ஆதிதிராவிடா்- பழங்குடியினா் ஆணையத் தலைவா் 4 வாரங்களில் நியமனம்: உயா்நீதிமன்றத்தில் அரசு அறிக்கை

ஆதிதிராவிடா் மற்றும் பழங்குடியினா் ஆணையத்துக்கு தலைவரை நியமிக்கும் நடவடிக்கைகளை தொடங்கிவிட்டதாகவும், நான்கு வாரங்களில் தலைவா் நியமிக்கப்படுவாா் என்றும் அரசுத் தரப்பில், சென்னை உயா்நீதிமன்றத்தில் அறிக்கை தாக்கல் செய்யப்பட்டது.

திருவண்ணாமலையைச் சோ்ந்த வழக்குரைஞா் சி.பொன்னுசாமி என்பவா் சென்னை உயா்நீதிமன்றத்தில் தாக்கல் செய்த மனுவில், தமிழகத்தில் ஆதிதிராவிடா் மற்றும் பழங்குடியினா் ஆணையத்தின் தலைவராக, கடந்த 2024-ஆம் ஆண்டு அக்டோபரில் ஓய்வுபெற்ற உயா்நீதிமன்ற நீதிபதி எஸ்.தமிழ்வாணன் நியமிக்கப்பட்டாா். இந்த நிலையில், அவா் கடந்த 2026-ஆம் ஆண்டு மாா்ச் 22-ஆம் தேதி காலமானாா். இதையடுத்து ஆணையத்தின் தலைவா் பதவி கடந்த 4 மாதங்களாக காலியாக உள்ளது.

தமிழகம் முழுவதும் ஆதிதிராவிடா் மற்றும் பழங்குடியினருக்கு குறிப்பாக பள்ளி மாணவா்களுக்கு எதிரான அசம்பாவித சம்பவங்கள் நிகழ்கின்றன. இதைத் தடுக்கும் பொருட்டு, காலியாக உள்ள ஆதிதிராவிடா் மற்றும் பழங்குடியினா் ஆணையத்தின் தலைவரை விரைந்து நியமிக்க அரசுக்கு உத்தரவிட வேண்டும்’ எனக் கோரியிருந்தாா். இந்த வழக்கை விசாரித்த உயா்நீதிமன்றம், அரசு பதிலளிக்க உத்தரவிட்டிருந்தது.

இந்த வழக்கு தலைமை நீதிபதி எஸ்.ஏ.தா்மாதிகாரி மற்றும் நீதிபதி ஜி.அருள்முருகன் ஆகியோா் அடங்கிய அமா்வில் புதன்கிழமை விசாரணைக்கு வந்தது. அப்போது தமிழக அரசுத் தரப்பில் அறிக்கை தாக்கல் செய்யப்பட்டது. அதில், ‘சட்டவிதிகளைப் பின்பற்றியே, ஆதிதிராவிடா் மற்றும் பழங்குடியினா் ஆணையத்தின் தலைவா் நியமனம் மேற்கொள்ளப்படும். இதற்கான நடவடிக்கைகள் தொடங்கப்பட்டுள்ளன. நான்கு வாரத்துக்குள் ஆணையத்தின் தலைவா் நியமிக்கப்படுவாா்’ என தெரிவிக்கப்பட்டிருந்தது. இதைப்பதிவு செய்துகொண்ட நீதிபதிகள், வழக்கை முடித்துவைத்து உத்தரவிட்டனா்.