தங்களை எதிர்த்து கேள்வி கேட்கும் இளைஞர்களை ஒடுக்கலாம் என அரசு நினைக்கிறது! - கனிமொழி கண்டனம்!

திமுக ஜென்-ஸீ குழு ஒருங்கிணைப்பாளர் அன்பானந்தன் அரியப்பனை நள்ளிரவில் காவல் துறையினர் கைது செய்ய முயன்றதற்கு திமுக மக்களவை உறுப்பினர் கனிமொழி கண்டனம் தெரிவித்துள்ளார்.

சட்டப்பேரவையில் முதல்வர் விஜய் பேசியதை விமர்சித்து திமுக ஜென் - ஸீ குழு ஒருங்கிணைப்பாளர் அன்பானந்தன் அரியப்பன் தனது சமூக ஊடகப் பக்கத்தில் விடியோ ஒன்றை வெளியிட்டார். இதையடுத்து, நேற்று (ஜூன் 23) நள்ளிரவு கிருஷ்ணகிரியில் உள்ள அவரது வீட்டில் காவல் துறையினர் அத்துமீறி நுழைந்து கைது செய்ய முயன்றதாகக் குற்றஞ்சாட்டப்படுகிறது.

இந்த நிலையில், தங்களை எதிர்த்து கேள்வி கேட்கும் இளைஞர்களை அடக்கி ஒடுக்கலாம் என தவெக அரசு நினைப்பதாகக் கூறி திமுக மக்களவை உறுப்பினர் கனிமொழி கண்டனம் தெரிவித்துள்ளார்.

இதுபற்றி, அவர் வெளியிட்டுள்ள சமூக ஊடகப் பதிவில்,

“ தி.மு.க-வின் ஜென் - ஸீ குழு ஒருங்கிணைப்பாளரான திரு. அன்பானந்தன் அரியப்பன் அவர்களை, நள்ளிரவில் அராஜகமாக வீடு புகுந்து கைது செய்ய முயற்சித்திருக்கும் தவெக அரசின் காவல்துறையின் செயல் கண்டனத்திற்குரியது.

தங்களை எதிர்த்து கேள்வி கேட்கும் இளைஞர்களை அடக்கி ஒடுக்கலாம் என்று நினைக்கும் தவெக அரசுக்கு, விரைவில் தமிழ்நாட்டு இளைஞர்களே உரிய பதிலடி கொடுப்பார்கள்” எனக் கூறியுள்ளார்.

ஏற்கெனவே, இந்த விவகாரம் குறித்து சட்டப்பேரவை எதிர்க்கட்சித் தலைவர் உதயநிதி ஸ்டாலின் உள்ளிட்ட திமுக மூத்த தலைவர்கள் கண்டனம் தெரிவித்துள்ளது குறிப்பிடத்தக்கது.