சென்செக்ஸ் 418 புள்ளிகள் முன்னேற்றம்: 6 மாதங்களில் இல்லாத உச்சம்

இந்த வாரத்தின் இரண்டாவது வர்த்தக தினமான செவ்வாய்க்கிழமையும் பங்குச்சந்தை நேர்மறையாக முடிவடைந்தது.

Updated On :14 ஜூன் 2023, 12:30 am

இந்த வாரத்தின் இரண்டாவது வர்த்தக தினமான செவ்வாய்க்கிழமையும் பங்குச்சந்தை நேர்மறையாக முடிவடைந்தது. இதைத் தொடர்ந்து, மும்பை பங்குச்சந்தை குறியீட்டு எண் சென்செக்ஸ் 418 புள்ளிகளும், தேசிய பங்குச் சந்தைக் குறியீட்டு எண் நிஃப்டி 114 புள்ளிகளும் உயர்ந்து நிலைபெற்றன.
நாட்டின் சில்லறை பணவீக்கம் மே மாதத்தில் 25 மாதங்களில் இல்லாத அளவிற்கு 4.25 சதவீதமாக குறைந்தது. தொடர்ந்து நான்காவது மாதமாக சில்லறை பணவீக்கம் குறைந்துள்ளது. இதன் தாக்கம் பங்குச்சந்தையில் எதிரொலித்தது. மேலும், உலகளாவிய சந்தைக் குறிப்புகள் நேர்மறையாக இருந்ததும், மார்க்கெட் லீடர் ரிலையன்ஸ், ஐடிசி பங்குகள் வெகுவாக உயர்ந்ததும் முதலீட்டாளர்களுக்கு உற்சாகத்தை அளித்தது. குறிப்பாக வங்கி, எஃப்எம்சிஜி, ரியால்ட்டி, ஹெல்த்கேர், ஃபார்மா பங்குகளுக்கு நல்ல வரவேற்பு இருந்தது. ஆட்டோ பங்குகள் மட்டும் சிறிதளவு விற்பனையை எதிர்கொண்டன என்று பங்கு வர்த்தகத் தரகு நிறுவனங்கள் தெரிவித்தன.
சந்தை மதிப்பு உயர்வு: இதற்கிடையே, சந்தை மூலதன மதிப்பு ரூ.2.11 லட்சம் கோடி உயர்ந்து வர்த்தக நேர முடிவில் ரூ.290.03 லட்சம் கோடியாக இருந்தது. அந்நிய நிறுவன முதலீட்டாளர்கள் (எஃப்ஐஐ) திங்கள்கிழமை ரூ.626.62 கோடி அளவுக்கு பங்குகளை விற்றுள்ளது சந்தை புள்ளிவிவரத் தகவல்கள் மூலம் தெரிய வந்துள்ளது.
சென்செக்ஸ் முன்னேற்றம்: சென்செக்ஸ் காலையில் 54.43 புள்ளிகள் கூடுதலுடன் 62,779.14-இல் தொடங்கி 62,777.04 வரை மட்டும் கீழே சென்றது. பின்னர், அதிகபட்சமாக 63,177.47 வரை மேலே சென்ற சென்செக்ஸ், இறுதியில் 418.16 புள்ளிகள் உயர்ந்து 63,143.16-இல் முடிவடைந்தது.
19 பங்குகள் விலை உயர்வு:
சென்செக்ஸ் பட்டியலில் 11 பங்குகள் வீழ்ச்சிப் பட்டியலிலும், 19 பங்குகள் விலையுயர்ந்த பட்டியலிலும் இருந்தன. இதே போன்று, தேசிய பங்குச் சந்தையில் மொத்தம் 1,243 பங்குகள் ஆதாயப் பட்டியலிலும், 831 பங்குகள் வீழ்ச்சிப் பட்டியலிலும் இருந்தன. 50 முன்னணி நிறுவனப் பங்குகளை உள்ளடக்கிய நிஃப்டி பட்டியலில் 36 பங்குகள்ஆதாயம் பெற்றன. 12 பங்குகள் வீழ்ச்சிப் பட்டியலில் வந்தன.
ஏற்றம் பெற்ற பங்குகள்
ஏசியன் பெயின்ட் 2.15%
டைட்டன் 2.07%
ஐடிசி 1.96%
ரிலையன்ஸ் 1.50%
டாடா ஸ்டீல் 1.46%
பஜாஜ் ஃபின்சர்வ் 1.39%
சரிவைக் கண்ட பங்குகள்
கோட்டக் வங்கி 1.18%
எம் அண்ட் எம் 0.68%
ஹெச்சிஎல் டெக் 0.58%
எஸ்பிஐ 0.37%
டாடா மோட்டார்ஸ் 0.34%
மாருதி 0.32%

தினமணி செய்திமடலைப் பெற... Newsletter

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Arattai, Google News

உடனுக்குடன் செய்திகளை அறிய தினமணி App பதிவிறக்கம் செய்யவும்.

பின்னூட்டத்தில் வெளியாகும் கருத்துகளுக்கு அவற்றைப் பதிவிடுவோரே முழுப் பொறுப்பு; அவை தினமணியின் கருத்துகளைப் பிரதிபலிக்கவில்லை.தனிநபர், சமூகம், மதம் அல்லது நாடு ஆகியவற்றுக்கு எதிராக அவமதிக்கிற அல்லது ஆபாசமான விதத்திலுள்ள எந்தவொரு கருத்தும் இந்திய அரசின் தகவல் தொழில்நுட்பக் கொள்கைப்படி தண்டனைக்குரிய குற்றம். இதுபோன்ற கருத்துகளுக்கு எதிராக உரிய சட்ட நடவடிக்கை எடுக்கப்படும்.

தொடர்புடையது