மாற்றத்தை முன்னிறுத்திய தவெக! 3 மாதங்களாக மாற்றப்படாத அரசு இணையதளம்!

மாற்றம்... மாற்றம்.. என்று ஒற்றை வார்த்தையை முன்னிறுத்தி, தமிழகத்தில் பொறுப்பேற்றிருக்கும் தவெக தலைமையிலான ஆட்சி தொடங்கி ஐந்து மாதங்கள் ஆகியிருக்கிறது; ஆனால், தமிழக அரசின் அதிகாரப்பூர்வ இணையதளம் கடந்த மூன்று மாதங்களாக முறையாக அப்டேட் செய்யப்படவில்லை என வாசகர்கள் குறிப்பிடுகின்றனர்.

இந்தத் தளத்தில் அதிகாரிகளுக்கான தகவல்கள், அரசின் உத்தரவுகள், நியமன உத்தரவுகள், அரசின் கொள்கை விளக்கங்கள் அனைத்தும் உடனுக்குடன் அப்டேட் செய்யப்படாமல் இருக்கின்றன.

தமிழக அரசின் இணையதளத்தில் இந்த விவரங்கள் சரியாக, உரிய தேதியில் பதிவிடப்பட்டு வந்தால்தான் அரசு எடுக்கும் முடிவுகள், நடவடிக்கைகள் என அனைத்தையும் மக்களும் ஊடகங்களும் உடனுக்குடன் அறிந்து கொள்ள முடியும்.

மேலும், தமிழக அரசின் முக்கிய நடவடிக்கைகளை எல்லாம் அறிந்துகொள்ள tn.gov.in என்ற இணையதளமே முக்கிய ஊடகமாக உள்ளது.

இந்த இணையதளம், மாநில அமைச்சரவை, அரசுத் துறைகள், பல்வேறு துறைகளின் தலைமையிடங்கள், மாவட்ட ஆட்சியர்களால் வழங்கப்படும் தகவல்களைக் கொண்டு தேசிய தகவல் மையம் மூலம் செயல்பட்டு வருகிறது.

இந்த இணையதளத்தில்தான், மாநில அரசின் நிதிநிலை அறிவிப்புகள், கொள்கை விளக்கக் குறிப்புகள், அமைச்சரவை முடிவுகள், முதல்வர் மற்றும் அமைச்சர்கள் தலைமையில் நடைபெறும் கூட்டங்களில் எடுக்கப்படும் புதிய முடிவுகளை பதிவிட்டு, மக்கள் அறிந்துகொள்ள செய்ய முடியும்.

ஆனால், இந்த இணையதளத்தின் பல பக்கங்கள் மூன்று மாதங்களுக்கும் மேலாகப் புதிய தகவல்கள் எதுவும் பதிவேற்றம் செய்யப்படாமல் உள்ளது. அது மட்டுமல்ல, பல துறைகளின் செயலர்கள் பணியிட மாற்றங்கள் செய்யப்பட்டுவிட்டனர். ஆனால், அதுபற்றிய விவரங்கள் இதில் மாற்றப்படாமல், முன்பு பொறுப்பில் இருந்தவர்கள் பெயர்களே இடம் பெற்றிருக்கினறன. மக்களுக்கு ஏதேனும் விவரங்கள், புகார்கள் கொடுக்க வேண்டும் என்றால்கூட அது அவ்வளவு எளிதாக நடக்காது.

படத்தில், வாட்ஸ் நியூ என்ற பகுதி, கிட்டத்தட்ட இரண்டு மாதங்கள் பழைய தகவல்களைக் கொண்டுள்ளது.

மாநில அரசின் வாரியங்கள், தீர்ப்பாயங்கள், ஆணையங்களில் நியமிக்கப்பட்ட நபர்களின் விவரங்களும் பதிவேற்றம் செய்யப்படாமல் உள்ளது. இது அரசுப் பதவிகளில் நியமனங்கள் பற்றிய அறிவிப்புகளையே மக்களின் கண்பார்வையிலிருந்து மறைத்துவிடும் என அஞ்சப்படுகிறது.

வெளிப்படையாக, ஊழலற்ற ஆட்சியைக் கொண்டு வருவோம், மாற்றம் வரும் என்று வாக்குறுதி அளித்திருந்த முதல்வர் ஜோசப் விஜய்க்கு இது பற்றிய தகவல்கள் சென்று சேர்ந்திருக்க வாய்ப்பில்லை என்றுதான் தவெக தொண்டர்கள் கருதுகிறார்கள்.

ஏற்கெனவே, தமிழக அரசு பிறப்பித்த 5 அரசாணைகள் திரும்பப் பெறப்பட்டது, பட்டினப்பாக்கத்தில் தலைமைச் செயலகம் கட்டும் முடிவு போன்றவை தவெக ஆட்சி தொடர்பான விமர்சனங்களைப் பெற்றிருக்கின்றன. இந்த நிலையில், அரசு இணையதளமும் அப்டேட் ஆகாமல் கிடப்பது அதிர்ச்சியளிக்கலாம்.

இந்த விவகாரத்தில் தமிழக அரசிடமிருந்து தகவல்கள் செல்லவில்லையா? அல்லது உரிய முறையில் பதிவேற்றம் செய்யப்படவில்லையா? எங்கே கோளாறு என்பது கேள்விக்குறி. உடனுக்குடன் அரசின் இணையதளத்தில் தகவல்கள் அனைத்தும் பதிவேற்றம் செய்யப்பட வேண்டும், இணையதளத்திலும் மாற்றத்தைக் கொண்டுவர வேண்டும் என்பது மக்களின் எதிர்பார்ப்பு.