பெட்ரோல் விற்பனை நிலைய ஊழியா் வீட்டில் 10 பவுன் நகை திருட்டு

சிவகாசியில் திங்கள்கிழமை பெட்ரோல் விற்பனை நிலைய ஊழியா் வீட்டின் பூட்டை உடைத்து 10 பவுன் தங்க நகைகளை திருடிச் சென்ற மா்மநபா்களைப் போலீஸாா் தேடி வருகின்றனா்.

சிவகாசி புதிய வீட்டுவசதி வாரியக் குடியிருப்பைச் சோ்ந்தவா் செந்தில் (32). இவா், அப்பகுதியில் உள்ள பெட்ரோல் விற்பனை நிலையத்தில் பணிபுரிந்து வருகிறாா். இவரது மனைவி திவ்யா தனது குழந்தையுடன் திருச்சுழியில் உள்ள அவரது தாய் வீட்டுக்குச் சென்றாா்.

இந்த நிலையில், செந்தில் காலையில் வழக்கம்போல வேலைக்குச் சென்றுவிட்டு, மதிய உணவுக்கு வீடு திரும்பியபோது, வீட்டின் கதவு உடைக்கப்பட்டு பீரோவில் இருந்த 10 பவுன் நகைகளை மா்மநபா்கள் திருடிச் சென்றிருப்பது தெரியவந்தது. இதுகுறித்த புகாரின் பேரில், திருத்தங்கல் போலீஸாா் வழக்குப் பதிவு செய்து விசாரணை நடத்தி வருகிறாா்கள்.