தவெக எம்.எல்.ஏ. குதிரை பேர வழக்கு: சிபிஐ விசாரணை கோரிய மனு தள்ளுபடி!

தவெக எம்எல்ஏவிடம் குதிரைபேரம் நடத்தியதாக தொடரப்பட்ட வழக்கின் விசாரணையை சிபிஐக்கு மாற்றக் கோரிய மனுவை சென்னை உயா்நீதிமன்றம் தள்ளுபடி செய்து உத்தரவிட்டது.

திருப்பூரைச் சோ்ந்த வழக்குரைஞா் ஜெ.பாலசுப்பிரமணி என்பவா் சென்னை உயா்நீதிமன்றத்தில் தாக்கல் செய்த மனுவில், குதிரைபேர விவகாரம் குறித்து, தவெகவின் ஊத்தங்கரை எம்எல்ஏ இளையராஜா புகாா் அளித்து, நான்கு நாள்களுக்குப் பிறகு இந்த விவகாரத்தில் வழக்குப் பதிவு செய்யப்பட்டுள்ளது. புகாா் கிடைப்பற்கு முன்பே, இந்த வழக்கில் ஆரம்பகட்ட விசாரணை நடத்தப்பட்டுள்ளது.

எம்எல்ஏவிடம் பேரம் பேசிய நிகழ்வு கிருஷ்ணகிரியில் நடந்துள்ளது. ஆனால், திருவல்லிக்கேணி போலீஸாா் இது குறித்து வழக்குப் பதிவு செய்திருப்பது அரசியல் உள்நோக்கம் கொண்டது. ஜனநாயக நடைமுறைகள் மற்றும் மக்கள் தீா்ப்பை பாதுகாக்க, இந்த விவகாரத்தில் நியாயமான சுதந்திரமான விசாரணை தேவை. எனவே, இதுபோன்ற புகாா்கள் மீது சிபிஐ விசாரணைக்கு உத்தரவிட வேண்டும் எனக் கோரியிருந்தாா்.

இந்த வழக்கை விசாரித்த உயா்நீதிமன்றம் தீா்ப்புக்காக ஒத்திவைத்திருந்தது.

இந்த வழக்கில் தலைமை நீதிபதி எஸ்.ஏ.தா்மாதிகாரி, நீதிபதி ஜி.அருள்முருகன் ஆகியோா் அடங்கிய அமா்வு வெள்ளிக்கிழமை பிறப்பித்த தீா்ப்பில், அசாதாரண சூழலுக்கான முகாந்திரம் இருக்கும்போது, மட்டுமே சிபிஐ விசாரணைக்கு உத்தரவிட முடியும். குறிப்பாக, மாநில அல்லது உள்ளூா் போலீஸாரின் விசாரணை ஒருதலைபட்சமாகவும், உண்மைக்குப்புறம்பாகவும் இருக்கும்போது சிபிஐ விசாரணைக்கு உத்தரவிடலாம்.

ஆனால், மனுதாரா், ஊடகங்கள் மற்றும் சமூக வலைதலங்களில் வந்த செய்திகளின் அடிப்படையில், அதன் உண்மைத் தன்மையை ஆராயவில்லை. ஆதாரமற்ற குற்றச்சாட்டுகளின் அடிப்படையில் இந்த வழக்கை சிபிஐ விசாரணைக்கு மாற்ற வேண்டும் எனக் கோரியுள்ளாா்.

இந்த வழக்கில் விசாரணை மேற்கொண்ட மாநில போலீஸாா், இதுவரை 9 பேரைக் கைது செய்து, நீதிமன்ற காவலில் அடைத்துள்ளனா்.

எனவே, இந்த வழக்கை சிபிஐ விசாரணைக்கு மாற்ற வேண்டும் என்ற மனுதாரரின் கோரிக்கையை ஏற்க இயலாது. பொதுநல வழக்குகள் என்பவை குரலற்றவா்களின் குரலாக நீதித் துறையைச் செம்மைப்படுத்தும் கருவியாகும். அந்தப் பொதுநல வழக்கின் பெயரில் தொடரப்பட்டுள்ள இந்த வழக்கை மேலும் விசாரிக்க முடியாது எனக் கூறி வழக்கை தள்ளுபடி செய்து நீதிபதிகள் உத்தரவிட்டனா்.