்,  ராஜகோபாலன், மதுரை ஞானம் உள்ளிட்டோர் நடிக்கின்றனர்.  கதை, திரைக்கதை, வசனம் எழுதி இப்படத்தை இயக்குகிறார் ராம்தேவ். இப்படத்தின்   ஃபர்ஸ்ட் லுக் போஸ்டரை மூத்த இயக்குநர்கள் எஸ்.பி. முத்துராமன், எஸ் .ஏ.சந்திரசேகர்,  பாரதிராஜா ஆகிய மூவரும் வெளியிட்டுள்ளனர். படம் குறித்து இயக்குநர் பேசும் போது...

"எதார்த்தம் என்பது கற்பனையை காட்டிலும் விநோதமானது. அதிசயத்
தக்கது. 

அது மாதிரியான ஒரு சம்பவம் அது. இது மாதிரி நடக்குமா.. என்று கூட தோன்றியது. அதை பின் தொடர்ந்து போய் பார்த்தால், உலகம் நெடுகிலும் அந்த பிரச்னை நடந்துக் கொண்டே இருப்பதாக தெரிந்தது. கொஞ்சம் நிதானித்து பார்த்தால், அதில் சினிமாவுக்கான அவ்வளவு சங்கதிகள் இருந்தன. அப்படி எழுத ஆரம்பித்ததுதான் இதன் ஆரம்ப புள்ளி.  பிளாக் காமெடியாக எழுத வேண்டும் என்றுதான் ஆரம்பித்தேன். ஆனால், கதை ஒரு கட்டத்துக்குப் பின் தன்னைத் தானே எழுதிக் கொள்ளும் என்பார்கள். 

அப்படி அதன் அம்சங்களை இந்தக் கதை அதுவாகவே தேடிக் கொண்டது. அப்படி ஆரம்பமான ஒரு பயணம்தான் இது. ஒரு குற்றமும், அந்த குற்றத்தை செய்ய தூண்டக் கூடிய அம்சங்களும்தான் இதன் ஆதாரம். ஒரு குற்றத்தின் மூலம் எங்கே ஆரம்பிக்கிறது. அது அந்த மனிதனை எங்கே நிறுத்துகிறது. அதன் விளைவுகள் என்ன என்பதுதான் இதன் பேசு பொருள்''என்றார்.