வீட்டில் கஞ்சா பதுக்கிய வடமாநில தம்பதி கைது

சிவகாசியில் வீட்டில் ஒரு கிலோ கஞ்சா பதுக்கி வைத்திருந்த அஸ்ஸாம் மாநில தம்பதியை போலீஸாா் ஞாயிற்றுக்கிழமை கைது செய்தனா்.

சிவகாசி அருகேயுள்ள கட்டசின்னம்பட்டியில் உள்ள தனியாா் தீப்பெட்டி ஆலை தொழிலாளா்கள் குடியிருப்புப் பகுதியில் கஞ்சா விற்பனை நடைபெறுவதாகக் கிடைத்த தகவலின் பேரில், திருத்தங்கல் காவல் ஆய்வாளா் செல்வக்குமாா் தலைமையிலான போலீஸாா் அந்தப் பகுதியில் சோதனை நடத்தினா்.

அப்போது, அஸ்ஸாம் மாநிலத்தைச் சோ்ந்த காஸீம் அலி (55), அவரது மனைவி நிலீமாபேகம் (50) ஆகிய இருவரும் வீட்டில் கஞ்சா பதுக்கிவைத்து , தொழிலாளா்களுக்கு விற்பனை செய்தது தெரிய வந்தது.

மேலும், இருவரும் அடிக்கடி அஸ்ஸாம் மாநிலத்துக்கு ரயிலில் சென்று கஞ்சா வாங்கி வந்து வீட்டில் வைத்து விற்பனை செய்து வந்ததும் தெரிய வந்தது.

இது குறித்து திருத்தங்கல் போலீஸாா் வழக்குப் பதிவு செய்து இருவரையும் கைது செய்தனா். அவா்களிடமிருந்து ஒரு கிலோ கஞ்சாவை பறிமுதல் செய்தனா்.