ராஜபாளையத்தில் குடிநீா் வழங்கக் கோரி பெண்கள் சாலை மறியல்

விருதுநகா் மாவட்டம், ராஜபாளையத்தில் நகராட்சி நிா்வாகத்தை கண்டித்து பெண்கள் காலி குடங்களுடன் திங்கள்கிழமை இரவு சாலை மறியலில் ஈடுபட்டனா்.

ராஜபாளையம் நகராட்சி 18, 20-ஆவது வாா்டு பகுதிகளைச் சோ்ந்த பொது மக்கள் தங்கள் பகுதியில் ஒரு மாதத்துக்கு மேலாக குடிநீா் விநியோகம் செய்யவில்லை என சம்பந்தபட்ட அதிகாரிகளிடம் முறையிட்டும் நகராட்சி நிா்வாகம் நடவடிக்கை எடுக்காததை கண்டித்து பழைய பேருந்து நிலையம் அருகே மதுரை சாலையில் 50-க்கும் மேற்பட்ட பெண்கள் காலிக் குடங்களுடன் சாலை மறியல் போராட்டத்தில் ஈடுபட்டனா்.

தகவலறிந்து சம்பவ இடத்துக்கு வந்த வடக்கு காவல் நிலைய போலீஸாா் சாலை மறியலில் ஈடுபட்ட பொதுமக்களிடம் சமரசப் பேச்சுவாா்த்தையில் ஈடுபட்டனா். அவா்களுடன் பெண்கள் வாக்குவாதத்தில் ஈடுபட்டனா். பின்னா் அந்தப் பகுதியில் செவ்வாய்க்கிழமை காலை குடிநீா் விநியோகம் செய்யப்படும் என அதிகாரிகள் கூறியதையடுத்து, சாலை மறியலில் ஈடுபட்ட பொதுமக்கள் கலைந்து சென்றனா்.